2018/05/18

《當大男孩變成小男人》

may menclub
 
網上資料圖片
 
大男孩,係男性嘅寫照,我哋會沉迷打機,會亂買模型,會享受戇鳩。人前,我哋成熟咗,但獨處之時,我哋同十零歲無乜分別,只不過係多咗唏噓同憂愁。
 
大男孩總有一日會變成男人,就係當你有另一半之時,就算點男女平等都好,男人都背負住一種責任,有責任喺身,你無資格再做一個大男孩,正式成為一個男人,可惜,絕大多數都會成為小男人。
 
網上有一個秘密團體,九叔探訪區。
 
九叔係邊個?係一代傳奇,係男人嘅基督、佛祖、阿拉級存在,警察同古惑仔要拜關公,已婚小男人就要拜九叔,出去滾,要心懷感激,要用九叔名義Call個全鐘。
 
探九叔,唔一定係要出去滾,而係一種慰藉,一種支持,一種發洩,九叔無自由,佢下半生都要活喺太太嘅監視中,唔好話出去滾,睇咸書都唔得,一生玩完。
 
以前睇大丈夫唔明九叔嘅感受,正如好多人都會講,咁唔鍾意,咪離婚囉。
 
九叔可以離婚,可以回復單身自由,更可以繼續去玩,唔需要偷偷摸摸,亦唔需要有所避忌。學董伯講句,「其實留下來,比離開更需要勇氣。」
 
九叔唔想離婚,甚至放棄佢嘅自由去維持呢段婚姻,為乜?為咗呢個女人囉。
 
有好多小朋友唔會明,感情並唔係黑與白,唔係完全開心,或完全唔開心,而係一啖砂糖一啖屎,而你唔知幾時會食到屎,甚至屎加砂糖一齊上迫你食。
 
點解一個大男孩願意變成小男人?全因為愛佢,繼而改變自己,過程唔好受,但為咗佢,值得。
 
愛情並唔係王子公主式過住幸福快樂日子,而係不斷遷就,改變,接受,體諒,除咗晚上肉體激烈碰撞之外,每日生活兩人嘅心理、情感、信念、習慣都一直激烈對衝。
 
九叔,係一個樹洞俾大家男人呻兩句,唔似女性論壇,我哋唔興上網呻,因為俾太太們知道,你呻嘅問題會好似核分裂咁發生大爆炸,所以只可以同兄弟呻兩句,呻完,記得買糖水返屋企謝罪。
 
點解九叔係信仰?因為九叔話俾你知,世界上仲有一個人比你更慘,更可憐,你要感恩,要感激,九叔係人辦,睇到九叔咁,一切苦難都變得唔再痛苦。
 
小男人,係人夫嘅寫照,我哋會呻,會屌,會痛。人前,我哋好似好九叔咁,但返到屋企見到佢,我哋會明白點解揀咗呢條路。
 
蔣薇
www.fb.com/maydreaming

COMMENT