做帶氧運動減肥點解做到5勞7傷??
只做帶氧運動越減越肥??
自從有咗facebook之後，大家對於網上嘅資訊(不論運動或其他方面)都接收得快咗、多咗，係我留意到嘅呢2、3年間，大家對”健康減肥”要做運動嘅意識都高咗好多。
有睇開我個page嘅朋友都知道要有效減低身體嘅脂肪量都離不開做帶氧運動，例如跑步、游水、行山或跳舞等……
咁但係如果只係做帶氧運動嘅時候又會唔會為我地帶嚟其他反效果呢??淨係做帶氧運動之餘有駛唔駛其他訓練配合呢???
不如我地先講吓如果只係做帶氧運動對我地身體有咩效果先，我地嘅人體週期為8-10個星期，假如我地一成不變咁只做帶氧運動，起初幾個星期你會發覺體脂下降咗、真係瘦咗，但你都可以留意吓你自己嘅肌肉量可能都少咗，再過多一段時間當你嘅身體適應咗呢個運動量之後，你要再瘦嘅話，你可以選擇A)加長運動時間 B)減少飲食/節食
揀A嘅朋友都叫好啲；如果你係揀B嘅話……咁你咪又跌咗落一個節食陷阱裡面囉!
好喇，頭先講完只做帶氧運動嘅身體變化之後，跟住又講吓咁要做啲咩訓練去配合呢??
上面講到只做帶氧運動可減少身體脂肪量之餘，一段時間之後仲會令肌肉量下降，咁咪姐係要做返啲肌肉訓練(重力訓練)，例如做吓gym、打拳等，講到做gym，大家一定諗起啞鈴覺得好悶，咁又唔止嘅，我地除咗可以選擇啞鈴做weight training 之外仲有好多類嘅，例如body weight training、TRX、Fitball、Boxing等，仲有就係唔駛一聽到”肌肉訓練”又驚變大隻嘅，放心啦，無咁易㗎!
(不解釋，請爬文!!)
https://www.facebook.com/TrainerJerryLiu/photos/a.492036920880008.1073741837.491597190923981/645886962161669/?l=3afe7c6ab4
你要知道當你身體肌肉量多咗可以令你嘅新陳代謝提高、熱量需求大咗，而且肌肉可以令到我地嘅身體更壯健、加強骨骼穩定性，仲會令你望落去更firm更有線條美o忝，所以唔好比”肌肉”兩個字嚇親你先。
另外講開帶氧運動，無做開運動嘅你開始做運動時要量力而為，以跳舞為例，如果你有睇前一排報紙嘅話你就會留意到好多人跟住跳減肥舞而膝蓋受傷就診，如果舞步太多轉身、轉向、跳動嘅動作的話，上身肥胖/下肢力弱嘅你就要小心啲喇，咁可能對膝關節造成壓力或受傷。
如果膝蓋容易有問題可以試吓用游水或急步來代替，另外就係要控制個運動強度喇，一般減肥我地都建議做”中低強度”嘅帶氧運動(40-75%)，如果有啲運動係令到你心跳率達90%或以上的話，對啱啱開始做運動又或者你有心血管病、高血壓嘅你，要小心自己心臟能否負荷到咁高嘅運動強度先得。
最後要講嘅就係成功無捷徑，要健康減肥、令身體有線條美，帶氧運動、重力訓練、均衡飲食同充足睡眠要配合之餘，控制自己身體能承受嘅運動強度都好重要㗎!!
**想知更多體適能資訊可到我的Facebook Page “高級私人教練 Jerry Liu“，多謝支持!!