2017/09/15

乾坤一轉,香港人走得嘅就走嘍

2017_09_14_Gigi
 
網上資料圖片
 
香港回歸前就有一批大移民潮,近年,身邊好多朋友再次開始實行移民大計,連我一年見一次嘅婦科醫生都話走去紐西蘭,臨走前話覺得香港唔適合居住,佢都幾客氣,只係用唔適合居住形容,講白少少,連醫生搵咁多錢,都話居住唔到,咁我呢啲蟻民直情覺得唔適合生存。
 
講來講去,係咪真係得住有問題呢?好就講「住」先,呢度有無男人睇大台最近套「嫁到這世界邊端」,小妹不嬲都知道人離鄉賤,嫁咗出去無晒屋企人同朋友,對住鬼佬老公一齊捱,都唔係靠講一個愛字咁易。睇呢套嘢最好睇到唔同地方嘅樓價,陳貝兒除咗關心女主角嘅愛情故事,會好貼地問埋佢嘅住屋情況同買樓幾錢嘅現實問題。
 
講真啊,佢哋對戀人點相處都真係當故事睇,始終人人愛情際遇唔同,所以睇到「生活」呢一part,就會特別留心喇!丹麥百幾萬就買到地呀,泰國一萬俾到首期等等,我真係唔明,點解香港租屋都成皮嘢。
 
身邊同我差唔多年紀計劃要結婚嘅朋友,全部想搵400萬以下嘅樓,講真搵鬼到咩,想9成按揭,按埋條命啦!住嘅問題遲吓政府話有平樓,供應俾青年家庭,我到時就睇吓抽唔抽到。
 
住都講到好煩厭,我再想講車,香港地,想揸車,唔係你話有錢大晒!你買唔起樓,想揸車車吓小朋友老人家小狗小貓老狗老貓,都係排車位排到人都癲!屋村車位同私家樓都係,排極都唔輪到你,然後成條街泊晒車就狂抄牌,阻人抄你抵死,唔阻人又抄,唔知想點。
 
爛地停車場見少買少,拎晒去起樓,樓又買唔起,咁香港人搵錢就係為咩呢?想有個好生活都咁難。你努力做嘢,買唔到樓,算,時不與我。放工車去兜風,有車無車位,即係車仔無地方住,咁買咗又係搵嚟煩。(有無巴打有泊車妙計分享?我架車就嚟被迫遷啦,哭哭!)
 
然後日日迫港鐵返工放工,返到屋企想學外國人去玩去做運動?又攰到隻嘢咁!生活質素低,只可以真係放假搵嘢玩,都算幾好,香港起碼都有好多嘢玩,如果你有假放的話。
 
之前有個報告話香港人平均壽命全球第一,贏埋日本,我真係唔係幾信。如果係真嘅話仲大鑊!香港人都唔開心,要咁長命做乜?醫療福利又唔係好,咁即係話,長命代表呢班人真係好捱得啦!咁唯有繼續捱吓啦香港人!
 
羅碧芝 Facebook Page
www.fb.com/gigilawpg
IG: gigilaw1113

COMMENT