2017/12/01

男人的Fantasy (一五六) 《打機愛情論》

2017_12_01_sit menclub
 
網上資料圖片
 
我睇新聞話,鄭伊健差唔多五十歲人,仲成個大細路咁,仲係好沉迷遊戲機,聽到呢度,我就好羨慕。羨慕嘅唔係佢有能力可以玩盡世界上所有嘅遊戲,而係佢仲可以保留一份有錢都買唔到嘅可貴:一個仲對打機有興趣嘅心。
 
我細個同一般年青人一樣,都係瘋狂打機。細個玩任天堂,然後超任,再之後係世嘉,一路到今日嘅PS4。經典遊戲玩過好多,以前可以一晚唔瞓玩到第二朝七點,食完個麥當當早餐都仲可以返屋企玩多場winning先瞓。但宜家,唔好話通頂,你叫我玩一場,我都要諗吓我可唔可以有咁奢侈嘅時間。
 
可能你會話誇張,有時我自己都覺得誇。但男人出嚟做嘢三幾年,首先想收工準時返屋企已經係無可能。細細個返學就唔使講,放學就打機;但去到二十歲時,我都係一放工就走人,六點放工我七點就要買埋外賣坐喺電腦前面,一路食我盒排骨飯一路玩CS,老闆要我OT?「sorry我屋企有事要走先」,老闆話日日都走,咁你唔適合呢份工,ok fine,最多咪唔做。
 
以前有呢份自由,宜家?打打吓機老闆一個電話打嚟,你已經要即時收皮,就算喺屋企佢都唔會放過你,科技昌明就係咁。日日夜收工無精神係一樣,返到屋企你已經唔係一個人,以前同老豆老母住,講得衰少少除咗打飛機唔使佢哋幫手之外,我真係碗飯都要佢哋拎埋放喺我隻手度食,細細個阿爸阿媽一定錫你,把口就係咁鬧,但其實照顧到我廢人咁。
 
宜家返到屋企,未結婚嘅你會見到年紀慢慢變老嘅雙親,睇住佢哋行得慢、周身骨痛、頭髮變白,你仲會有心機打機?諗吓點搵多少少錢照顧佢哋好過啦。結咗婚嘅更加唔使講,仔女要你教功課,老婆要你做家務,有時唔係話出嚟搵錢大哂,返屋企見到老婆辛苦都要幫吓手嘛。
 
簡單少少講,就係男仔慢慢喺變做男人嘅階段,你已經俾生活夾到你得返好少生活空間。唔係你買唔起咩玩具,而係我哋買得起時,我哋已經唔需要呢啲玩具。就好似戀愛一樣,細細個時喺對嘅時間我哋遇唔上對嘅遊戲機,偏偏喺我哋成長有能力之後,喺錯嘅時間,我哋先有機會擁有佢哋。
 
所以我哋好鍾意遊戲機,因為呢種係永遠擦身而過嘅錯摸,永遠都係咁令人情有獨鐘,男人就係要一世人經歷咁多,就算係一部遊戲機,個天都要你玩得唔開心嘅……
 
薛可正Facebook Page
http://www.facebook.com/sithoching

COMMENT