2017/11/17

男人的Fantasy (一五四)《讀書好》

2017_11_17_薛可正MenClub
 
網上資料圖片
 
細細個成日聽過一句說話,叫「細時唔讀書,大個做運輸」。細細個聽就覺得好似一個恐嚇咁,但慢慢長大,我就覺得呢句說話只係話俾你知,應該點樣面對人生,先唔好難為自己。
 
每個人嘅天份都唔同,呢一樣係我哋唔可以否認。但唔否認係唔夠,及早知道自己嘅天份喺邊度,再去發展,呢個先係我哋人生中最可以快樂嘅因素之一。
 
做咩呀,唔明呀?好簡單,你唔係一塊讀書嘅材料,就要及早放棄讀書。呢句說話係咪聽起上嚟好荒謬?但其實小弟我就係一個完全唔識讀書嘅人辦。我天生記憶力差,對閱讀同英文都有障礙﹝我自己覺得﹞,無論我點用腦,點花時間,我都係讀唔入腦。但當年嘅我又點會知道呢個事實,最後折騰幾年,唔係我放棄讀書,而係讀書放棄咗我。
 
我無諗過自己可以成為一個作家,但我讀書時中文作文又真係幾好,曾經試過有老師將我篇作文好似故仔書咁喺堂上面讀出嚟,同學們都幾好反應。咁既然我中文幾好,但讀書唔叻我可以點做?我好幸運咁,細個時候未有電腦,無互聯網嘅童年係呢個年代想像唔到,我哋可以玩又唔使錢嘅玩意唔多,唔係執吓爛紙皮就係玩捉人仔,而我仲有多一個嗜好:執公仔書睇。
 
公仔書即係港漫,當年咩龍虎門如來神掌,只要有字有公仔嘅我都照睇,睇完無嘢做我再睇,好多文字就係咁樣根深柢固地成長起上嚟。到後來廿幾歲,有一次喺一個論壇入面,我嘗試寫故事嘅情況下,幾十年港漫嘅習慣,令我一直走到今時今日,都仲有人問,你讀書時中文係咪好叻?
 
我係一個中三未讀完嘅懶學生,到後來知道書唔夠用,先去報啲文校中五呃張沙紙搵工,但今時今日我覺得自己中文比好多大學生好,呢個唔係驕傲,係事實,因為相對地我嘅英文都比好多幼稚園學生差。天生我材係必有用,唔好狹隘地俾框框自己,亦都唔好界限自己嘅發展,唔好覺得唔讀書就一定死,除咗真正嘅離世,係無「今次死喇」呢回事。
 
我成日用呢個諗法去教仔,佢唔想做嘅我唔會逼佢,就算佢好似佢老豆我當年咁讀唔成書,佢總有自己天生嘅能力,做爸爸嘅有能力幫佢發展,總好過叫佢個個星期去學非洲鼓,去競爭一啲佢本來唔需要嘅經歷同成長過程。
 
人認知自己先係最大價值,知道自己個燈掣喺邊,你總有一日可以發光。
 
薛可正Facebook Page
http://www.facebook.com/sithoching

COMMENT