2013年07月10日

個案十四 前掌痛 二趾長過公 (Morton’s Toe)

個案十四 前掌痛 二趾長過公 (Morton’s Toe)
mortonstoe
引致前掌痛嘅病症有好多,先講一個常見嘅例子。好多人都會有二趾長過拇趾嘅情況,其實力學上會產生問題,容易引起前掌痛。

正確嚟講,其實唔係第二節腳趾長咗,而係拇趾對落嘅第一節蹠骨短咗。行路時當隻腳準備離開地面嘅時候,尾趾嘅蹠骨最短,所以最先離地。如此類推,最後離地嘅應該係腳趾公。腳趾公嘅骨頭比起二趾粗好多,仲有兩粒芝麻骨幫手負重,先天設計上就可以用嚟承受身體嘅重量。

可惜,如果二趾比起拇趾長嘅話,二趾嘅蹠骨就會成為最後離地嘅骨頭。呢條骨幼好多,又無芝麻骨幫手,如果長時間負重,就好容易起厚枕甚至發炎,形成痛症。

力學鞋墊其中一個配件,可以彌補拇趾蹠骨短咗嘅問題,令佢再次成為最後離地嘅骨頭,有效減輕二趾蹠骨嘅負擔,減輕痛楚。

 

sportalignment.com

Read More
2013年06月27日

七一揀鞋全攻略

七一揀鞋全攻略
shoes

七月一號應該係全年港人平均消耗卡路里最多嘅一日。運動固然有益(包括民間社會運動),但都要小心背後嘅風險。唔係講被人噴胡椒噴霧嘅風險,而係運動創傷嘅風險。特別係平時坐office無咩郁動嘅人士,一次過行六七個鐘好容易就會腳痛。所以本篇分享想講下應該揀對咩鞋去遊行。(留意唔係教你買對新鞋,著新鞋行咁耐會仲危險,應該喺鞋櫃入面揀對最似樣嘅。留意亦唔係講鞋墊功能,就算你即刻約我都趕唔切兩日就整好俾你。)

首先,七一天氣一定熱,但千祈唔好著涼鞋去。因為涼鞋穩定性好低,會令腳嘅肌肉好快攰,咁就好容易引起腳痛。最好揀對有鞋帶嘅鞋,無嘅話痴貼帶款都ok。

另外,唔好揀任何標榜赤足概念嘅鞋去行咁多個鐘。呢個連學生絕食都無動於衷嘅政府,係唔會為咗你著赤足鞋遊行呢種自殘行為而動容嘅,無謂攞苦嚟辛。

普通波鞋穩陣喇掛?但都要留意三點:堅硬嘅中底、堅固嘅後跟杯、同埋穩定嘅鞋底。如果對鞋底中間可以屈到圖中咁,就會令腳版底嘅筋膜扯到好恆,好易有足底筋膜炎。而鞋底太軟(例如全氣墊),會令每一步落地都好唔穩陣,加重咗足踝關節周邊肌肉(例如脛後肌、腓腸肌等)嘅負擔,容易引起筋腱炎。

最後,出門口前要重新挷一次鞋帶,唔好就咁穿隻腳入去就算。鞋帶挷得好會令出水泡嘅機會減低,亦會無咁易攰。咁就無藉口俾自己中途退出啦。

記住,量力而為,飲多d水。
七一見。

原文: http://goo.gl/NQSA0

Read More
2013年06月25日

矯形師推薦的好鞋(1) -ASICS KAYANO SERIES

550451_402068726505224_1919402461_n

經常有病人問我:「造咗鞋墊係唔係咩鞋都擺得架?」其實鞋墊同鞋嘅關係,好比眼鏡鏡片同鏡框一樣。鏡片雖然係矯正視力嘅主要部份,但都要配合適合嘅鏡框先會發揮得到功能。如果揀唔啱一對好嘅鞋,鞋墊都唔會發揮到最好。

要揀一對好嘅跑鞋,首先要了解唔同跑姿嘅分別。跑步可以分為腳踭落地、中掌落地同前掌落地幾種。而大部份人都係用腳踭落地,所以先推薦設計俾腳踭落地嘅跑鞋。

Asics 嘅 Kayano 系列一直係我No.1選擇。佢各方面嘅設計都好適合腳踭跑步、甚至長時間行路。

首先要解釋下跑步既姿勢同行路有咩唔同。我地行路會有好多時間雙腳同時著地,所以雙腳嘅距離會比較遠。相反跑步只有一隻腳著地,跑步著地既腳會喺身體既重心下面,令我地唔會左搖右擺。但係咁會令我地隻腳同地面形成一個較大嘅夾角,喺好短既時間之內隻腳需要踩平喺地面,呢個急促既動作叫做足外翻,好易會令附近既肌肉過份拉扯或者受傷。

