2019年09月14日

《主動去成長》

download-3
 
網上資料圖片
 
成長嘅過程中,如果你有發現一件事,係確切認真感受到呢樣嘢,證明你喺成長過程入面,開始真正長大。就係你終於明白「世上係有好多唔同性格嘅人,而你亦明白唔同人嘅個性,開始真正企喺人哋嘅角度出發。」
 
好多人會覺得自己一直以來做到以上嘅條件,其實不然,因為,呢樣嘢係你自己覺得,唔係人哋把口話返俾你知,或者有人呢一世都做唔到以上嘅行為,因為佢從來都覺得唔洗為任何人改變,其實一個人嘅品格,並唔係要為任何人改變,而係如何令人感覺同你相處舒服,先係一個大嘅學問。
 
一個人生嘅高度,在於佢對人嘅態度,並非要討好任何人,但做人想成功,多方面嘅配合同一個人願唔願意聆聽,再用一個舒服嘅方式表達都好重要。認識嘅人入面包括過往嘅我自己,一直以來心口掛住個「直」字,率直、坦白,唔隱藏自己內心想法,即成日放喺口邊:「我有嗰句講嗰句!」「我個人係咁!」「我唔想講大話囉!」呢類免死金牌,就可以咩都講出口唔洗理人感受,點知人生一路行嘅時候,就會慢慢發現朋友慢慢會流失。
 
多數呢類人只會向身邊親朋好友先會特別直接,但對屋企人同好朋友唔係先應該最照顧佢哋感受先咩?當然每個人成長都必需要經歷變化,人格先會有所提升,例如身邊有人過身等等,往往會令人反省。當發現好多嘢,俾你贏咗把口,贏咗場交,贏咗氣勢又點?你真係開心咩?
 
有咩重要得過有人愛你,而你識珍惜同欣賞對方嘅好,呢個愛唔止男女朋友間嘅愛情,親情友情同樣可以令心靈好滿足。
 
最近香港發生太多事太亂,好好珍惜體諒你,愛你嘅人,無論心情再差再壞,對最珍惜嘅人,唔係應該用愛去同對方相處咩?就算生活上意見唔同,你有能力去企對方角度出發,唔好一味要人諗你、以你為世界中心,試吓由自身改變一下思考方向,諗吓人哋內心嘅想法,即使對方唔改變,但你願意嘗試為對方諗,人哋知道,都會慢慢又諗返你嘅角度,始終要有人行出第一步,做人何必太計較,只要有一少步,好多唔如意嘅事都會慢慢有進步。
 
羅碧芝 Facebook Page
www.fb.com/gigilawpg
IG: gigilaw1113

Read More
2019年09月09日

《要娶個識喺朋友面前尊重你嘅女人》

2019_09_09_gigi menclub
 
網上資料圖片
 
話說有個朋友結咗婚先嚟後悔,後悔點解會娶咗個咁惡嘅婦人返屋企,其實人哋拍拖時都已經咁惡㗎啦!成班friend反問佢,點解結咗婚先發現?佢話之前拍拖好似鬼揞眼咁,俾佢鬧俾佢嘈都以為係未成熟嘅表現,結咗婚之後就會變好,加上未簽紙前無咁離譜,點知一擺完酒就好似前世欠咗佢咁。
 
Well,其實全世界都睇到你哋拍拖時,你帶埋女友出嚟嗰陣,都知你女友有幾難頂,不過以為你哋兩個人相處時會相處得好好,又唔見你呻,所以咪無人提你!講起又講,嗰次你未結婚之前食飯,你老婆喺咁多人面前黑你面,搞到成餐飯氣氛都差晒,我哋又無人同佢熟,老實講好尷尬,你都係掛住同我哋傾計回應佢問題慢咗一陣,乜你無感覺咩?好唔俾面你喎?
 
當時人表示:拍拖就好似有一層霧咁,遮蔽咗你雙眼,當所有嘢睇清楚時,已經註咗冊,返唔到轉頭。咁其實註咗冊後有咩咁難頂?唔俾面你都唔係第一日,好少事之嘛!
 
