2019/01/04

你係神定豬?

dd90003cb583e379178
 
網上資料圖片
 
好多fr傾開偈時都忍唔住爆自己個老公或男友,話一同住或生咗仔就覺得對方好討厭。討厭原因不外乎唔幫手做家務、做少少嘢都做唔到、掛住打機、出咗去玩、遲返屋企等等啦!
 
開頭一結婚要磨合就梗嘅,唔通兩個由唔同家庭長大嘅人會生活習慣一模一樣咩?你都知有好多女人係公主病,本身有呀媽服侍,喺屋企咩都唔洗做,即係同你一樣囉,咁兩個一齊住埋,要落手落腳搞掂廚房、廁所、睡房加埋客廳,洗碗洗衫吸塵抹地呢類嘢,拗交都唔知拗幾多次先有人郁手做啦!最慘你遇著有強迫症但又下下話要分工,大家要返工,一人做一半,咩都同你計,然後計計吓變罵戰,日日如事你唔死呀?
 
你眼中放舊紙巾喺窗台好少事,轉頭會執,唔洗30分鐘已俾人鬧到街尾都聽到,你心諗洗唔洗咁嬲呀?有病呀?所以勸大家結婚前同居先,去旅行唔算,生活嘅嘢,生活唔到就無婚姻啦!
 
第一關過完,你哋生咗仔後,個仔你有份,你點都要幫拖啦呢獲,點知做咩都唔合老婆心水,做咩都錯,企係隔離咩都唔做,呼吸都錯!無辦法啦!剛生完係好火爆,忍吓啦!雖然你日日背負住豬隊友之名,但如果你真係默默咁做,慢慢學,最後幫到手,我見好多爸爸一兩年後都見到彩虹,俾老婆讚幫到手嘅!
 
你係神同豬其實唔重要,最重要你知道你老婆係大佬,既然你愛佢,都要頂啦!女人生仔真係好辛苦!大家都加油啦2019!
 
唉,2019收到好多帖,大家係咪都一樣?都係嗰句,加油儲人情啦!
 
羅碧芝 Facebook Page
www.fb.com/gigilawpg
IG: gigilaw1113

COMMENT