而asics嘅好處係,佢鞋爭嘅內側係厚過外側少少,而且內側嘅硬度仲要高d。當腳踭落地時會擠壓外側較軟嘅物料,令內外側厚度相差所形成嘅角度更大。呢個角度就正正彌補到跑步時腳踭著地嘅角度,令隻腳唔需要向入扭得咁多同咁急,從而減少足外翻嘅幅度,減輕肌肉筋骨既拉扯。

另一方面,鞋既基本結構都好緊要。Asics嘅鞋全線都有:
1)堅硬嘅後幫
2)抗扭動同摺曲嘅中底
咁嘅設計對於行路、跑步定打波都更能夠穩定雙腳,減少雙腳肌肉嘅負擔。

當然,如果本身足部有過多足外翻嘅話,就需要配合力學鞋墊先可以避免勞損,長跑長有。

P.S. 各位如果對任何鞋款想知多一D嘅話,歡迎講低對鞋嘅牌子同埋型號,我會另文分析。

Read More
2013年06月08日

個案十三 小腿痛(脛前疼痛)

shin splint

個案十三 小腿痛(脛前疼痛)

W小姐係一名業餘跑手,每星期都會有三至四課嘅訓練。近兩三個月,佢發現當跑到二十公里左右時,左腳上五吋下五吋對落嘅位置會出現冤痛。休息一晚過後痛楚會無咗,但係禁落去都會有少少冤。當佢睇過我另一篇教揀鞋嘅分享之後,就決定搵我做檢查。

檢查發現W小姐嘅小腿呈現明顯內彎。小腿骨正常都會呈現輕微內彎,但若果內彎角度過大,足底於著地時需要作出補償,引致更大角度嘅足外翻,出現補償性扁平足。

補償性扁平足會帶動小腿骨向內旋轉,依附住小腿骨嘅筋膜會受到拉扯,引致發炎。特別係跑步時足外翻動作進行得更加急劇,加快內旋速度,令拉扯力道更大,更容易引致受傷。

小腿內彎好多時會被誤認為o形腳,其實兩者係有分別。o形腳係大腿同小腿之間嘅角度偏歪,而小腿內彎係小腿骨成長變形。兩者雖然都會引致補償性扁平足,但係鞋墊需要唔同嘅設計去處理。

力學鞋墊處理呢個病症嘅原理係減低足外翻嘅幅度同速度。鞋墊由腳踭開始至足弓位置均有效承托足部,由著地一刻開始控制,減少足部因小腿內彎而作出補償性扁平足嘅需要,從而減少小腿筋膜拉扯受傷機會。

想知道自己有無潛在風險?試下搵手指摸住上五吋下五吋嘅內側,順住小腿骨同小腿後肌之間嘅空隙禁落去,腳眼對上三至四吋會係最常出現痛症嘅地方。如果有嘅話,就要考慮下做力學檢查,搵出原因。

預防勝於治療。

 

sportalignment.com

Read More
2013年06月08日

個案十二 腳踭痛=足底筋膜炎/骨刺???

382417_573014026077359_1276824940_n

個案十二 腳踭痛=足底筋膜炎/骨刺???

L小姐於一年前被診斷為足底筋膜炎,盡行過藥物治療,物理治療,衝擊波治療後,情況仍然無好轉。又試過睇中醫跌打,照完X光話佢有骨刺,敷左D藥就無再跟進。佢早已經對病情心灰意冷,最後經朋友遊說下,搵我檢查睇下力學鞋墊幫唔幫到手。

當我檢查痛楚位置,發現痛點處於腳踭正中間,甚至偏外側位置,同足底筋膜發炎嘅位置有分別。加上早上嘅痛楚並無因為行順咗而消減,痛症亦無伸展至足弓。種種跡象顯示,李小姐嘅情況好可能唔係足底筋膜炎,而係足底滑囊炎。

對於大部份醫生或者治療師,兩者並唔需要區分,因為治療嘅方法都係消炎。但力學上面兩者嘅成因係有d分別。所以透過改善下肢力學醫治痛症嘅鞋墊,處理兩種症狀時,需要清楚背後嘅成因,先可以對症下藥。

至於骨刺,其實只係骨頭適應身體活動嘅增生。好多唔痛嘅人照X光都會搵到足底骨刺,所以骨刺未必係痛症嘅原因。

鞋墊設計嘅要點,係腳踭卸力同埋足弓承托嘅平衡。鞋墊唔可以太硬亦唔可以太軟。太軟的話,下陷嘅足弓會拉緊足底筋膜,刺激附近嘅足底滑囊。

當佢第一次著上鞋墊嘅時候,痛症已經明顯減少。原因係足底壓力卸減之餘,足弓位嘅拉扯亦減輕咗。比起穿著矽膠軟墊,更加有效減少足底滑囊嘅刺激。

 

sportalignment.com

Read More