2019/03/30

開會聽talk玩手機

download-1
 
網上資料圖片
 
話說Eason出席大學分享會,見到學生玩手機,覺得不被尊重,叫學生玩手機不如出去玩,如果有了解過Eason中學時期已去英國讀書,其實不難明白點解Eason會咁嬲!
 
近年去英國,有個好深嘅感受,就係上親堂,開親會,英國人都唔會睇電話,甚至你唔會見到佢哋放上枱面,佢哋如果同你傾計,好少分心,真係同你完成對話先會轉做第二樣嘢!去英國睇波,佢哋好興早兩三個鐘入場同朋友吹水飲嘢,你會見到佢哋好enjoy同朋友分享,就算吹水,好少會拎部手機出嚟,咁relax嘅時候,都好專注同身邊嘅人交流。
 
我唔知呢個會唔會係Eason唔慣人哋聽佢講嘢時拎手機睇而嬲嘅原因,但如果佢由細個係英國開始生活,習慣同人交流時對方好專注,用心聽你講嘢,老實講,話佢小器嘅人其實唔明白,用心聆聽人講嘢係好基本嘅一件事。
 
其實我唔知場分享會學生係邊個年齡層,不過我又想分享一吓,喺香港現今嘅90後,我發現同70或80後嘅處事模式好大分別,以下係我觀察到同埋親身同90後共事過嘅感受。唔知係因為佢哋長大嘅過程中,電子科技開始先進,但未進入一個被好好運用嘅階段,當時嘅家長應該係60後嘅,未必好識利用電子科技幫班90後成長。到佢哋大大吓,青少年階段會好沉迷網上世界,佢哋同人溝通,甚至講說話嘅技巧,係無70/80後咁順。
 
好多90後唔太識講嘢,一句起兩句止,特別係由男仔,你叫佢打字可以好快,答你WhatsApp好正常,當面對面同佢溝通,佢哋真係唔識表達一個明或唔明嘅表情,同埋講講吓可能走咗去都有。又或者你以為好common sense嘅事,佢哋都未必有概念,唔係因為經驗問題,係同人相處時,人與人之間嘅互動嗰種感覺,確實有所不同。
 
我好期待即將同00後,甚至年齡更少嘅後輩相處,由一班70/80後嘅家長打造嘅新一輩,究竟係會更醒目,或者都係唔識同人溝通呢?過多幾年有待分曉!
 
羅碧芝 Facebook Page
www.fb.com/gigilawpg
IG: gigilaw1113

COMMENT