2019/06/21

家庭朋友圈不再和諧了

tree 4
 
最近嘅香港,令人好痛心,有關邊個搞成咁,邊個啱?邊個唔著?邊個有責任?邊個暴力?邊個野蠻?我諗大家心入面都有自己睇法!
 
有幾多人因為呢件事同屋企人及朋友拗到面紅耳熱?有幾多人unfriend人及被unfriend?家庭及社會上下好似變得四分五裂,好似你唔同我一樣諗法你就低能嘅!你無常識嘅!你無良知嘅!
 
老實講我上星期都休息一期,我完全寫唔出任何嘢!亦唔想寫任何嘢去影響任何人嘅決定,大家咁大個人識分析,有自己思考,想做咩咪做囉!你有自由,想留屋企我尊重,想出街野餐我都尊重!
 
但我真係好唔鍾意人去迫人認同自己睇法,我哋所有人嘅出生、背景、家庭、社會地位、能力各有不同,大家睇同一件事都會唔同感受,我識個朋友,佢去唔到野餐,被身邊朋友鬧,其實佢唔野餐係佢一早接好咗工作,人哋真係屋企有需要要搵錢,鬧佢嘅人正好屋企大把錢!嗱!好多嘅誤會就呢一刻發生喇!
 
又有朋友鬧仔女去野餐,然後擺出事不關己嘅態度,其實又唔嘗試了解一下佢哋出去係做咩,又要怨互相之間有厚厚嘅牆,咁你一開始你都唔企對方角度諗下一開始連理解都唔想做,唔係叫你認同,理解一下姐,咁都唔做,怪得邊個?
 
最慘係屋企有人係警員,男友出去返工,睇完片段就WhatsApp叫個朋友解釋,解釋咩呢?我朋友覆:「你睇到我男友打人再同我講!」講真都擔心到死,仲要比身邊嘅朋友講埋晒唔合理嘅說話令你難受。
 
呢個世界所有圈子都有好人同唔好嘅人,呢個道理幾時都存在,一班同學入面有人控制唔到情緒,有人好乖唔會生事,有人有領袖嘅特質,有人唔出聲但內心好多想法,好多唔同嘅人。
 
而家唔係講緊去到政治層面嘅做法,投訴又好任何嘢都好,好想大家關注生活上同其他人相處嘅情況,屋企同朋友圈嘅調節,大家有無諗吓點拿捏?
 
暴徒/黑警/賣港賊/愛國撚/港豬等等等等,如果真係朋友,大家都應該尊重大家,其實你做任何嘢,我即使唔認同但尊重,已足夠。如果你真係覺得對方同你道不同,咪直情咩都唔好講,既然你覺得自己完全正確,又點解要迫人認同?愈激動,人哋愈唔會認同你,愈想人企你嗰邊,就應該冷靜。
 
記住,文字語言嘅野蠻殺傷力係好厲害嘅武器,大家唔好因爲咁而失去本身同你好要好嘅朋友呀!
 
羅碧芝 Facebook Page
www.fb.com/gigilawpg
IG: gigilaw1113

COMMENT