今年最差新演員? 咸爺《King Arthur》演出曝光

文：MenClub 魏文青　　
POSTED ON 11 May 2017


咸爺(David Beckham)有好多個身份大家都知，而除咗(前)球員、名人、好老豆、慈善家等等等等之外，咸爺今年仲多咗個身份，就係演員。事關原來佢有份參演今日上映(其他地方係下星期先上)嘅電影《神劍亞瑟王》，而發行商Warner Bros. 前兩日就喺Youtube上載咗一段大約一分鐘、咸爺有份演嘅電影片段，結果就惹黎網民瘋狂批評，仲話咸爺嘅演技係「史上最差」！

咸爺喺戲入面飾演嘅角色叫做「Trigger」，乃係Charlie Hunnam飾演嘅阿瑟王旗下一名護衛，仲用特技化妝整爛塊面。而釋出嘅片段就係講緊Charlie Hunning對於上前拔出石中劍有啲猶豫，於是不耐煩地問好作狀咁單腳棟高、仲要背對住鏡頭嘅咸爺：「你究竟想我怎樣做？」，而咸爺就用佢同樣標誌性嘅雞仔聲答：「使唔使我湊埋你上去？你覺得我會想你做什麼，上去把劍拔出來吧蠢材！」。之後阿瑟王嘗試用單手將劍拔出但唔成功，呢個時候咸爺把雞仔聲又黎：「用雙手！」，於是亞瑟王就真係用雙手將把劍掹咗出黎。

大量外國網民睇完呢條片就喺Twitter狠狠批評咸爺嘅演出，仲話係「史上最差嘅演技」。佢哋主要嘅「罵點」有兩個：第一，咸爺把雞仔聲太礙耳。呢一點我係同意嘅，作為一個中世紀嘅士兵、阿瑟王嘅護衛，你可以唔靚仔、可以唔有型，但一定要夠Man，偏偏咸爺把聲又真係好尖，而且因為劇情需要佢仲要大叫，聽落就更加突兀。第二就係「拔出石中劍」嘅一幕乃係「亞瑟王傳奇」中最為標誌性嘅一幕，而呢個時候見到一個你好清楚佢唔係專業演員、現代形象根深柢固、仲要Set咗個脫離時空嘅油頭嘅名人客串演出，又難免令人發笑兼出戲。

所以有好多人都將矛頭指向導演兼咸爺老友Guy Ritchie，認為佢將咸爺安排做呢個角色係兩敗俱傷，套戲唔好睇之餘又令咸爺被罵。有網友就話呢個正正就係「Stunt Cast(預先安排角色，而非通過試鏡而決定)」嘅問題所在。至於套戲本身嘅評價(雖然外國未正式上映)亦都好譽參半，爛蕃茄評分只係得24/100，基於影評人意見嘅Metacritics就有41/100，但IMDb就有唔錯嘅7.2/10。既然套戲今日就上，大家不妨入埸自己睇下啦。