2019/01/25

新年流流,講埋晒啲衰嘢!

2019_01_25_gigi menclub
 
圖片來源:tbc…全家覆
 
新年嚟講,拜年少不免,總知每次見到親戚長輩呢!一年先見一次嘅三姑六婆一定會問吓你幾時結婚呀?有無男/女朋友呀?搵幾錢個月呀?做緊咩工呀?讀書成績點呀?有無錢買樓呀?儲咗幾錢呀咁?
 
如果你嘅長輩成日見,或由細睇到你大,其實錫你嘅人係唔會問咁多問題,你當然唔想每次拜年都好似去見工咁,所以你可能會叫定呀娘一早通水俾班親戚知,唔好問後生仔女咁多嘢!講真真係攜眷出席時,有啲嘢係唔想俾拍拖中嘅另一伴知,或有假希望等等!
 
例如男仔本身真係廿幾歲都未諗結婚,拖個女朋友見親戚就會俾人講到好似一定係終身對象咁,其實你成個新年賣唔甩個女友,你估真係咁想同佢出席咩?但奈何親戚一問,答咩都死!答未玩夠又死!答會儲錢又死!明明都唔會預備住,條女聽到之後以為真,唔死呀?
 
想耍班親戚完個話題,點知玩埋自己!唔同佢出席又有排氹麻鬼煩!結咗婚唔好以為無嘢煩,一陣又問你層樓邊個俾首期,又問你幾時生仔、一陣生完又教你湊仔!
 
其實呢,好多人特別係長輩,有時真係唔會太理人感受,因為佢係長輩,佢以為自己講咩都得,你要接受,你咩都要答,你好似點都要接受無禮貌嘅問題,亦無人考慮你嘅感受!
 
有時我唔明白點解做咗咁多年人,唔係更識睇人面色?更留意到人哋唔多想提一啲話題?點解係要追住問?係要迫人透唔到氣?我同自己講,我將來一定唔會做呢類長輩或前輩!我會希望後輩主動同我傾偈,有問題想解決主動搵我傾或分享,好嘅長輩有時唔一定要俾到好多意見,而係用心聆聽你嘅心聲,呢一點就足夠!
 
羅碧芝 Facebook Page
www.fb.com/gigilawpg
IG: gigilaw1113

COMMENT