2017/08/11

男人的Fantasy (一四零)《愛情弱智》

1_201612070954581kKK8
  
網上資料圖片
  
「弱智」呢兩個字,從古到今都係一個貶詞嚟,我哋只會用呢兩個字去笑人鬧人,冇一個人會想自己同呢個狀態連上任何關係。
  
人永遠都想聰明一世,對身邊所有事都瞭如指掌,就算個人唔聰明,都要俾外面睇到你個醒醒目目。正所謂人要面樹要皮,喺呢個「形象行先、乜都要面」嘅世界入面,我哋都必須聰明、必須令人覺得自己聰明。
  
但呢個世界我哋係永遠都估唔到,永遠都唔好認為黑係壞白係好,聰明係叻弱智就要俾人笑,我哋要細分一下,到底「弱智」呢個狀態係代表乜嘢,係唔係放喺任何地方上都唔適合?
  
被人笑「弱智」,普遍被認為係蠢,懵盛盛同所有事嘅認知力唔強同遲緩,但大家有冇諗過,喺愛情世界入面,反應聰敏,警覺性高係唔係一個優點?
  
我都曾經以為自己係一個聰明人,對身邊曾經嘅每一個伴侶都豎起對耳仔,將佢哋嘅生活圈子過濾,審視佢哋身邊每一個朋友,目的都係想所有事喺我嘅控制以內。
  
但慢慢我發現,呢一種聰明係無用。就算俾我日日知道對方喺邊,佢都總會有唔喺我身邊嘅日子;就算佢日日喺我身邊,我都唔可以一百巴仙肯定,佢個心入面係唔係得我一個。
  
人心,係連GPS都追蹤唔到嘅事,愈想控制所有事,係因為代表我哋愈接受唔到期望之外嘅所有意外。喺愛情入面聰明,就即係意圖用人力,去改變大自然嘅天命,呢個行為,到底係聰明定係弱智?
  
人嘅本性都係無安全感,以為控制到所有事就等如有安全感。但如果可以控制到嘅愛情,咁呢份愛情仲係唔係值得我哋擁有一世嘅愛情?
  
文中所講嘅弱智,並無歧視意思,特此戴定頭盔。
   
薛可正Facebook Page
http://www.facebook.com/sithoching

COMMENT