佢開始唔尊重我父母,好專制,去邊都唔俾一個人,想去踢波都話要跟住,一大班人踢完波吹水食飯又話要返屋企兩個人食,然後出糧話要俾晒佢,用嘅錢佢要知用喺邊,再然後佢話要日日睇我手機先有安全感。
 
最後大家確定,佢娶咗嘅應該係:監獄職員,日日監察你,你有自由去玩去打機去娛樂,不過要一齊去,或者指定地點同時間去。
 
其實喺朋友面前唔尊重你嘅女人,佢無理到你感受,同佢生活佢更加唔會當你係人,係隻狗,咁就一世。如果你仲有得選擇,睇清楚對方性格容唔容許你做自己,識唔識俾面你,呢兩點真係好重要,否則真係後果自負,諗清楚先好呀!
 
羅碧芝 Facebook Page
www.fb.com/gigilawpg
IG: gigilaw1113

Read More
2019年09月01日

《一個成功嘅演唱會—容祖兒》

Fnm33J8ggHQuu_R_XjNtkBp-wy8v5CVWPBPZ8zwT2fM
 
網上資料圖片
 
最近香港嘅氛圍真係令人透唔到氣咁濟,大家都搵唔到出口之際,容祖兒就俾咗唔少力量出嚟,當然有好多人買唔到飛,感受唔到現場嘅感受,但透過各晚嘉賓環節嘅短片,睇完都一定有會心微笑嘅感覺。
 
我自問唔係祖兒忠粉,只係出於欣賞佢嘅歌,由細到大都會聽佢嘅歌,未去到追星入歌迷會咁瘋狂,有一年入場睇過佢演唱會,除咗記得佢爆玻璃嗰幕之外,都無咩嘢記得。
 
我鍾意睇特別嘅舞台,好聽嘅歌聲,節奏明快嘅舞步,所以我好鍾意睇郭富城演唱會,不過根據我經驗,坐第一行係睇唔到晒成個現場效果,例如太近唔會睇到成班人跳舞個隊型,然後又未必會睇到舞台嘅設計,城城個變形舞台真係好立體,所以坐第一行真係試過淨係睇到佢隻腳,好唔抵!
 
有見及此,當Joey出咗頭幾場嘅短片,知道個台咁正之後,就瘋狂搵飛,皇天不負有心人,俾我買到兩張飛,個視野真係完美,仲要有紅磡360,可以近距離同joey唱歌,見到好多人就算坐山頂位都玩得好開心,我深信,呢個演唱會好成功。
 
一個成功嘅演唱會係令觀眾投入,好多人好似我咁,唔係歌手嘅忠粉,入場想聽歌想開心想忘憂,呢三個半小時,多謝容祖兒,佢令我同我大肚9個月嘅朋友都好開心,支螢光棒齊齊發光嘅效果,更令場內嘅觀眾一齊大叫,個波波舞台千變萬化,加上好靚嘅動畫效果,好多個環節我都記得。
 
有人話,呢個演唱會係用錢堆砌出嚟,其實無錢就係做唔到咁嘅效果,我都唔明有咩問題,無舞台效果、無歌舞、無大堆頭,我不如聽CD,洗咩入場呢?
 
當然,我個人認為,呢個演唱會最成功嘅係,容祖兒成功建立自己嘅品牌,有質素嘅演唱會品牌唔容易建立,例如以前日本我會睇濱崎步嘅演唱會,香港只會對城城有興趣,覺得佢哋嘅品牌好好,所有嘢好有質素,恭喜祖兒加入呢個有質素保證嘅行列,期望佢下一次嘅演唱會,更上一層樓,為香港人送上正能量,開心樂天嘅你,真係做到了!
 
羅碧芝 Facebook Page
www.fb.com/gigilawpg
IG: gigilaw1113

Read More
2019年08月24日

《英超開鑼啦!!而且仲用埋VAR》

f38df27b-0c64-4313-a755-5510f01b68d9
 
網上資料圖片
 
雖然抖暑都抖咗個半月,但呢個半月都有好多友賽睇,大家最鍾意嘅英超亦都開鑼,相信睇咗兩星期,英超最大改變都係講緊VAR嘅使用,而好多人都研究,啱啱曼城入波後被VAR推翻嘅手球情況。
 
