2018/09/07

《反智的回覆後PM》

download
 
網上資料圖片
 
最近面書有一大堆post叫人留言然後pm你回覆內容,煩厭程序真係去到核爆級,令我諗返起n年前論壇嘅一種模式:回覆後觀看內容。
 
面對一個吸引嘅題目,一定想一睹為快,點知要成為會員,跟手仲要回覆先睇到,最後見到回覆一大堆thx、謝謝樓主無私分享、thanks for share之類無營養留言,我知,要刷流量,要衝點擊,要洗數據,唔知咩原因,呢種文化開始沒落,但估唔到n年後,竟然回到咁落後嘅過去,又要玩留言先睇到。
 
我深信互聯網係一個講求User Experience嘅地方,有乜直接得過搵到心頭好,再用極速睇完,再尋找下一個內容呢?試諗吓你做乜都要加多兩至三個step先可以完成,咁你人生之中有幾多時間係浪費緊喺一個謝謝樓主嘅時間入面?
 
大家心不甘情不願咁留言,最後睇到pm條link,入面原來係九唔搭八嘅內容,體諒可以話係極差,甚至有一種想block咗你個騙子嘅感覺,就好似當年用winmx見到一套好吸睛嘅片,download左一晚,除咗褲,最後竟然係rickroll嘅感覺,有一種想殺人嘅衝動。
 
其實所謂嘅內容、測驗,你隨手google都可以搵到,呢樣content farm將垃圾包裝成上菜,欺騙完你仲可以得到你嘅資料,以後仲喺你嘅內在排行入面得到較前位置,反而一堆好注重體驗同內容嘅人會落得唔好收場,完全體現到劣幣驅逐良幣嘅感覺。
 
好彩,menclub都算係一個清泉,一堆j圖入面,無要求你要留言,如果唔係比人見到你係j圖post入面求圖,你都幾難同女朋友或者老婆解釋。
 
點去解決呢個局面?
 
遇到呢種留言帖,block咗佢,遇到好內容真分享,花小小時間留個言交流下討論下。
 
面書改完一次又一次機制,廣告愈來愈多,內容愈來愈無謂,花好多時間都唔覺得有得著,仲俾呢種回覆pm嘅取巧模式橫行,相信大家會花少咗時間喺呢個平台上面,當一個地方唔再令你想睇,想留,離滅亡不遠了。
 
蔣薇
www.fb.com/maydreaming

COMMENT