2020/01/19

1星期前的星期日

AppleStore

 

- 1星期前的星期日 (2020年1月12日) 舒一口氣 -

Facebook Page: @drivingtour http://www.facebook.com/drivingtour

IG: eddiemartintsang

 

一早起身去民進黨總部購買小英官方產品,買到選舉打氣tee、英粉禮包、月曆及限量優悠卡。係台灣買嘢唔駛急,我預左要排長龍,但原來大家等開門之後先嚟,我走嘅時候都係廿零人排緊隊。

 

更多照片:台灣總統大選翌日

https://www.facebook.com/pg/drivingtour/photos/?tab=album&album_id=2990302350981414

 

跟住去體驗下台灣嘅快速剪髮服務先,「請坐 Hair Cut」只要100台幣﹝約25蚊港幣﹞就OK而且剪完有得沖水吹頭。反觀台北QB收取300台幣,而且無得沖水吹頭。如果「請坐 Hair Cut」或「Dna 百元剪髮」嚟香港,唔知香港嘅QB頂唔頂得住。

 

去「瞞著爹」食午餐,係忠孝敦化站行或者忠孝復興站落車都得,因為兩個站之間有一條東區地下街連接。「瞞著爹」係好多香港人至愛,所以我今次嚟到台北點都要去試下。店舖規矩,齊人就係門口點菜同比錢,跟住先入去坐低等開餐。食左個魚生海鮮飯同埋蝦頭湯,感覺好滿足好正!但如果想食佢個雙層海鮮飯,最好叫多幾個人一齊嚟。

 

下午去到遠東百貨信義A13,因為呢度4樓嘅美食廣場同14樓嘅Hooters都係近期人氣之選,我去check一check睇下值唔值得去。遠東百貨係Apples Store對面,地下有電梯直上4樓食嘢,企係電梯就唔好玩電話,因為要枱高頭向上望,整個充滿設計特色嘅美食廣場,會出現係眼前。間間店舖都好多人排隊,最後我去左「思鄉病」食牛肉麵,碗麵叫「夜夜失眠症」。

 

食完就行下呢個商場,一路轉上去14樓嘅Hooters。呢間Hooters賣點係坐露天位置可以近距離睇台北101,對住個無敵夜境飲酒食嘢。我入到餐廳,表明要坐露天區域,女侍應話我知有最底收費,每位350台幣。其實一啲都唔貴,因為叫一個餐加一杯啤酒,已經超過最底收費。呢個view的確係正,不過如果我係有女伴一齊嚟嘅話,感覺會更浪漫。

 

而家台北101不再孤單,旁邊有南山廣場一齊。點睇都覺得台北呢兩座摩天大廈嘅設計,又靚又有型過香港嗰兩支香﹝IFC及ICC﹞。

 

整個信義區真係好大,由多個商場組成,集消閒、睇戲、購物、飲食、娛樂。真係可以玩幾日幾夜,都未必夠。

行到攰去咗信義威秀影城睇「白頭山-半島浩劫」

 

最最後去埋24小時家樂福買台灣製造嘅零食就要準備離開民主自由嘅台灣啦!

 

多謝長榮航空工作人員安排,我支結他平安到達香港。

呢次係我第一次去旅行唔帶單反機,全部照片由Iphone 11 PRO MAX 拍攝。

COMMENT