2018/05/11

《婚前的最後派對》

螢幕快照 2018-05-11 上午2.16.57
 
網上資料圖片
 
我要結婚啦。
 
步入男人嘅墳墓,我覺得,結婚係人生必經過程(單身狗得罪了),好似死亡一樣,你唔可以避免,但你可以選擇死喺邊個手上,死法如何,以及幾時死。
 
一眾兄弟聽到呢個消息,既然要走,當然要笑住走,即時開咗個治喪委員會,籌備單身派對,等我走得安樂。
 
睇過醉爆伴郎團之後,我成日都幻想自己結婚之時會唔會有奇遇,例如起身多咗個紋身,又或者去咗泰國之類,但到你真係面對時,一切只是空想,你邊敢俾自己出事,唯一願望只不過係成班兄弟齊齊整整,飲到不省人事,至於搵個人妖助慶之類,有心喇,免喇。
 
結婚係一種友情考驗,請邊個飲,邊個會到,一切都睇得一清二楚;而單身派對,更係熟人之中嘅熟人你先會搵,最後估唔到可以有成十二個兄弟送我上路,聽到之後我不其然諗起十二門徒,唔知會唔會有老婆埋伏嘅猶大出賣我。
 
事前我已經講明,人咁多可以整條Banner,例如「熱烈恭賀」之類,但我估唔到嘅係,呢班死仔竟然整咗件Tee,寫住「歡送狗爺」……
 
幾十歲人,唔知有幾耐無試過笑到收唔到聲,十二個人著住一式一樣嘅衫,好似中學之後都無試過,笑到收唔到聲,講唔到嘢,更有少少鼻酸,估唔到……呢班加埋成幾百歲嘅粉腸,認真起上嚟係可以咁仆街。
 
第一Round就已經係一人一杯,一口氣飲咗十二杯,過程係點?我已經唔太記得,因為飲完十二杯之後已經少少醉,我只係記得,有人點咗一首《最佳損友》,再有人點咗首《最後派對》。
 
以前我寫過,朋友愈來愈難約,曾經我哋日日見,返學見完放學放假都要見,畢業之後淨返幾多?往往要係紅事先會有藉口相聚,會唔會有日我哋要等白事先會聚首一堂?
 
派對結束後,大家分道揚鑣。
 
搭的士嘅的士,搭地鐵嘅一齊搭地鐵,到轉線站,再走幾個,到目的地,又落幾個,最後我同同行朋友講,識到你哋真係無憾,呢個單身派對,係我人生最永遠都記得嘅一日。
 
落車時,我不禁諗,到老時,呢班粉腸走一個,又走一個,最後死唔去嘅一個,感覺會係點?
 
一個人返屋企,我戴起耳筒,播起一首《最佳損友》,然後再聽一首《最後派對》。
 
蔣薇
www.fb.com/maydreaming

COMMENT