2018/06/29

《賤男自白》

images-2
 
網上資料圖片
 
「可唔可以借個火?」
 
男人望咗望,遞上一個火機,另一個男人接過手之後點起手上嘅香煙。兩個有故事嘅人,從一支煙相識,同樣係重遊舊地,亦係為咗女人,兩人犯嘅亦係天下男人都會犯嘅錯--多情。
 
「曾經我深愛過一個女人,但感情總會變,我亦控制唔到自己愛上另一個人,最後佢要我選擇,我答佢,天上地下,無從比較,如果選擇,除咗委屈妳,亦對唔住佢……」
 
「唉,曾經有個女人,佢走入我家門求名份,但我太太以死相迫,我承認自己係個懦夫,佢望住我,叫我嘅名,想我幫佢講一句,但我只講出一句:妳返去先啦……呢一句,令佢傷心欲絕。」
 
「兄台,睇嚟你都係個有故事嘅人。」
 
「彼此彼此。」
 
「大家都係賤男中嘅賤男,應該做到朋友。」
 
「愛一個人唔難,難在只愛一個人。愛一個人,同同時愛幾個人,有衝突咩?」
 
「無衝突,但同時愛幾個人就係你唔啱。就好似我咁,我愛我太太,但我更愛佢,只不過要我係一整個家庭太太子女同佢之間選擇,我唯有犧牲佢。」
 
「出軌嘅第一刻,你就知唔會有好結果啦。」
 
「人人都知,但人人都唔理,乜愛情唔係就應該係咁咩?」
 
「比女人聽到,你小心俾人放上網圍屌。」
 
「但如果你問我最愛邊個,我可以認真講,係佢,只不過我唔值得擁有佢。」
 
「我明,我真係明,因為我個答案同你一樣。」
 
「有冇聽過無人之境?」
 
「這個世界最壞罪名,叫大易動情。」
 
「但我喜歡這罪名……」
 
世界上有好多是非對錯,亦有好多人覺得應該黑白分明,可惜,情感係最難以理性處理嘅事,外人睇當然輕鬆,但當你代入其中,你仲能夠作出相同決定?或者有一日,你會遇上一個令你放下底線之人;或者有一日,你都會犯上同樣嘅錯;或者有一日,你開始懂得體諒。
 
如果你一生從未遇過一個令你瘋狂嘅人,唔知應該開心,定係可惜。
 
煙熄,兩個男人對話結束,但一首無人之境喺佢哋心中糾纏不去。
 
無人之境,不想說明,只想反應。
 
蔣薇
www.fb.com/maydreaming

COMMENT