2018/11/23

結婚幫你做兄弟嘅,仲有幾多個係你兄弟?

2018_11_23_gig menclub
 
網上資料圖片
 
話說你哋結婚,唔知點解身邊個個硬係想搵好多姐妹,好多姐妹唔緊要,代表你要搵好多兄弟,條數要平衡啊嘛!長長久久呀!最好搵夠9個兄弟9個姐妹!人多行出嚟威呀!你未結婚嘅話,點都幫人做過兄弟姐妹啦啩?(well,如果無,真係見識少好多!)
 
然後過咗幾年,無論個婚禮搞得好唔好,主人家幾咁識做,呢班兄弟姐妹,有幾多個你仲保持聯絡?會約出嚟得閒食個飯?我自己就好揀擇,做得姐妹都真係由細識到大,唔熟唔做,直情去飲都係,一年幾廿人請飲,唔想去我真係會一開始就話唔得閒,廢事浪費時間啊嘛!
 
我就眼見有好多人,好鬼假,扮好人,應承完人做兄弟姐妹之後呢!成個婚禮無貢獻,無貢獻都算,仲要四圍唱啦!又話呢樣點安排個樣唔好咁!做完兄弟姐妹後,可能各有各忙啦,飛卜都唔會問候吓大家,曾經有朋友因去咗海外定居,就見盡人情冷暖。
 
你唔喺香港,好多人都當你死咗,你試下唔update個飛時卜,無人記得你,有時差啊嘛,問候你做咩?我去到海外探呢個朋友,佢喊住話當年幫佢做姐妹嘅,得返兩個有聯絡。
 
呢類情況好少事,最經典都係本身主角無咩朋友,無計啦!老婆話要搵6個姐妹,無老死點嘔6個兄弟出來?最後搵晒成班同事,錢解決到嘅問題唔係問題,同事嘅嘢!俾足人情,工作上識做就掂啦!點知幾年後大檸樂,男主角工幹飲醉遲遲未歸,老婆搵返幾年前兄弟list個電話出來,打俾班同事。
 
然後發覺老公有外遇,又問老公同事,唔知邊個口多多爆埋出來,咁係咁㗎啦!人哋唔係同你由細識到大,公事又唔likey你,你老婆問多兩句咪講真話囉!
 
最後所謂嘅兄弟,其實一個都唔係,到今日直行直過,見面招呼都唔打。老實,未結婚嘅你,如果真係另一半搵好多兄弟/姐妹幫手,你本身無咩好多好熟好抵得諗嘅朋友,你可考慮認識幫手做兄弟/姐妹嘅另一半幫手。因為佢哋對你了解唔深,更加因為自己條仔/或女幫你身邊嗰個,佢會扮好人落足廿二分力!後患亦少!千祈唔好考慮其實唔係好熟嘅同事、認真唔太好朋友嘅隊友、遠房表哥等等,呢類人只會為你增加麻煩,婚禮無事將來都唔知會唔會搞到你!
 
羅碧芝 Facebook Page
www.fb.com/gigilawpg
IG: gigilaw1113

COMMENT