2018/08/24

男人的Fantasy (一九零)百態的演變

D1526538922962-1
 
網上資料圖片
 
成日流連好多朋友嘅FACEBOOK,暗中洞悉一吓其他人嘅人生,我好中意睇人哋討論,特別係FACEBOOK上面最容易起火嘅題目,例如係餵人奶、婆媳、第三者……有好多朋友表面睇嚟似係豁達無比,但實際係谷住度氣,只不過喺網絡公眾地方,唔好意思俾人見到自己撒賴,呢一種陰暗面係最好睇。
 
因為網絡太直接,以前我起身要鬧隔離屋一句,我都要起身落床行兩腳開門行過去拍佢門再等佢開門,我先可以兜口兜面講句:「我X你呀。」。但而家太方便,我起身拎起個電話,用WhatsApp已經可以用手指尾輕描淡寫咁打一句「DLLMH呀我」,幾直接,幾無成本,最重要係,你鬧佢嗰個電話號碼,可以係一個對方唔知嘅電話號碼,成件事係咪即時變得有趣而又興奮呀?因為無光嘅地方就會有黑暗,鬼ACCOUNT背後,就係各位嘅隱藏身份下嘅陰暗面,每一個人都會有。
 
所以我認為網絡令所有事快速同方便,但同時亦令大家變質。有冇留意FACEBOOK入面,最敢言嘅人有咩共同點呀?無錯呀,多數佢哋都唔會有自己嘅相,生活照都唔會有張。佢哋除咗鬧人之外,就係神來麻雀,又或者係食雞拎ITEMS嘅SHARE。世界恐怖嗎?就算幾恐怖都已經慢慢習慣,因為有呢一類唔需要俾人見到自己嘅遮掩,令到好多人嘅性格變質,自大、恐怖、自以為乜都唔怕。
 
最近我見到有一個藝人因為踢爆一個偷拍GROUP而被圍攻,我一路睇啲留言一路睇留言者嘅ACCOUNT,有好多幾年前打住黃色絲帶,大叫不公平反,然後而家叫女藝人死開,唔好阻住佢哋分享喺街偷拍返嚟相。
 
我一直以為呢種張狂只會埋喺心入面,又或者大奸大惡嘅人先敢公諸,但原來今日嘅世界,有好多人已經認為自己可以創造一啲風氣,可以整死人,可以伸張正義,可以侵犯人,更可以一人分飾,係咁輕而易舉嘅事。
 
對於每一個人嚟講,呢一種表達係快樂,因為隨意就攻擊自己唔中意嘅人,侵佔自己睇中嘅人,呢一種獸性係大家有諗過但唔敢做。但同時希望,冷靜過後,我哋都記得唔知喺邊一日,我哋知道乜嘢係唔公平,知道乜嘢係弱勢,知道乜嘢係被壓。
 
是他,也是你和我。
 
共勉之。
 
薛可正Facebook Page
http://www.facebook.com/sithoching

COMMENT