2019年06月07日

瞓著咗嘅歐聯決賽夜

_2019060208143638747
 
網上資料圖片
 
話說利記對熱刺嚟講,未踢之前係人都會覺得睇英超時都會認為利記高少少,成班朋友入面都無乜兩隊粉絲,純粹欣賞決賽,總知想睇緊張刺激嘅賽事就ok啦!
 
雖然有人話兩隊都英超球隊戲碼無咁正,但可能我真係好鍾意睇英超,我又無太大感覺,點知一開波第一分鐘熱刺就發生低級錯誤,輸球12碼,真係全班fr都嬲到著火,咁就一比零,點先?
 
然後上半場兩隊又亂過亂世佳人,無組織,亂踢,高波亂清,完全係英超仲好睇呀吓!咁我哋都理解歐聯決賽係緊張嘅!但都唔好成個半場都唔知做緊乜呀!
 
好啦,睇完個半場開始眼瞓啦!都估到熱刺開始會禁制,下半場隻眼皮重到真係好辛苦,好彩趕得到最尾十五分鐘起身睇到利記個龍艾利臣狂救險球,雖然有人話利記泊大巴贏唔光彩,但我覺得人哋唔通唔守俾你攻呀?一個反擊就二比零啦!咁先好睇啊嘛!
 
當然我都明,邊隊贏都會有人講呢樣嗰樣,但其實利記贏都真係無乜爭議啊,我非利迷都覺得「利記拎冠軍好合理」,我求睇好波,最後睇到十幾分鐘都收貨。
 
我估未入第二球前,兩隊球迷都應該練緊大心臟,究竟會追返一比一加時定點呢?哈哈,足球就係咁正!但唔知係咪上半場太悶,定抑或太早起身返工,真係頂唔順瞓咗幾嘢!不過呢排半夜睇歐洲國家聯賽都唔係幾頂到,係咪因爲年紀大呢!omg,應該係日抖訓練太攰,無事嘅!我未老!應該係……..除非唔係…..
 
羅碧芝 Facebook Page
www.fb.com/gigilawpg
IG: gigilaw1113

Read More
2019年05月31日

你有無成日都好嬲自己?

Angry-hand-bursting-out-of-wall
 
網上資料圖片
 
大頭蝦嘅處理方法嚟講,唔知男人同女人嘅分別大唔大?首先,對於做咗戇居嘢嘅定義真係要舉少少例子。
 
例子1)落好大雨拎咗把靚遮出街用,食完餐飯見無雨就唔記得拎而漏咗喺餐廳,到再落雨時先記返起,把遮已漏低咗喺唔知邊度又拎唔返!本身有遮用好威威,而家勁大雨無遮收工真係咪話唔燥!
 
例子2)掛住玩手機搞到落錯車,大家都知地鐵有時唔係話你下個站落車過對面線就搞得掂,趕時間又要行嚟行去,香港人爭少少時間就係少少,大家都趕住去死咁嘅狀態,落錯車真係會好嬲自己!
 
例子3)工作上嘅失魂,大家都好努力做嘢!但百忙中有錯,少少錯上司唔發現咪自己搞返掂去,萬一發現唔出聲鬧你話你都仲未太難受!但一旦發生大錯,唔係因實力上嘅問題,而係大頭蝦嘅原因,發現呢個錯係新仔都唔會犯,但發生你身上,呢單嘢真係怨天怨地怨自己都無用!
 
其實我留意到好多女士們包括我,對錯誤嘅執著程度都幾高,人哋犯錯會好嬲,自己犯錯會更癲!會即時跌落抑鬱嘅狀態,不停咁諗做乜會咁?咁當然大家都會即時解決問題,但事後好多女人依舊會好在意。
 
至於男士,佢哋會即時解決問題,會用「無辦法!唔錯都錯咗!」盡力善後之後佢哋嘅情緒好似唔會表露太明顯去埋怨自己,佢哋好快就可以重新投入新嘅task,唔見遮呀?買過囉!
 
