2017/12/22

男人的Fantasy (一五八)《兒時聖誕》

2017_12_22_薛可正MenClub Column
 
網上資料圖片
 
我諗再過多幾年,到我個仔十幾歲,識得約朋友仔出街玩時,佢哋都唔會知道,原來以前嘅聖誕節係有燈飾睇。
 
當然,我相信再過多幾年,維港兩旁都仲會有零星嘅大廈,會有少少燈飾去應吓節,但比起我細個時嘅場面,我極其量只可以形容呢類叫「幾個燈膽」,有排都未到「燈飾」呢個程度。
 
時代會變我係最明白,當大部份嘅娛樂都搬入室內時,好多古舊嘅玩意,慢慢就好似變得不合時宜。但遺失一種習慣嘅同時,我哋都會遺失埋嗰份回憶同快樂。
 
「今晚去唔去睇燈飾?」
 
都唔知幾耐無聽過呢句說話,「睇燈飾」喺以前嚟講,直情就同新年去拜年一樣咁隆重。可能以前冬天特別凍,亦都可能以前嘅人情特別暖,一班朋友著住新大褸,約喺尖沙咀嘅海港城等,跟住由海防道經過金巴利道,一路行一路玩,沿途可能會有啲車入面嘅人會噴白泡,大家大叫一聲「Merry Christmas」之後就嘻嘻哈哈繼續行。
 
未去到噴水池,已經開始多人。我哋仲係學生,生得唔夠高,就會一個拖住一個以防走失。當年大家都未有call機,更加唔好話手提電話,所以走失咗係一件好麻煩嘅事。不過我哋好多時都會講定,如果唔見咗大家,我哋可以去邊度邊度搵返大家。
 
逼一晚,影咗好多相,一筒菲林三十二張,有時好彩會偷多一兩張。通常影夠兩三筒菲林,我哋就會走,一路行就一路傾,滿心期望曬出嚟嘅相會有咩效果。
 
到咗今日,我哋唔會聽到有朋友叫我哋睇燈飾,因為根本就已經剩低唔多;就算出去,我哋都唔會特別買件大褸去過聖誕,因為近幾年嘅聖誕,你只要著多少少衫都會熱到出汁。
 
街上面唔會再有人大叫「Merry Christmas」,除咗大量嘅普通話之外,間唔中仲會聽到啲非洲人喺度大叫;去到噴水池,人已經無以前咁多,我哋可以好自由咁行嚟行去。我哋唔會再走失,就算走失,只要喺WhatsApp group度問一句「喂你行x咗去邊呀?」你就會搵得返大家。
 
我哋唔會再買菲林去影相,我哋唔需要再珍而重之咁去影每一張相,因為我哋可以影好多好多張,一張唔靚就再影,再唔靚咪開App執到佢靚為止。
 
我哋好似咩都做到,但又好似咩都做唔到;我哋嘅娛樂好似快咗、易咗、順利咗,但同時又好似流水咁,好快就過去,無留低一點點嘅痕跡。
 
或者時代改變就有呢種副作用,如果可以試多次,我都想帶阿仔去感受下,成萬人喺海旁睇燈嗰一種無聊嘅浪漫。
 
薛可正Facebook Page
http://www.facebook.com/sithoching

COMMENT