2018年08月17日

男人的Fantasy (一八九)《煩惱皆因有得揀》

download-4
 
網上資料圖片
 
最近成日睇FACEBOOK上面啲當年今日,有時睇吓五十年前嘅香港街道,又或者係三十年前嘅飲食業面貌。一路睇嘅時候,自己都有好多畫面,呢度又好似同阿爸阿媽去過,嗰度又好似細個喺電視見過呢個廣告。
 
直到我見到一張幾十年前公屋康樂設施嘅舊相,見到入面班小朋友玩得好開心嘅樣,我就不期然諗起,點解生活總係好似以前比較開心?
 
明明以前個世界就好簡陋,人少車少樓又矮,屋企錢唔多玩具唔多娛樂唔多,悶到隔離屋玩咗部大雪櫃,我哋執佢個紙皮盒都可以玩一日,咁貧乏嘅生活,點解總係快樂過宜家。
 
我有一段時間會用「過去總是美好」嚟糊弄呢一件事,但慢慢我先發覺,係心態問題。個道理又圍繞返萬能嘅「半杯水理論」入面,到底係「得到」快樂,定係「知足」開心。
 
細個屋企窮,社會亦都未有咁發達,一個長假期入面,陪住我同一班朋友嘅,除咗一堆可能會出現嘅爛紙皮,就只有得返波子。眼前嘅娛樂就係咁少,但成個暑假你總得要過,暑假又點可以唔開開心心呢,就係咁,一班細路就會兜住喺成座樓入面搵玩意,有時係諗諗波子新玩法,有時係捉吓伊因。
 
「放假應該要開心」呢個諗法,又簡單又堅持。
 
一班小朋友長大,大家都有大家一片天,科技一日千里,到咗今時今日,我哋一班人溝通得最多嘅地方係WhatsApp,講得最多嘅話題,係「幾時出嚟聚聚?」
 
好多次試過大家飲一餐茶,都可以拗到面紅耳熱,呢個平日冇時間,嗰個放假要去旅行。順手拈來嘅事太多,我哋好似忘記咗人生最重要,而又曾經發生過嘅美好,到底對我哋人生仲有冇意義。我哋有太多選擇,聚舊係唔係必要嘅事。
 
有時就算係飲一餐茶,明明約好一個地方,但世界上有OPENRICE呢個APP(非廣告),又會有人覺得有好多選擇,不停咁「不如試呢間、不如去嗰間」。就係咁唔記得有幾多次,我哋因為有選擇而慢慢將件事變質,最後失去初衷,最後不歡而散。
 
然後又因為科技,我哋好容易就識到新朋友,上網約吓踢波,又或者係去群組傾吓打機,我哋又可以識到一班新朋友。慢慢覺得舊朋友太煩,點解我唔可以有更多選擇。
 
然後到某一日,我哋睇到FACEBOOK上面某一啲舊照片,又記得呢一班舊朋友,慢慢諗當初自己有得揀,最後忘記咗,其實我哋有好多事,都唔需要太多選擇。
 
薛可正Facebook Page
http://www.facebook.com/sithoching

Read More
2018年08月10日

男人的Fantasy (一八八)抑鬱都市

images-2
網上資料圖片
 
Ellen離開嘅新聞,令到成個城市都愁雲慘霧。我對AT17唔算好認識,我好中意佢哋首成名作the best is yet to come,上一次shine演唱會,喺後台見到ellen時,我除咗say hello之外,就表達我喜歡the best is yet to come。
 
Ellen對我,係一個shine一樣嘅回憶,我未必靠近,但永遠存在。而呢一個離開方法,亦令我諗起好多我值得反思嘅事。到底我身邊有幾多身體入面有過量抑鬱嘅朋友,而我自己又有冇呢個問題出現?
 
我諗咗半日,但最後答案係空白,因為我根本唔會諗得到一個答案出嚟。成日都聽人講呢個都市已經病咗,好多人都有抑鬱。抑鬱來自我哋嘅生活節奏同對自己嘅要求,而呢一種要求,我認為係來自我哋嘅選擇。
 
我哋可能唔知點樣停落嚟,但我哋最少要要求自己停落嚟,那怕一日只有一秒,一月只有一日,所有嘅量度都有兩面,唔係增加,就係減少。我哋做唔到完全根治徹底消滅,但至少我哋要做到向好嘅一面推進。
 
呢個係一個硬道理,必須執行但談何容易,世界上有難做嘅事,但諗深一層,呢個世界會有完全做唔到嘅事嗎?
 
