2018/12/21

因為摩連奴,更愛費格遜

download-5
 
網上資料圖片
 
曾經有個紅魔迷同我講,佢鍾意曼聯嘅原因唔係因為球員,而係為咗追隨費格遜。當時我覺得佢同一般基督教徒無分別,對於我呢個非英超球會球迷同無任何宗教嘅人嚟講,呢位朋友都係追隨緊一樣接觸唔到,一種好虛幻嘅精神力量咁囉!
 
時至今日,一支英超老牌勁旅炒教練,而我相信好多人留意英超開始都會被曼聯吸引,香港大部分比較資歷長嘅球迷,都係加入咗做紅魔,呢批球迷應該相當高興,因為,佢哋不滿球隊表現,不滿領隊球員不和,不滿輸俾利記,呢兩三年忍咗呢隊曼聯好耐,但捧咗咁多年,買咗數十件波衫,去英國入埋奧脫福朝聖!無理由跳船啊!
 
最終,等到摩連奴下台,事實已定,將來無人知,回味一下費爺爺一手將曼聯王國一手一腳建立嘅豐功偉績(自己買本自傳),欣賞費格遜嘅生平從來唔係一帆風順,由球員時代狂入波嘅前鋒,到有時表現唔穩定無得出。教練生涯都係由乙組細球會做起,經歷過同球會打官司呢類人生低潮,就算做咗曼聯領隊頭幾年都係一步一步咁捱,先令曼聯進步成為英超三冠王。
 
睇返轉頭,費格遜嘅成個人生路好漫長、好多衝擊,好充實咁接受唔同挑戰,呢類由無到有嘅感覺,由零到一百嘅成長,我相信摩連奴都係咁嘅經歷,但有能力持續效力一個球會嘅能力,佢仲未有,又或者佢唔想,真係無人知。
 
其實做人,睇人哋最後成功,好似好風光好偉大,當中經歷幾多辛酸,就算你知都唔會完全明白,亦唔能夠幫佢面對個種壓力,佢今時今日好成功咁退休,我哋仲成條三文魚咁努力向上游,我同你都係而家嘅摩連奴,雄心壯志又點?有志氣可惜同其他人相處唔到,搵到錢咪得囉,或者好多好多借口係我哋呢一刻人生到出現,而家條路卡住咗,將來會好後悔今日嘅決定,但咁又點,呢一刻真係想咁呀嘛!
 
Well~兄弟,你今日任性咗未?無論將來我哋做唔做到費格遜,做人唔好忘本,好多好事都自然會來,真係!除非唔係囉!哈哈!預祝你哋愛隊後勁凌
厲啦!
 
羅碧芝 Facebook Page
www.fb.com/gigilawpg
IG: gigilaw1113

COMMENT