2019年08月16日

你係咪天生做唔到生意嘅人?

2019_08_16_GIGI menclub
 
網上資料圖片
 
話說我好憎一個香港嘅風氣,就係咩都炒炒炒,炒樓價、炒iPhone、炒演唱會飛呀咁,明知香港生活唔容易,某啲人都係要抬高價錢,驚死你哋唔死得,住屋呢類生活必需品都貴到呀媽都唔認得。
&nbsp
其實我真係唔係好明呢種靠炒賣抬高到個價離晒地嘅行為,所以我絕對唔適合做商人,又或者靠呢類行為搵食嘅人。可能我買嘢係幾慳嘅人,出外幫朋友買我連退稅都會計返俾人,因為大家都想慳,就算慳嘅唔係我嘅錢我都會開心。
 
你哋唔好以為,幫人去歐洲買名牌嘢個個都咁好死,又要幫你拎住咁大盒嘢四圍去,又要幫你去唔同門市搵,好多人退稅嗰部分都唔會要對方一定計到咁足。但我就會連埋稅計埋個價錢,大家買嘢都係想平,做朋友當然係幫到咪幫。
 
大把人話我傻,因為拎餐死,錢又無得賺,但我覺得,我都想人哋咁幫我,大家搵錢都辛苦呀!慳到咪慳囉。不過有時叫人買嘢都好難開口問個稅可唔可以退完再計,所以真係好好朋友嘅人先會互相幫忙。
 
而好多人都會講明稅嗰度唔會計返,咁講清楚咗,買唔買最後自己話事都ok嘅!如果買到幾萬銀個袋,個稅都4-5千,唔退返稅真係差好遠,所以搵到一個願意幫你拎到死死吓,去唔同門市搵袋嘅朋友,又唔計較同你慳到足嘅人,真係要好好珍惜。
 
當然對朋友咁好無問題,但我對唔太熟嘅朋友,要賣嘢俾人我都唔會開高價,原因係我太了解大家都想慳,慳得嚟又想好質素係正常,太企人哋個角度,心理上必定唔能夠定一個高價錢,我係做唔到生意嘅人,真係唔係生意人才。試過有次演唱會買咗飛但要出外,都係原價+車費賣出,其他人最少加300,我都廢事賺。
 
當然我唔係水魚,喺我身上想拎著數都唔洗旨意,最憎人想昆我(刻意抬到非合理價),不過算啦,或者做人真係要自私先有幸福嘅!所以我仲係咁鬼窮囉!哈哈!
 
羅碧芝 Facebook Page
www.fb.com/gigilawpg
IG: gigilaw1113

Read More
2019年08月09日

幸福的定義

2019_08_09_gigi menclub
 
網上資料圖片
 
幸福係咩呢?你覺得人哋好幸福,人哋又覺得你好幸福,咁究竟你睇人好,人睇你好,定係你放大咗人哋擁有嘅嘢,而自己明明擁有嘅幸福,唔識得珍惜呢?
 
身在福中不知福嘅人,真無好多,好多男士覺得身邊個女人唔明,例如佢會成日聽到:「人哋啲男朋友呀,你睇吓幾好!佢呀!會成日接個女朋友放工㗎!」「人哋男朋友成日都買禮物送俾佢,次次都放上網幾威呀!」「呀may就好啦!佢男朋友又同佢去歐洲啦!」
 
其實好多人都唔明白,表面一個樣,背面一個樣,大把男人對個女朋友好好,但係佢哋其實都唔只一個女朋友,咁究竟,如果知道背後嘅真相,仲會唔會去妒忌人哋有個好似好好嘅男朋友呢?
 
而事實上,真係見好多愈唔識口花花,愈唔識氹女仔嘅男人,真係無咩出軌嘅行徑,首先,佢真係唔識,唔識點去四圍撩。第二,佢無呢種心機,連自己女朋友都唔氹,邊有咁好興致去氹其他女人。
 
呢類呆呆型男友,最大好處係佢嗜好唔多,唔洗擔心佢四圍去!可能最多都係留喺屋企打吓機,得閒同朋友釣吓魚,最多會陪你行吓街,做吓跟得男友,問佢件衫靚唔靚佢都好似唔識答,求求其其答靚就算。
 
可能女仔會覺得呢類男友好悶,但起碼唔洗驚佢講大話走咗出去溝女,更加唔洗擔心佢扮瞓著唔聽你電話,因為佢只係會直腸直肚話你知佢想打機瞓覺食飯睇戲。
 
講真,見好多呢類男仔到結婚,就會成熟,當佢認定你,佢就會思考點為你安排一個難忘婚禮,會逐步去諗點搞一個婚禮,唯一條件,佢認定你。
 
男仔係會長大,係會成熟,睇吓佢認唔認真對你,或者好多女仔最後等唔到,但其實有耐性係會等到嘅,睇下佢幾時想囉!佢想,就會俾幸福你,到時,你會擁有屬於自己嘅幸福,而唔洗再羨慕人啦!
 
羅碧芝 Facebook Page
www.fb.com/gigilawpg
IG: gigilaw1113

Read More
2019年08月03日

農曆七月嚟啦!唔好玩水!

P8160209
網上資料圖片
 
嗚,又到鬼節月,我一向都自我迷信,但唔鼓催呢樣嘢!但次次農曆七月都發現好多人玩水會遇到意外,當然啦!我哋農曆七月即係暑假,好多人暑假期間去玩水都好正常,多人玩水自然會多意外。
 
因為而家去玩水嘅人已經唔係去泳池或海灘咁簡單,有好多選擇去溪間,甚至上山玩瀑布!其實行山本應好健康,不嬲都話欺山莫欺水,但行到最高然後玩跳瀑布咁危險嘅玩意!真係唔好試呀!
 