我好羨慕男人嗰種拎得起放得低嘅態度,但有時又好嬲佢哋做錯事無羞恥心咁!當然唔係所有男女做法一樣,女人學識大方大度係一門學問!男人學懂小心謹慎細緻亦係藝術。做到嘅咪比起普通人優秀,就係咁簡單。
 
自問都真係未做到好多成熟處理情緒嘅狀況,或者都係要再經歷更多先會變到一個行出嚟外表望落處變不驚嗰種淡定態度。男同女都一樣,有一種層次係行出嚟你已覺得對方特別唔同,期待自己有一日可以變成一個咁樣嘅人!
 
羅碧芝 Facebook Page
www.fb.com/gigilawpg
IG: gigilaw1113

Read More
2019年05月24日

有無玩過邪惡嘅砂炮?

20300544121348148610909969472_s
 
網上資料圖片
 
上星期問大家懷唔懷念ICQ同MSN,好明顯原來呢度有好多80後啦!其實寫篇文出來唔係想迎合人,純粹當我係一個八掛婆鍾意搵大家傾吓計咁,搵到知音人嗰種興奮,你又明唔明?
 
今次我又想問大家仲記唔記得好細個嗰時玩過嘅一種小玩意!就係「砂炮」啦!!!!以下內容極度邪惡,唔好告我唔該!
 
砂炮通常兩至三蚊一盒,新年同中秋節喺文具店或街市有得賣,細個係呀媽買俾我哋落街玩嘅!講明試吓喺屋企玩一粒就以後唔俾玩!細細個梗係驚啦,得幾歲人仔!唔俾屋企玩咪掉落街囉!嗰時住9樓之嘛,睇住粒砂炮由9樓飛落商場天台(都好彩無人嘅!),過一陣就會「砰」一聲,好過癮啊!
 
當然最後俾老母發現打到豬頭咁啦!我長大後終於知道,點解砂炮會被禁玩,因為同班fr子講起,邪惡嘅細路,又點止我一個?
 
有個fr話,砂炮要好玩,唔係掉落地!係掉落人地背脊!我聽到之後覺得佢好大膽!掉落人地個背脊,好離譜啊!但佢話佢只會掉厚肉,唔會嬲嘅肥仔身上,聽完佢講,其實細路嘅天真無邪,同邪惡魔鬼只差一線。問佢個肥仔咩反應?佢話都係掉過一兩粒,件白色Tee當堂燶咗,俾肥仔打咗鑊,無咩特別,到而家都仲好fr!
 
聽完之後,再一次明白,點解香港無砂炮玩?錯啦!更更更離譜嘅case只會愈聽愈多,另一個fr又話,專用砂炮掉人哋嘅貴車!what!!我大個咗開始揸車,聽到呢個個案分享,不禁覺得香港禁玩砂炮係禁得好好!痴線,無啦啦架車花咗都想喊,仲話成粒砂炮咁飛埋來!你我心目中同原子彈無分別囉!
 
砂炮本身,其實一啲都唔邪惡,邪惡嘅係,你會發現少少年紀嘅自己,諗返起都覺得細個嘅自己好鬼百厭,都唔明老豆老母點養大我,有同感嗎?
 
羅碧芝 Facebook Page
www.fb.com/gigilawpg
IG: gigilaw1113

Read More
2019年05月17日

你懷唔懷念ICQ同MSN年代?

images-1
 
網上資料圖片
 
有無人記得細細個拎住電話講足一晚通宵嘅日子?以前無手提電話,大概小四小五識打電話比同學(好明顯我係80後啦),通常一間屋都有兩至三個電話,客廳一個,爸媽房有一個,我就好巴閉嘅!因為有家姐同房,所以我哋房都有一個,個有線電話放床邊,瞓唔著唔洗搵呀爸呀媽㗎啦,梗係打比同學仔傾計啦!
 
其實無嘢傾㗎,拎住個電話有人陪咁解,呢種情況斷斷續續去到中三都仲會咁做,而對象當然有男同學啦!
 
回想返呢個有線電話年代,未有電腦出現時,我發現大家都願意講好多嘢,我好記得中五起有大牛龜電腦,我老豆又唔執輸買部原廠貴嘢俾我,「用電話傾心事」嘅年代正式終結。
 
ICQ已進駐每個少年嘅青蔥歲月,除咗日日放學返去部住邊個心儀男同學會上網外,搵資料聽歌搵歌詞都輕而易舉。然後慢慢唔再聽到「喔噢」聲,大家又轉場玩,讀大專時更會寫網上日記,咩xanga同hkflash必備。
 
呢段日子部大牛龜電腦都功不可沒,懷唔懷念舊屎?歲月囉,相信大家而家用WhatsApp做即時通訊都好方便,更加玩到出神入化,又視像呀,又7分鐘內刪信息咁呀!係幾好玩嘅!
 
