2019/07/05

假如你覺得非死不可

positive-energy-3
網上資料圖片
 
話說最近嘅香港時局發展生態中,我發現全香港人都覺得自己啱(包括我自己),人人都有自己嘅一套睇法,然後每個人都想說服身邊嘅人,其實有咩睇法都好,咁大個人有手有腳,真係做乜都得嘅!
 
自己條命,你點樣處理,無人24個小時都可以喺你身邊守護住你,點樣唔傷害自己,係要靠自己嘅思想去控制,用一個點樣嘅方法去解決呢一刻面對嘅問題。
 
要用條命去爭取一樣嘢,好多人講唔值得唔值得,對我嚟講,直情唔係值唔值嘅問題!係有無必要嘅問題。
 
廿一世紀,一件事,如果要用條命去換返嚟,除非係另一條人命,你要去救人,不幸犧牲,呢個可能係你嘅工作,你必須要呢一刻去救人。或者係你呢一刻出於要救人嘅想法,你認為必要咁做,係你嘅選擇。
 
至於,為咗爭取政治上嘅回應,用生命換取呢樣嘢,係咪必要呢?咁做的話,無論結果係點,你認為有價值先會做,個價值你應該係覺得幫緊全香港七百萬人爭取嘅事,點知原來有一半人覺得你多餘,唔會覺得你咁做值得嘅時候,係咪就已經無咗個必要性呢?
 
要爭取就爭取更多嘅人同你一同睇法,爭取更團結,如果要用呢種方式去爭取,喺好多人眼中係野蠻嘅手法,唔同情你利用生命嘅同時更覺得呢種方式係可笑。
 
係呀!係有人會咁涼薄㗎!係有人會對你嘅死無感覺㗎!因為佢唔識你,佢哋唔會心痛,唔會傷心,唔會可惜㗎!你真係覺得好灰,無希望,去到一個點你覺得無嘢可以做時!試吓冷靜,諗吓自己細個最鍾意做嘅嘢,例如你鍾意動物,去吓勝利道睇狗仔。你鍾意音樂,聽吓歌,上網睇吓演唱會。你鍾意做運動,換件衫去跑吓步,約朋友踢場波。
 
真係好唔開心,喊啦!每個人都會面對唔開心,抒發出嚟之後就會好好多!
 
點都好,自己嘅命,要自己愛惜,錫自己多啲,你會發現好多無可能嘅好事將來會嚟搵你!加油咁多位!
 
羅碧芝 Facebook Page
www.fb.com/gigilawpg
IG: gigilaw1113

COMMENT