2018/07/06

《戇鳩與喪屍》

download-5
 
網上資料圖片
 
之前都講過人到中年開始會遇到瓶頸,人生同事業上好想改變,唔同人有唔同選擇,轉行、做生意、投資、移民等等。
 
有朋友佢都搵到錢,叫有四五萬蚊一個月,從事一行十年之久,到咗一個日復一日,年復一年嘅狀態,突然一個機會,佢想開創自己嘅Start Up公司,身邊朋友聽完之後,當然有唔少意見啦。
 
比佢大幾年嘅人會苦口婆心同佢講:「恕我咁直,你都唔細,點解唔搵吓Passive Income,好似投資理財啊,又或者做多幾個Freelance,增值自己,而係要去做一樣咁高風險嘅事呢?」
 
係,如果你每個月賺到錢,再放去投資,搵到一筆,再供樓,細樓換大樓,再買第二第三間,人生好快就去到財務自由,香港地生存容易生活難,但當你搵到錢,識錢搵錢時,生活就唔再困難。望住有班人,得閒抽新股,炒吓股票,一個下午可以賺到幾千銀,甚至幾萬銀,買層樓過一兩年又話帳面升咗百幾萬,你問我羨唔羨慕?當然羨慕啦。
 
男人睇唔睇錢?當然睇!但一個只係睇錢嘅人,唔係我哋想做嘅男人!我哋想做一個有事業、有夢想嘅男人!你可以話我戇鳩,甚至連我自己都覺得係戇鳩,只不過人生仲有幾多年有膽色、有能力、有心態去衝去闖去戇鳩?其實唔多。
 
點樣睇一個人成唔成熟?睇佢係金錢同夢想之間選擇乜就知,年輕人會奮不顧身講夢想,成年人會毫不猶豫揀金錢。
 
幾十歲人仲講夢想?Come on James!成熟少少好唔好?
 
夢想之所以係遙不可及,係因為無乜人真係敢行出呢一步,十幾歲太細個,一切都係空想;廿幾歲太天真,好多嘢都思量不足能力有限;三十幾歲人,成熟少少啦!四十歲五十歲六十歲都總會有人會走出嚟Come on James。
 
每個年齡都有限制,都有犧牲,都有困難,你問呢班人咩年紀先可以追夢?佢答你唔到,因為佢一早就放棄咗夢想,好似喪屍咁,仲周圍咬人令其他人都變成喪屍。佢哋只可以係有人成功追夢之後走出嚟講羨慕,感概自己已為生活而奔波勞苦。
 
戇鳩同喪屍兩者俾我揀,唔……我會選擇做一個戇鳩。
 
或者有一日我哋都會成為喪屍,但至少你係一個戇鳩過嘅喪屍。
 
蔣薇
www.fb.com/maydreaming

COMMENT