2018/08/31

《俾一個玩簡單模式嘅人指導真係難聽過粗口》

images-2
 
網上資料圖片
 
遊戲分好多種模式,簡單、正常、困難、地獄等等,一樣係爆機,但係簡單模式爆機同係地獄模式爆機中嘅含金量相差極大。
 
有人認為,打機爆到機咪得囉,簡單模式爆機唔係爆機啊?但亦有人覺得非最難爆機就係無意思。
 
三國無雙系列簡單版,你真係合埋眼斬就可以,兵仔一斬即死;世紀帝國簡單版你升到城堡電腦都仲係黑暗,仲要有多幾倍資源俾你任起嘢;連第一代瑪莉奧爆機第一次之後都會進入困難模式,絕對係兩個世界。
 
唔知你點睇遊戲,有人打發時間,打幾多、打得幾好、打到邊度都唔係問題,佢隨時可以抽身離開;但亦有人認真對待,一開始就要打到全成就,全破關。
 
遊戲,不過係遊戲,你可以唔玩,你可以轉遊戲,但人生呢個遊戲,你無可能停,亦無可能轉。
 
人生你無得揀係地獄模式定係簡單模式,或者呢個係投胎技術,但事已至此都唔好討論點投胎,一出世就注定你係咩模式,身家千萬,幾歲就有十萬利是錢,定你封十蚊嘅利是都俾人拎走去種生機。
 
你唔可以揀模式,但係同一世界入面,你用簡單模式打到飛起,然後同班喺困難模式打拼生存嘅人講經驗,講心得,真係難聽過粗口。你有冇試過無錢開飯?你有冇試過屋企俾唔到支持你仲要打壓你,俾負擔你?你有冇試過因為要慳一個幾毫行到身水身汗?
 
無,一個養尊處優嘅人唔會明,你分享心得唔係唔得,但你又有冇諗過喺大部份困難同地獄模式嘅人身上work唔work?係你眼中嘅攻略,其實係人哋眼中嘅毒藥。
 
你一套滿級神裝就話可以行埋去AAAAAA,但我一套新手裝乜都無你叫我埋去A?
 
我唔排除你係一個成功嘅人,但我好肯定你唔係一個好導師。
 
我明,係一個課金至上,有錢大晒嘅社會,課長唔係玩遊戲,而係玩一班零課玩家,依家你威又威過,玩又玩過,不如乖乖地收聲,你唔駛捱,我哋仲要捱啊。
 
蔣薇
www.fb.com/maydreaming

COMMENT