「你唔係我,你唔會明白我。」多嘴嘅我,唔知幾多次聽到呢句說話,因為每一次陪朋友傾心事,唔太識講嘢嘅我成日都會俾錯建議講錯說話,我都會得到呢句禮物。好多時我都想講,你夠唔係我,明明可以用時間去打機我都喺度陪你,俾俾面唔使窒得咁應得唔得?
 
我哋嘅城市都被「不體諒」包圍,由我哋自身,去到大環境、媒體等等,都好似搵唔到一個俾我哋透氣嘅空間,呢個係一個必然,定係一個選擇?
 
當我哋喺巴士見到個四肢睇落無乜嘢嘅後生仔坐關愛座,用電話拍上網成班一齊起吓底鞭吓屍;當我哋喺WhatsApp覺得某某錄音太多,就拎上facebook status同人分享圍爐一番;當我哋去到火車站,聽到個講國語,其實都未知佢係台灣定大陸人嘅物體就由佢前面啤到佢後面嘅時候,我好想大家都知道,生活入面每一分每一秒,其實我哋都係控制得到。可能好難控制,但我哋係可以控制得到。
 
對世界失望並唔會係一時間累積,因為我哋嘅生命本來就美好。除非你喺第三世界出世,如果唔係,喺香港地出世嘅我哋點都會擁有一啲事物,雖然可能你唔稀罕。
 
但最後要將呢個生活點行落去,係我哋嘅選擇,永恆通用嘅「半杯水」理論正好話俾我哋知我哋可以向人生任何一個方向去行,當然你唔中意飲水你死都要飲橙汁我都吹你唔脹。
 
要失望總有理由,要快樂總有空間。任何事都係一個選擇,既來之則安之,其實人生好快樂。
 
薛可正Facebook Page
http://www.facebook.com/sithoching

Read More
2018年08月03日

男人的Fantasy (一八七) 多一點,少一點

download
 
網上資料圖片
 
香港社會氣氛一日比一日差,已經係一個不爭嘅事實。撇開大家生活上遇到嘅問題,單單係我哋喺社交平台上自己選擇所接收嘅氛圍,可能每一日都令到自己唔太開心。
 
今日我開FACEBOOK,見到有朋友放咗一張相。相入面有兩個人,左邊係梁朝偉,而右邊係張國榮。睇落去係呢兩位巨星九十年代時嘅相嚟,然後我呢位唔太熟嘅朋友,就喺相上面留咗一句好詭異嘅說話:
 
「我唔明點解有咁多人讚梁朝偉靚仔,如果佢叫靚仔,咁佢隔離嗰個叫咩?」
 
我睇完呢句嘢之後,覺得好辛苦,係由衷地覺得,點解世界上每一件事如果唔夠你死我活就好似唔夠意思咁。張國榮靚仔定梁朝偉靚仔我都無所謂,但點解一定要揀一個,又或者一定要一個壓住一個先好?可唔可以並存,可唔可以有空間?
 
又好似之前有一個所謂楝篤笑嘅表演者,用BAND友嘅形象去做笑點,講咗一段佢自己以為好好笑,但內容全部都係踐踏嘅表演出嚟。佢演繹得生硬個人又無咩天份呢啲我就唔講,但你好好哋去發長去試探一個興趣咪好,點解硬係要心腸咁差,知道個社會中意花生,你就用呢啲花生去做內容?
 
最後佢俾人鬧到痴線,呢啲係活該,我亦好希望呢個社會少一個人可以用比較嚟做興趣、事業同賣點,呢一種風氣對所有人都唔會有好處。
 
我開始明白點解會有朋友放棄過多嘅網絡生活,因為行得太快嘅事物,好似會一直將我哋扯得太辛苦。網絡係兩面刃,佢可以將我哋嘅生活擴大、整合,同時亦都可以霸佔我哋整個生活。以前上網係娛樂,而家網上就係生活,再唔可以抽離,好同唔好你都要照單全收。
 
當然我知道網上同現實生活已經係割捨唔到,但喺我哋生活入面,我哋仲可以選擇釋放乜嘢氛圍出嚟,朋友感覺到,到底會快樂定係覺得擠壓。所以近來開始,我嘅FACEBOOK都盡量去講一啲快樂少少嘅事,又或者係一啲簡單地笑嘅短片,唔想無窮無盡咁去睇好多比較同埋怨嘅事,可能就係對自己最好嘅其中一個方法。
 
所以最近上網係上得幾開心,繼續。
 
薛可正Facebook Page
http://www.facebook.com/sithoching

Read More
2018年07月20日

男人的Fantasy (一八六) 與神對話 面斥不雅

chi wah
 
網上資料圖片
 
最後一次睇子華,點都要寫返多少感想。我個人唔係太鍾意劇透,但如果跟住落嚟我唔小心側漏咗多少,都講聲唔好意思先。如果真係仲未睇嘅朋友,建議save低條link,睇完子華返嚟先睇。
 
