2018/07/06

男人的Fantasy (一八五) 飲唔飲啤酒呀?

download-2
 
網上資料圖片
 
細個成日都聽到老豆同班朋友去食飯,但佢哋約食飯嘅對白,多數都係:「喂,飲唔飲啤酒呀今晚?」
 
我細個好鍾意飲維他奶,因為我鍾意甜味,一飲到甜嘢就覺得開心。我唔明白,點解有咁多人鍾意飲啤酒,又苦又多汽,一飲醉又辛苦又頂住個胃,無謂。
 
陪親老豆同佢哋飲酒,我都好鍾意留意呢班世叔伯嘅表情,每次佢哋飲到咁上下,個個面都紅哂時,都會開始流露住幾分酒意。佢哋會坐喺度,個咀一路唸唸有詞,但我點努力聽都唔會聽到佢哋講咩。有幾個醉咗又好鍾意同我講嘢,問我今年讀幾多年班,攬住我叫我俾心機讀書。
 
我老豆好得意,佢平時好嚴肅,但一飲醉就好幽默。某程度上我幾鍾意佢飲醉,因為咁我先可以見到佢幽默嘅一面。有幾個叔叔就唔會講嘢,坐喺度一味笑,塊面紅曬咁微微笑,我細個識嘅詞彙唔多,到大個咗之後,我可以好準確咁形容呢啲叫淫笑。
 
我人生入面有一段回憶,就係呢班飲到各有醜態嘅大叔。後來我先發現,我以為佢哋開心先飲酒,但原來唔一定。
 
到人大個咗,遇到好多起落,我有試過面對,都有試過逃避。逃避嘅時候,我發現任我去到邊一度,閂咗電話無人搵到我,但我個腦係閂唔到,煩惱都係會搵到我。
 
我諗人最絕望就係知道人生所有問題都需要自己去面對,所以點解我哋喜歡童年,因為童年有爸爸媽媽幫我去解決一切。直到我對眼前問題毫無抵抗,直到我對眼前困境舉手投降,直到我第一次因為飲醉酒而瞓街,我先知道,當年一班男人點解成日都要一齊飲酒。
 
醉酒會令人大膽,醉酒會令人忘憂,我覺得更重要係,醉酒會令人樂觀。想做就做,唔會理任何人嘅眼光,記憶力特別差,原來咁樣我個腦真係會好似電話咁關機,煩惱就自然搵唔到我。我可以搵到一息嘅安靜,我可以知道自己唔係絕望。
 
我曾經試過一次之後,好沉迷呢種解決方法。但後來慢慢發現,每次醉醒都要解決本來要解決嘅問題,要逃避嘅事最後都係逃唔到避唔甩。
 
但你依然會享受,只係已經唔敢過份,只可以搵一班相熟嘅朋友,耐唔耐問吓佢哋有冇時間:
 
「去飲陣啤酒啦。」
 
薛可正Facebook Page
http://www.facebook.com/sithoching

COMMENT