2019/03/01

女人最討厭嘅分手方式

girl-after-breakup-unsplash-27-09-2018
 
網上資料圖片
 
一對情侶分手,只要大家曾經好認真咁相處過,努力過,無論時間長短,要去到分手,無力可挽嘅時候,雙方都一定唔好受。每對分開嘅情侶,有幾多係大家一齊共到發現問題,可以好理性好和平咁解決到件事?真係拍戲咁好成熟和平分手嘅例子唔多,但分手始終要有人提出,提出嘅方式,其實係可以令對方更加受傷害,陰影無限touch!
 
其實話晒都深愛過,分手應該絕情定拖拖拉拉好呢?唔同人性格唔同,做法亦不一,不過如果一個男仔真係為對方好,當然係斬立決嘅方式係最好不過,但呢種方式往往係令女生受盡折磨,捱得過呢關就會雨過天晴。
 
斬立決即係一旦分手唔再有任何聯繫,甚至係唔見面地提出分手,例如send message後就block咗對方、寄或搵朋友俾返晒所有嘢對方加封信啦!總知唔當面講分手,透過一個唔會俾得返反應嘅分手方式,唔會同你拖拉,唔俾機會女方喊、死纏、扮自殺、扮病、鬧、埋怨!
 
總知係單向式分手模式,女人係最討厭,覺得你唔尊重佢、無情、欺騙、無責任感!但其實往往呢種方式先係最好令一個女人成長,更快明白唔應該再迷戀著往日,開始明白原來咩機會都無,就會認命識過個新嘅男人。
 
拖拖拉拉,繼續聯絡,放心不下嘅噓寒問暖方式,既然你仲咁關心對方,請問分咩手呢?當佢朋友?你哋大家都有朋友有家人,做咩要你做朋友?做朋友都要等大家真正放低,唔再有任何愛情嘅時候,或者可考慮。
 
分手即時做朋友,除非一開始都無深愛過,大家玩玩吓囉!否則呃邊個呀?到大家有新嘅另一半,講真,朋友嘅價值都無啦!所以,拖拖拉拉嘅男人,其實都唔係好人。
 
羅碧芝 Facebook Page
www.fb.com/gigilawpg
IG: gigilaw1113

COMMENT