曾經就聽過有朋友去石澗玩,見好多外國人玩跳瀑布,佢又唔執輸,人跳佢又跳,未洗跳落去,爬到一半就跌鬼咗落嚟!攪到又要飛行服務隊同消防拯救佢,最後斷咗前臂其中一條骨,要屋企人同朋友擔心到死!真係嚇鬼死人!
 
玩水講真就唔係農歷七月先要小心,任何時候都危險性高就一定,但玩之前有無諗清楚後果呢?我發現好多人都跟風,人玩佢又玩!人做佢又做,明知危險都覺得不幸唔會發生自己身上!
 
但偏偏覺得無危險最放鬆嘅時候,就會樂極生悲,斷手斷腳事少,無咗條命你話點算呢?呀媽生到你咁大,有手有腳大個仔女要照顧自己,無人期望睇到自己仔女有意外發生,所以出發去做呢類咁危險嘅玩意前,真係要諗清楚呀!
 
好多嘢,一世㗎,衰咗就無㗎啦,如果身邊有朋友叫你去玩危險嘢!你要記住,你嘅前途只屬於你,其他人唔包你無意外,唔會為你嘅不幸埋單,萬事小心,行動前諗清楚呀!
 
羅碧芝 Facebook Page
www.fb.com/gigilawpg
IG: gigilaw1113

Read More
2019年07月27日

你有無玩過狼人殺?

images-1
 
網上資料圖片
 
而家台灣好興一個board game叫狼人殺,又名天黑請閉眼,都興咗兩年啦!其實細細個都會用啤牌同朋友玩killer,類似嘅玩法,一人抽一張紙牌,附上一個角色,其他人唔會知你係忠定奸,閉眼後開始用自己角色去殺人,忠嘅角色有救人或查驗其他人身分嘅能力,只要其中一邊陣營角色死晒,嗰邊就會輸。
 
上YouTube打狼人殺你可睇到好台灣嘅錄影節目,都玩得幾高深,未玩過如果睇會有點悶,但玩過後就可以留意到每個嘉賓要出盡力去講大話做戲或說服人時嘅變化。
 
我發現,呢個遊戲某程度上都幾邪惡,如果有人唔太善於講大話,就算識得估到人哋角色都保護唔到自己,好快被殺死,係好考智慧同做戲嘅細胞,當然你可透過你嘅「道理」去說服人,滿口道理又未必真,有人講真理又可能表達得唔好又被當廢話。
 
現實社會其實同呢個遊戲好相似,其實你內心想法同你表達出嚟可能根本唔一樣,你以為係盟友,但點知係敵人,為咗利益,人類係會計算,然後會有行動。
 
不過可能我玩遊戲從來都係為咗輕鬆,工作時同玩遊戲嘅態度會分別好大,所以往往要玩呢類遊戲時都係搞笑多,激死其他好認真玩嘅隊友,真係唔好意思,哈哈!
 
至於呢個遊戲會唔會喺香港興起,我相信都會吸引到一定數量嘅玩家加入,當中鬥志鬥力,亦有好多玩法係真係好有趣,香港人好多比較直率,喜怒形於色,其實玩呢個遊戲訓練吓隱藏真實想法,可能會對做人處事有幫助都唔定。
 
羅碧芝 Facebook Page
www.fb.com/gigilawpg
IG: gigilaw1113

Read More
2019年07月19日

細細個最鍾意睇嘅奧運項目

LEE LAI SHAN
 
網上資料圖片
 
話說身邊嘅朋友開始組團,下年東京奧運會,咁接近香港,自2008嗰時北京奧運後,都相隔12年再喺亞洲舉辦,大家咁鍾意去日本,一定唔會放過啦!不過呢一期唔係教大家點買飛做義工,因為網上都有好多資料。
 
而係想同大家分享一下,細細個坐喺電視前面,最鍾意睇嘅項目!細個睇奧運真係好開心,會煲晒個節目表,睇住班主持將個咪喺畫面前傳來傳去,突然又會公佈下金牌數字,好記得珊珊零的突破,佢嗰句:「香港嘅運動員唔係垃圾!」真係令好鍾意運動嘅我,對運動充滿無限美好幻想!
 
細個講真邊識睇滑浪風帆,點計分點樣比賽又唔識,淨係睇到珊珊一身古銅式嘅皮膚,加上結實嘅肌肉,只係覺得好勁!同好多人一樣,我最鍾意睇體操同跳水比賽,睇到好靈活嘅人,做出一連串正常人做唔到嘅動作,不停睇到哇哇聲!
 
人大咗,每次即將面對緊張嘅比賽、面試或訪問,都會睇一段自由體操嘅片,小小年紀嘅選手,奧運咁大個舞台都無失誤,做人就係鬥少失誤,點解咁小年紀都表現得咁好,人愈大更應該愈淡定先係。
 
呢個方法好鼓勵到我對抗緊張,點解人哋得,你唔得?只要練習練得多,每個人都可以呈現最好表現嘅8-9成,而成功嘅人,係直情超水準咁演出。
 
下年奧運真係令人好期待,大家會唔會買飛去睇呀?又會有咩心水項目想睇呢?
 
羅碧芝 Facebook Page
www.fb.com/gigilawpg
IG: gigilaw1113

Read More