2018/11/30

死唔斷氣嘅人好討厭

2018_11_30_Gigi MenClub
 
網上資料圖片
 
話說大家有無試過俾人阻住你升職?即係有堆無貢獻嘅老屎忽,因為年資耐,陳年歴史升升下輪到佢,又或者好似政府咁年年加薪,去到一個位高你一級,總知一間公司或機構總有煩到爆嘅老屎忽出現!
 
然後有親project 要搞,都屈班細嘅做晒,80/90後嘅你,人生總會面對幾個呢啲曲街。講明呀,唔係個個前輩都咁衰格㗎!香港大把人每日真係勤力過隻牛咁返工,本身對工作好認真,雖然仲有幾年退休,做人做事做嘢,一啲都唔馬虎,你可以喺佢身上學到好多,你遇到好人嘅,你好彩囉!分分鐘仲提攜你帶挈你,一步步升職呢!
 
但好可惜,中六合彩嘅嘢,永遠無你份,你身邊有勤力嘅老前輩就一定有返工等放工嘅老屎忽!生人霸死地,做嘢無貢獻但阻住地球轉,唔額外整啲蘇州屎俾你都當幫忙。
 
你曾經好懷疑點解呢個人會高級過你,又outdated,又唔勤力,個人又唔正常,會唔會佢後生時好搏命先有今日呢個位?你問返其他同事,就會打聽到呢類煩膠通常一變咗鐵飯碗,就會現出真性情!上司想炒佢又炒唔到,佢最好唔好搞屎棍你老細已還神,做咗一段時間就好似返工等出糧咁,叫佢為咗件事好做多少少,佢一定唔制,仲要一副吹佢唔脹嘅態度,激唔激死?
 
最慘佢又唔要自尊,尊嚴對佢嚟講唔重要!你終於有一日忍唔住發火開佢波時,佢真係懶得俾反應你,你死死地氣做埋佢個份了結咗單嘢算吧啦!
 
最後唯一只能做就係繼續谷氣,無辦法解決,就等時間解決佢吧啦!唔通日日希望個天跌本死亡筆記俾你,就真係會有咩?再頂唔順咪唯有轉工囉!
 
羅碧芝 Facebook Page
www.fb.com/gigilawpg
IG: gigilaw1113

COMMENT