2019/06/28

一瞓醒俾老婆打

sleep-talking-main
 
網上資料圖片
 
各位兄弟,有無試過一瞓醒覺,無啦啦被你身邊嘅老婆/女友一巴咁打埋嚟!當你驚魂未定唔知發生乜事時,佢已經激淚如雨下,你心諗:「乜料呀?發乜神經!痴線婆!」然後你開始扮到好熱切好關心問佢究竟發生乜事時,佢答你:「你做乜攪女人?」
 
如果你本身真係身無屎嘅呢!你應該一頭霧水,攪乜春女人呢?唔通尋日同同事Mary傾吓計都算?你都唔洗再講嘢,呀嫂呢個時候自自然然會講埋落去!
 
「我尋日發夢你同邊邊邊個去咗酒店……」OK!發夢呀!係發夢呀!你試過㗎!個人愈攰,發夢夢到嘅嘢又堅係好真實,女人一係就唔發夢,一發夢夢到你都幾麻煩!
 
唔係夢到你死咗就夢到你去攪女人,喊一大輪,你氹佢就梗㗎啦!你呢個時候氹佢唔好話自己無做過點點點,解釋話佢白痴發夢唔係真呢類說話無用嘅!教精你,你只要作出承諾,女人最鍾意聽,一聽到你發誓唔會攪女人,無可能!出面女人邊夠你靚!佢主動又點?主動有目的,我唔會中計!
 
講一大輪呢類廢無可廢嘅說話,你今日全日會好好過,ok?
 
咁當然啦,如果你本身都真係有攪女人,你發誓時就小心有報應囉!唔係點?仲要呀,記住你萬一日後被現任發現你攪女人時,佢會記起佢發夢嗰陣你點氹佢,咁到時自己小心啦吓,女人癲起上嚟,好難講。
 
所以呢!想好地地就最好唔好有外遇啦!我真係見過好多女人一發現對方不忠,做出好多好恐怖嘅事,搞到大家成世人都唔好過,最大鑊咪攪出人命,攪唔出人命,攪到你身體最脆弱嘅地方受損,都有排煩啦!哈哈哈哈!
 
羅碧芝 Facebook Page
www.fb.com/gigilawpg
IG: gigilaw1113

COMMENT