2018/11/16

拍拖高調唔代表好恩愛

放閃
 
網上資料圖片
 
嗱,一入到嚟睇呢篇文時,冷靜少少先,唔好鬧住,我唔係咀咒你哋分手,不過我識好多巴打其實都唔鍾意曬恩愛,就算曬都係被迫。如果你唔想間唔中聽到身邊個比說話你聽,你咪share呢篇嘢比佢睇囉!
 
其實兩個人相處,你會睇到一開頭拍拖會如膠似漆,不停喺facebook或IG係咁放閃,包括去過邊到玩呀!大家原來性格上有趣嘅地方呀!共同擁有嚐好等等!
 
好多嘢你好想分享俾其他人知,你呢一刻好幸福,特別係女仔,我明,我真係明!因為宣示主權:「大家都唔好掂我男人!」呢個舉動真係十個有十個女人都會做,有部分嘅男人都會因為好愛對方而做出差唔多嘅嘢!熱戀期呀嘛,係咁㗎啦!
 
但係日子耐咗,應該兩年後,如果你見到呢對情侶開始唔再經常放閃,千祈唔好以為人哋散咗,其實係好正常,開始進入穩定階段,唔用放閃嚟保持二人關係,真正用心同對方相處、交流。老實點解要用放閃嚟同人交代呢?
 
反而你會發現,如果一直好少事好少事,有對情侶咩都放上網,將二人生活無論事無大小(well!你身邊一定有呢類煩膠情侶!)都好似(係好似)好恩愛咁,報告俾大家聽,迫大家睇嘅話,佢哋又未進入結婚階段,呢一對好似好熱戀嘅情侶,多數都開唔到花結唔到果。
 
原因其實好簡單,當一個人對你好,目的唔係真係想你開心,只係為咗自己嘅形象,做完好嘢要全世界知,明明對你一個人好其實做咩要全世界讚?咁究竟為你做,定抑或想擦網路存在感?
 
哦,原來送咗花俾條女之後,成程玩電話,咁代表好錫個女友?如果一個男人一路對你好,唔關心其他人知唔知,最梗要你知就得,呢個先係好男人!
 
放閃唔係唔得,但要諗吓對方所做嘅嘢,自己會唔會好想俾人知,如果會,你就要小心,分分鐘做俾其他人睇都有其他目的,甚至放完閃都會同第三者講係被迫,唔情願,最愛都係第三者等等!
 
兩個人相處,無必要將所有嘢都拎出嚟分享,除非你收咗錢好似明星咁,否則,用自己嘅愛戀做宣傳,多數都唔會有好結果。
 
羅碧芝 Facebook Page
www.fb.com/gigilawpg
IG: gigilaw1113

COMMENT