2019/01/18

新年前大掃除,小心玩具消失晒呀!

gigi
 
網上資料圖片
 
話說,新年前大家都會執吓屋嘅!各位弟兄自從BB來了後,喺屋企嘅角色都好明顯,搵錢養家司機同埋搬運,咁你都好樂意嘅,始終老婆辛辛苦苦生咗個B出嚟!我明白亦都了解,好多想呻嘅說話係唔可以俾女人聽到。
 
例如尋晚成晚無瞓好瞓啦!(老婆會鬧你有幫過咩手?)出去做個gym都俾老婆鬧啦!又同班兄弟出去?乜佢哋無屋企人無家庭無細路無女友無老婆?點解吓吓要你幫手?(你心諗其實想出街透吓氣,想出去個個搵人陪嘅其實係你!)老婆生完BB想要獎勵,手袋又好咩都好!(你心諗買咗一大堆BB嘢你個戶口都唔見一大截,又買?)仲有就係成日聽到屋企唔夠位,不如你賣咗你啲玩具去啦!
 
嗱!講到儲漫畫、Figure、lego、模型等等!即係實際無用,只供觀賞嘅嘢呢!喺女人眼中都係多餘,因為佢哋唔識欣賞,拎出街又唔會虛榮,佢日日望住你呢堆嘢,內心已出現好多次想唔通知你就幫你清理好嘅衝動。
 
新年又來,當你懷緬舊日逗利是嘅開心情景,老婆大人嘅偉論又開始日日嚟料嘅時候,好老實,如果屋企真係無位,香港正常普通家庭都係400-600呎樓,生咗細路後,始終有一日都要收拾呢堆嘢!將你嘅童年回憶,男人嘅浪漫好好收藏去迷你倉到啦!
 
你可能會好威地留言話自己老婆唔會咁做,唔會掉你嘅嘢出街,咁真係恭喜你娶到個咁正嘅老婆,因為十個女士真係最少七個生咗B後,講實際、實用嘅性格會出晒嚟,唔係佢想變,佢都係想仔女喺更好嘅環境成長,你唔可以投訴,因為佢又無錯,所以,如果無空間,而你老婆忍到你呢堆玩意佔領咗屋企嘅位置,你要好好珍惜佢,佢真係好尊重你!
 
羅碧芝 Facebook Page
www.fb.com/gigilawpg
IG: gigilaw1113

COMMENT