2019/02/01

80後父母唔易做

gigi menclub
 
網上資料圖片
 
從來做父母都唔易,係人都知㗎啦!以前我哋細細個嘅年代,無電腦、手提電話同咁多娛樂,都係落街玩吓幫捉,去遊樂場就玩一日。星期六日呀爸呀媽返工,最多都係去同學屋企打吓任天堂睇美少女同足球小將!
 
頂多去吓社區中心補習班,中小學都唔會有太多要消費嘅活動。老實講,舊時養細路點都比而家平,而現代父母仲可唔可以用「我哋細個咪又係咁」呢一套生仔女呢?話得嘅咪天真囉!咁世上總有天真然後癩晒嘢嘅人!
 
先唔好講學嘢,報咩興趣班、學兩文三語呢類係基本消費!幼稚園學費貴到嘔血唔洗多講。講比較基本嘅日用品同玩具,以前我哋會著呀哥家姐用舊咗嘅物資,無問題呀!因為無咩分性別,架單車紅色,係人都鍾意,踩又唔會俾人笑。
 
但近呢十年開始,玩具生產商為擴大消售量,已將性別功能放落各大小玩具上,咩意思?例如你生一仔一女,一定要買兩架單車,因為一架會係粉紅色公主,另一架會係藍色唔知咩嘢戰士咁先算!甚至連lego近年都出公主系列,令到玩開煮飯仔嘅女孩子都會買粉紅色嘅lego起屋仔!做人老豆,問你死未?
 
然後又唔知點解,近呢十年八年好多小朋友皮膚出現好多問題,濕疹嘅問題令好多父母好頭痛!我哋80後嘅做小朋友嗰時明明都唔覺得身邊有濕疹嘅同學仔,就算有都一定唔多,而家係見到十個有八個細路都皮膚麻麻,睇見都肉赤,何況父母?睇醫生買專用嘅洗頭水沖涼液又護膚露,又要洗錢!
 
講真,天生天養呢支歌仔已無得唱好耐,你唔谷你仔女,睇見人哋個個咁叻,報咩班咩班,你有能力你唔會唔想俾佢!所以話呢,400萬已經無可能,生仔前真係諗清楚,你辛苦你自己決定,細路仔條路佢自己無選擇,照顧唔嚟唔好害咗佢呀!
 
羅碧芝 Facebook Page
www.fb.com/gigilawpg
IG: gigilaw1113

COMMENT