我成日都會幻想,一個表演者,會點樣向自己呢個一世功名嘅舞台道別。作為最後一次「勸諫」,係無錯,我經常認為子華就係循循善誘,有咩事都勸咗自己人先,好似舊底我同人打交,阿媽問都唔問就打我先,阿媽愛我嗎當然愛,就正正係愛你,佢先選擇將道理放你身上,「魚旦論」就係一個例子。
 
每次都係「勸諫」,最後一次,子華雖然未到「死諫」,但我都感動到,係「苦諫」。
 
單單係重提陳冠希件事,已經感受到子華嘅痛處。事過境遷十年,當事人都換咗幾個天,何解都仲要拎返件事出嚟講。就係件事過咗十年,好多香港人都仲未知,當年真正犯錯嘅係邊個。整電腦被人偷相嘅變被告,偷嘢放上網分俾大家嘅叫烈士,十年後嘅我哋每日叫住公平自由,但放諸呢件事上面,黑白到底又係唔係今時今日我哋振振有詞嘅黑白?
 
由開端嘅非藍即黃,子華想講香港現有嘅非黑即白,人嘅空間係咪要咁樣劃界,限制世界同時,亦都係限制自己。
 
十幾年前「魚旦論」係一個開首,最後一次嘅「賑災賑得好Jetso」係一個總結,香港人一直揀緊自己嘅路,幾時先可以做到子華所講嘅同理心?
 
嗯,面斥不雅。
 
薛可正Facebook Page
http://www.facebook.com/sithoching

Read More
2018年07月13日

男人的Fantasy (一八六) 倫敦金安全守則

8d185d9954eb0c91a7ee7f30a91345c1
網上資料圖片
 
最近嘅倫敦金騙案搞到滿城關注,一班後起之秀真係靈活到不得了,將「美人計」推到極致,仲要俾人上公司摷到有西瓜刀。
 
成日都俾人笑你哋做乞兒金融,個個讀書唔成唔係問題,但智力可唔可以高少少,有咩理由將成件事變成犯罪?以前倫敦金之所以俾人話呃人,係一班經紀用合約入面嘅條文許可情況下,去不停做買賣,然後變成自己嘅佣金。
 
所以一路以嚟倫敦金都俾人話無監管,但甚至少會好似今次咁成班俾人當犯拉,原因就係呢班天才將成件本來已經唔算啱嘅事,徹底咁做錯。
 
以前做倫敦金,一般都會叫客人俾自己操盤,但其實呢個做法並唔係想客人死,而只係想自己有多啲保障。「搞死一個客」從來都唔係經紀嘅諗法,試諗諗,搞死個客佢連倉都無埋,經紀自己又點會有著數。
 
只不過話分兩頭,「唔想」同「阻止唔到」係兩個概念嚟,就算你幾唔想佢死,但你拎住佢戶口不停咁出出入入,風險一定提高,會產生好多報紙入面所講嘅「無意義交易」,最後令到個戶口陰乾收皮。
 
喺呢個關鍵上,其實個客都係有責任。首先倫敦金就已經係一樣槓桿大到不得了嘅投資工具,稍稍聽完都會知道係一樣「賭得好大」嘅投機工具,再講得精準啲就係賭大細。一樣咁刺激嘅工具,你點會將佢交俾一個你唔太熟佢而佢又唔太熟黃金嘅人手上。
 
每一樣投資,客人都要熟悉,如果有第二個人介入,客人就更加要熟悉呢個幫你手嘅經紀。你合埋眼見人幾次,就俾幾十萬人哋,再信心滿滿搭住人膊頭同人講:「靠哂你喇今次」,真係唔呃你又呃邊個?
 
其實接觸倫敦金唔恐怖,亦都好簡單。唔好假手於人,自己操盤。唔好睇即日啲咩可能打仗呀印度乜春節呀最近好日多人結婚買金器嘅所謂數據,計好自己可以承受嘅風險,幾多百份比係入市,幾多係後備資,做好功課,唔一定唔死,但就算死都叫死喺自己手,條氣無咁唔順。
 
當然你都可以搵經紀,但你一定要花時間去認識呢個經紀,倫敦金行業入面我相信仲有好多用心做分析嘅經紀,「了解」永遠係投資嘅第一步。
 
呢篇唔係廣告,只係一個十年前投入過倫敦金市場嘅人有感而發。
 
薛可正Facebook Page
http://www.facebook.com/sithoching

Read More