2018/12/06

玩女人無好結果,睇路啦兄弟!

download-1
 
網上資料圖片
 
其實好多男人未有家室前都成日換女友嘅!(結咗婚都係咁就梗)甚至求埋婚都有好多所謂玩吓嘅女友,講真,我明白男人花心,但唔代表接受,眼見好多人令身邊個女友/未婚妻/老婆受傷害,個心痛到痴咗線,但又死唔分手,雖然係個女仔犯賤咁都要留喺個賤男身邊,但其實個男人用幾多甜言蜜語,把口話會改,把口話最後一次,女人信,就係咁先!
 
人與人之間相處真係無條formula 幫到手,你好愛一個人,佢做幾多衰嘢,你都同自己講,你會改變到佢,佢會為你改!不停咁催眠自己,直到有一日個心撕裂到想將自己同對方毀滅,唔係你死就佢亡,故事先有個終結,甚至係另一個故事開始。
 
好多男人以為自己情場高手,以為食得住所有女人,最後因為個女人要毀滅你,可以所有嘢都輸晒同你一齊跳入火海,呢一刻,我好想知道,被女人起飛腳嘅男人有咩感受?
 
將你嘅情慾短信/錄音/片段公開,甚至拎埋個仔去驗DNA,將知道你嘅所有秘密同痛腳向你公司老細講,你諗住佢係第三者佢要面,佢唔會咁抓爛塊面,男人,唔好咁傻,當一個女人癲起上嚟!佢可以咩自尊都唔要,得唔到你,都唔要你幸福,唔會俾好日子你過!工作都斷埋你,要你有咁衰得咁衰!
 
無錯,女人係可以去到好盡,所以玩之前,你睇睇對方係咩人,咩國籍咩身份咩性格,唔係個個女人都咁死蠢,唔係個個都當你神咁拜!唔好諗住做安全措施就無手尾跟,我聽過大把女人設局拍晒片,拎晒證據咁想搶你一筆!
 
其實本身有女友有老婆,好地地咪幾好,唔鍾意分開再識第二個囉!點解要學人玩女人?你一開始用玩嘅心態,你玩人,最後咪俾人玩到飛起!
 
我身邊最少有三個個案,諗住玩夠拍吓屁股抽身離場,點知俾女人搞到工都無埋,名譽掃地,為咩呢?我哋旁觀者當然食花生笑佢抵死,但事件發生,最大受傷害嘅分分鐘係你最心愛嘅人!
 
羅碧芝 Facebook Page
www.fb.com/gigilawpg
IG: gigilaw1113

COMMENT