2018/08/31

男人的Fantasy (一九一)開學夢

images-1
 
網上資料圖片
 
前晚發咗一個夢,久久不散。起身之後,我坐喺床上面,一直回味,原來我哋曾經唔太享受嘅事,其實係咁美好。
 
「媽咪呀,我把間尺爛咗呀。」
 
我記得夢入面我第一句說話係咁開始嘅,講嘢嘅地方係我由細住到大嘅屋企,而我嘅身高,只係僅僅到我媽咪嘅膊頭。
 
係我小學時嘅情況。
 
跟住我用第一身嘅角度,跟住阿媽行出門口,唔知點解,一行出門口之後我哋就去到文具店,我記得仲好似聞到文具店入面嗰種獨有嘅味。我第一件事就係行去睇筆盒,嘩,神奇筆盒都仲有,正呀。
 
「買咁大個筆盒好重呀,用筆袋啦。」
 
我失望咁行開,然後見到放原字筆嘅一個角落。我見到好多唔同牌子嘅原子筆,我開始揀我最愛嘅牌子「啄木牌」,紅色、藍色、黑色……嗯,買埋綠色啦。
 
「你買綠色做咩?」
「咁……一套嘛……隻隻色都買…開心好多。」
「你上年已經買咗綠色,你有冇用過?唔洗錢呀?我從來唔知你哋啲細路買綠色筆做乜,係咪屋企幾百萬未開頭?」
 
「幾百萬未開頭」呢句說話,經常出現喺細個要求阿媽買嘢時出現,一聽到呢句說話我就知買唔成,所以揀完三支原子筆就算。
 
「包書膠呀仲有,你今年開始要自己包書呀吓。」我背住阿媽笑一笑,喺我哋世界入面,永遠都只有「阿媽幫我包」同埋「唔包」,我係唔會用咁多時間做一啲咁無聊嘅事,反正你保存得幾好,啲書都係讀一年,如果我無留級嘅話。
 
然後我一路經過間尺、擦膠、顏色筆仲有塗改液嘅區域,最後無比享受咁去到最後一個地方,書包。眼前嘅書包係令我心曠神怡,星矢、龍珠、筋肉人仲有北斗之拳圖案嘅同款書包,一字型咁放喺我眼前。阿媽隨手拎咗一個落嚟,好似買新屋咁睇佢入面嘅間隔,嗰種「新簇簇」嘅書包香味就好似係一個訊號咁,提醒你又就開學。喺呢個學期入面,你會遇到唔同嘅老師、同學、成績、環境仲有回憶。但放心,無論點都好,若干年之後,呢度所有嘅事都會係你懷念一生嘅珍寶,世界上原來唔係所有事都咁苦,你會記得現實生活入面係有美事。
 
我唔記得喺邊一個畫面我俾一個電話嘈醒,起身之後,我不斷回味,突然發現夢入面有一樣嘢係缺少咗。每年開學都好近中秋節,揀書包時都會有一大堆燈籠喺隔離俾你揀,點解夢入面會無咗?
 
係呀,我醒起喇,因為我細個都唔玩燈籠,多數都係煲蠟,犯法架,所以發夢都唔俾出現。
 
薛可正Facebook Page
http://www.facebook.com/sithoching

COMMENT