2017/12/29

男人的Fantasy (一五八)《密碼鎖》

2017_12_29_薛可正MenClub Column
 
網上資料圖片
 
我哋由細到大,多數都係著傳統嘅大地牌或者係熊貓牌三角底褲,我哋細個就叫佢做「密碼鎖」,因為個橡筋褲頭度有啲英文字,好似啲特務去到個大夾萬前面要輸入嘅密碼咁,所以就叫密碼鎖。
 
密碼鎖基本上係一個貶義嚟,佢代表住男人喺底褲上面嘅缺失,細個一俾人發現著密碼鎖,塊面就會紅哂,仲紅過無著底褲。原因其實好簡單,第一當然係佢的確外觀係肉酸,顏色你可以話係白,但白色都有好多種,而密碼鎖嗰種白,係叫「慘白」。
 
呢種「慘白」未必係我哋阿媽最鍾意,但佢嘅價錢就係令一眾母親瘋狂入貨嘅原因。你見佢哋多數喺街邊啲車仔檔,大中細碼咁一次買哂俾你,你阿哥同你老豆,次次買親夠我哋著幾年就知佢哋有幾愛呢種時代嘅產物。但呢種慘白,唔係人人都接受到,佢最大鑊係好易黃,我唔係講條底褲某一個位黃,而係成條底褲都非常易黃。
 
其實你有冇留意到,當男仔年紀去到識得欣賞底褲嘅時候,就已經係佢哋開始溝女嘅時候。試諗吓,第一次同女性朋友約會,女性朋友唔小心跌咗支筆,你一烏低身幫佢執嗰時,就俾佢見到你條又黃又舊嘅底褲,幾咁情何以堪你話。
 
男人嘅成長印記,大多數都係有「脫離密碼鎖」呢個情景出現。慢慢你會好樂於見到佢地愈著愈爛;同一時間,你亦都會慢慢留意市面上有賣男裝底褲嘅舖頭,雖然你無佢哋廣告上面嗰個老外模特兒好似攝咗條毛巾落底褲入面咁嘅宏偉場面,但你都想試吓佢哋紅橙黃綠四隻唔同顏色嘅最新春夏秋冬系列。
 
直到你後來愈來愈唔聽阿媽話,你就開始有自己嘅底褲。跟住係女朋友幫你買底褲,你嘅底褲應有盡有,你亦慢慢唔記得,好多年前嗰個著密碼鎖嘅自己。然後去到某一日,你會喺櫃桶個角落頭,發現一條已經爛哂嘅底褲。你慢慢拎起佢,諗返你著住佢喺出面射波子,著住佢同朋友落街買宵夜,著住佢同阿哥兩個暑假時去游水但你無帶泳褲。
 
阿媽呢個時候會行過嚟,一手搶走你條底褲,然後同你講:「丫,明明上面拎哂去救世軍捐俾人啦,點解仲執剩一條嘅?聽日買餸時拎埋過去先。」然後你望住阿媽微笑,發現呢條「密碼鎖」可愛,但買佢返嚟嗰個阿媽,仲可愛。
 
薛可正Facebook Page
http://www.facebook.com/sithoching

COMMENT