2018/07/20

《兄弟的分離》

bros
 
網上資料圖片
 
人生係一種過程,由無,到有,再失去,朋友亦由無,到有,再分離。小學中學畢業總要面臨分別,大家喺紀念冊寫上最真誠嘅祝福,大家有自己嘅新環境、新朋友,但亦限於香港,一個電話,「旺地恆」等,要見,唔難。
 
細細個九七時,好多人都話移民,舉家搬遷,二十年後,終於輪到我哋呢輩。
 
當我聽到一個兄弟突然來電約我食飯,席間佢話,佢要移民去加拿大,唔係唔返香港,但一年唔知有冇一兩次,我無言以對,只可以祝佢一路順風,諗起以前夜晚無聊可以搵佢喺公園飲酒吹水吹一晚,失戀升職加人工都會搵佢傾訴,而佢即將去一個好遠嘅地方,唔係再可以一個電話搵到佢,生日亦只可以遠遠祝賀,距離唔再係一個半個鐘嘅車程,而是差唔多十二個小時嘅時區。
 
科技發達,要搵人WhatsApp,Facetime都可以,但朋友同兄弟,係要見的;唔見,再熟都只會淡,會遺忘。
 
仲好記得讀書嗰陣,我哋話等第時買樓要買旁邊,打機睇波吹水都可以行過隔離㩒鐘就可以,但呢個城市嘅樓市,唔好話住隔離,連買樓要住同一屋苑都唔係易,大家都無再提起呢個孩時戲語。
 
送佢機一刻,幫佢推住行李,去到入閘口,我心裡面有句說話無講:「其實我哋仲可唔可以好似以前咁。」句嘢太HEHE,我講唔出口,同時亦好清楚個答案係點,一切都返唔到去以前。
 
我只係講:「我結婚,返嚟做伴郎啊!」
 
佢笑咗笑:「好啊!」
 
結婚前,我同佢講,你記唔記得我哋嘅承諾?佢話記得,但佢行唔開,唔好意思。我回佢,唔緊要。
 
直到結婚當日,兄弟團比想像中多咗一個人,係佢。
 
「又話行唔開嘅?」「突然又行得喎,哈哈。」一個擁抱。「多謝晒。」「客咩氣。」
 
我突然明白,世事無常,你捉唔住要離開嘅事物,但你可以換過一個模式去延續,唔可以再出嚟吹水飲酒,但間唔中一句問候,就變成一種新嘅關係。
 
友情常在,友情,無一種固定形式,男人,一切在心中。
 
蔣薇
www.fb.com/maydreaming

COMMENT