好多報章其實都交待咗,曼城嘅拿樸迪喺加比爾捷西斯入波之前,手臂掂到個波,總知新嘅球例寫明,進攻嗰隊嘅入球係經手或手臂製造成一個入球機會,無論有心無心都係犯規。
 
英國嗰邊球迷好明白事理,都唔係怪球證,亦唔係怪用咗VAR,而係不滿呢條球例嘅修訂。好坦白講,呢條例唔係為一隊半隊去改,適用所有球隊所有球員,今次發生於曼城身上所以大家好大反應,基於大家覺得曼城呢場踢得較好值得贏,又或者覺得咁樣唔理有無心都罰係唔公平。
 
我又覺得咁樣寫明一條球例無唔公平,所有進攻情況一掂到手就唔當入波,兩隊都一樣去應用,全世界都咁去處理,出現嘅機會係人人有份,如果一條例兩隊都適用,我個人認為無咩問題,甚至會少好多爭論,踢波用腳踢,呢條球例修改嘅背後原因都係想更公平減少爭論,如入波前經手觸球,一概不成立,都ok呀!
 
當然有人話熱刺個球員史基比隻手都掂到波,咁佢好明顯都唔係有心,大家都想頂波嘅,不幸跌落兩人之間手臂咁囉。
 
其實今年嘅球例對手球嘅解說都更詳盡,希望去統一判罰尺度,對於用VAR嘅國家會更準確掌握呢把尺,既然係咁,大家期待嘅更公平嘅足球更容易呈現俾大家欣賞,咁大家又鍾唔鍾意呢?
 
羅碧芝 Facebook Page
www.fb.com/gigilawpg
IG: gigilaw1113

Read More
2019年08月16日

你係咪天生做唔到生意嘅人?

2019_08_16_GIGI menclub
 
網上資料圖片
 
話說我好憎一個香港嘅風氣,就係咩都炒炒炒,炒樓價、炒iPhone、炒演唱會飛呀咁,明知香港生活唔容易,某啲人都係要抬高價錢,驚死你哋唔死得,住屋呢類生活必需品都貴到呀媽都唔認得。
&nbsp
其實我真係唔係好明呢種靠炒賣抬高到個價離晒地嘅行為,所以我絕對唔適合做商人,又或者靠呢類行為搵食嘅人。可能我買嘢係幾慳嘅人,出外幫朋友買我連退稅都會計返俾人,因為大家都想慳,就算慳嘅唔係我嘅錢我都會開心。
 
你哋唔好以為,幫人去歐洲買名牌嘢個個都咁好死,又要幫你拎住咁大盒嘢四圍去,又要幫你去唔同門市搵,好多人退稅嗰部分都唔會要對方一定計到咁足。但我就會連埋稅計埋個價錢,大家買嘢都係想平,做朋友當然係幫到咪幫。
 
大把人話我傻,因為拎餐死,錢又無得賺,但我覺得,我都想人哋咁幫我,大家搵錢都辛苦呀!慳到咪慳囉。不過有時叫人買嘢都好難開口問個稅可唔可以退完再計,所以真係好好朋友嘅人先會互相幫忙。
 
而好多人都會講明稅嗰度唔會計返,咁講清楚咗,買唔買最後自己話事都ok嘅!如果買到幾萬銀個袋,個稅都4-5千,唔退返稅真係差好遠,所以搵到一個願意幫你拎到死死吓,去唔同門市搵袋嘅朋友,又唔計較同你慳到足嘅人,真係要好好珍惜。
 
當然對朋友咁好無問題,但我對唔太熟嘅朋友,要賣嘢俾人我都唔會開高價,原因係我太了解大家都想慳,慳得嚟又想好質素係正常,太企人哋個角度,心理上必定唔能夠定一個高價錢,我係做唔到生意嘅人,真係唔係生意人才。試過有次演唱會買咗飛但要出外,都係原價+車費賣出,其他人最少加300,我都廢事賺。
 
當然我唔係水魚,喺我身上想拎著數都唔洗旨意,最憎人想昆我(刻意抬到非合理價),不過算啦,或者做人真係要自私先有幸福嘅!所以我仲係咁鬼窮囉!哈哈!
 
羅碧芝 Facebook Page
www.fb.com/gigilawpg
IG: gigilaw1113

Read More