不過而家已經唔多會講電話囉!大家手機月費要續約時,最關心已經唔係十五六年前有幾多分鐘通話,而係有幾多GB上網數據,最好無限數據就任上唔嬲。有無人得閒會睇吓自己講電話嘅通話記錄?每個月過唔過100分鐘?有3500分鐘喺手嘅你,用得幾十分鐘,聽吓銀行同美容廣告。
 
嗱!我唔係叫你要檢討有無打電話俾父母傾吓計關心吓佢呀!因為我打俾佢哋,佢哋都唔想同我傾,嫌我阻住佢哋去唱K!
 
唔知將來廿年後,WhatsApp會唔會同ICQ或MSN一樣,變成歷史,相信都會,好期待又一個時代終結時,到時我哋五六十歲個社會又變成點?而家日日WhatsApp同班極口臭嘅fr互相取笑互鬧,感覺好接近,將來老咗仲會唔會聯絡呢?
 
羅碧芝 Facebook Page
www.fb.com/gigilawpg
IG: gigilaw1113

Read More
2019年05月10日

娶到老婆,tag佢入嚟啦!

article-57e33ce19a696
 
網上資料圖片
 
話咁快母親節啦!每個人都一定有呀媽先出到世,對自己呀媽好應該啦!當然,有句說話係「天下無不是之父母」我係完全唔buy嘅!唔係人人都有好父母,有人生咗出來因為自私完全唔照顧小朋友,或者用極強手法將自己未能完成嘅欲望,迫小朋友去完夢呢類人,我係好睇唔過眼!
 
講返正題,除咗自己呀媽之外呢!已婚及有小朋友嘅你,身邊嗰位都唔可以忽略嘅!老公襟撈日,你懂的!
 
點先為之娶到好老婆,喺我心目中,生仔從來應該係兩個人有共識咁有結論去實踐而成嘅一件事,生小朋友過程係極辛苦,呢點女士生之前唔可以抱住為男人犧牲嘅態度生BB,否則會好痛苦乜都埋怨。理應抱住預咗會痛,預咗會辛苦嘅感受去處理,即係每人角色唔同,世上只能夠女人生仔,無辦法,如果你身邊嘅老婆接受到呢一點,明白角色係各有不同,唔係吓吓一嘈就好似生個仔出嚟係幫你生,你欠咗佢呢!呢個絕對係好女人好老婆!因為佢明白一件事要成功無分你我,無計較付出多少,佢愛你佢願意接受嗰種十級痛,接受完後唔會將負能量加喺你身上覺得你有責任,覺得係你害咗佢。
 
老實講,生仔最終決定權從來係生嗰個身上,每個人都可以有自己嘅權利,成日好老土聽到有女人講「幫你生幫你生」然後好少事就要嘈到翻天覆地,如果無諗清楚就生小朋友,之後日日負能量,咁人生為乜?
 
所以,如果你有個成熟度夠嘅老婆,真心恭喜你!佢除咗唔會怨生仔為你捱痛,佢仲持家有道,對於屋企事可以處理得井井有條,例如佢會好注重屋企衛生啦(即係會執屋清潔無怨言)你同小朋友食嘅嘢佢盡量都照顧到,然後你工作上唔如意佢又會聽吓你講。講真,娶老婆唔係娶工人,佢真係愛你先會同你一齊建立一個屋企,而日子耐咗,愛呢家嘢相向,都出於你點對佢。
 
重點,所以呢!如果你睇到呢到,諗深一層其實你老婆真係幾好,得閒多啲錫佢,俾多啲愛佢,其實大人都好需要愛,唔好淨係愛小朋友,就母親節送份禮物俾老婆啦!tag佢入來表揚下佢啦!女人係好攰嘅動物,你嘅溫柔係最好嘅充電器!
 
羅碧芝 Facebook Page
www.fb.com/gigilawpg
IG: gigilaw1113

Read More