2019/06/07

瞓著咗嘅歐聯決賽夜

_2019060208143638747
 
網上資料圖片
 
話說利記對熱刺嚟講,未踢之前係人都會覺得睇英超時都會認為利記高少少,成班朋友入面都無乜兩隊粉絲,純粹欣賞決賽,總知想睇緊張刺激嘅賽事就ok啦!
 
雖然有人話兩隊都英超球隊戲碼無咁正,但可能我真係好鍾意睇英超,我又無太大感覺,點知一開波第一分鐘熱刺就發生低級錯誤,輸球12碼,真係全班fr都嬲到著火,咁就一比零,點先?
 
然後上半場兩隊又亂過亂世佳人,無組織,亂踢,高波亂清,完全係英超仲好睇呀吓!咁我哋都理解歐聯決賽係緊張嘅!但都唔好成個半場都唔知做緊乜呀!
 
好啦,睇完個半場開始眼瞓啦!都估到熱刺開始會禁制,下半場隻眼皮重到真係好辛苦,好彩趕得到最尾十五分鐘起身睇到利記個龍艾利臣狂救險球,雖然有人話利記泊大巴贏唔光彩,但我覺得人哋唔通唔守俾你攻呀?一個反擊就二比零啦!咁先好睇啊嘛!
 
當然我都明,邊隊贏都會有人講呢樣嗰樣,但其實利記贏都真係無乜爭議啊,我非利迷都覺得「利記拎冠軍好合理」,我求睇好波,最後睇到十幾分鐘都收貨。
 
我估未入第二球前,兩隊球迷都應該練緊大心臟,究竟會追返一比一加時定點呢?哈哈,足球就係咁正!但唔知係咪上半場太悶,定抑或太早起身返工,真係頂唔順瞓咗幾嘢!不過呢排半夜睇歐洲國家聯賽都唔係幾頂到,係咪因爲年紀大呢!omg,應該係日抖訓練太攰,無事嘅!我未老!應該係……..除非唔係…..
 
羅碧芝 Facebook Page
www.fb.com/gigilawpg
IG: gigilaw1113

COMMENT