2019/09/09

《要娶個識喺朋友面前尊重你嘅女人》

2019_09_09_gigi menclub
 
網上資料圖片
 
話說有個朋友結咗婚先嚟後悔,後悔點解會娶咗個咁惡嘅婦人返屋企,其實人哋拍拖時都已經咁惡㗎啦!成班friend反問佢,點解結咗婚先發現?佢話之前拍拖好似鬼揞眼咁,俾佢鬧俾佢嘈都以為係未成熟嘅表現,結咗婚之後就會變好,加上未簽紙前無咁離譜,點知一擺完酒就好似前世欠咗佢咁。
 
Well,其實全世界都睇到你哋拍拖時,你帶埋女友出嚟嗰陣,都知你女友有幾難頂,不過以為你哋兩個人相處時會相處得好好,又唔見你呻,所以咪無人提你!講起又講,嗰次你未結婚之前食飯,你老婆喺咁多人面前黑你面,搞到成餐飯氣氛都差晒,我哋又無人同佢熟,老實講好尷尬,你都係掛住同我哋傾計回應佢問題慢咗一陣,乜你無感覺咩?好唔俾面你喎?
 
當時人表示:拍拖就好似有一層霧咁,遮蔽咗你雙眼,當所有嘢睇清楚時,已經註咗冊,返唔到轉頭。咁其實註咗冊後有咩咁難頂?唔俾面你都唔係第一日,好少事之嘛!
 
佢開始唔尊重我父母,好專制,去邊都唔俾一個人,想去踢波都話要跟住,一大班人踢完波吹水食飯又話要返屋企兩個人食,然後出糧話要俾晒佢,用嘅錢佢要知用喺邊,再然後佢話要日日睇我手機先有安全感。
 
最後大家確定,佢娶咗嘅應該係:監獄職員,日日監察你,你有自由去玩去打機去娛樂,不過要一齊去,或者指定地點同時間去。
 
其實喺朋友面前唔尊重你嘅女人,佢無理到你感受,同佢生活佢更加唔會當你係人,係隻狗,咁就一世。如果你仲有得選擇,睇清楚對方性格容唔容許你做自己,識唔識俾面你,呢兩點真係好重要,否則真係後果自負,諗清楚先好呀!
 
羅碧芝 Facebook Page
www.fb.com/gigilawpg
IG: gigilaw1113

COMMENT