離心收縮
我地係做gym嘅時候多數都係舉嚟舉去、推嚟推去、拉嚟拉去咁，係做呢類動作嘅同時，大家有無聽過”向心收縮”同”離心收縮”呢兩個名呢?

一般我地係重力訓練嘅時候都可以可分為”向心收縮”同”離心收縮”，以二頭彎舉為例，我哋會將啞鈴由舉起到放低，舉起負重嘅過程我地稱為”向心收縮”，而放低嘅時候我地就稱為”離心收縮”，”離心收縮”又稱為”反式訓練”，原理好簡單，例如我地係做緊二頭彎舉嘅時候，二頭肌嘅收縮係負責將啞鈴舉起，而佢將啞鈴放低嘅時候係伸長嘅，呢個moment佢就係做緊”離心收縮”喇。

我地都知道要練大隻其實係將肌肉肌纖維撕裂，而係”向心收縮”同”離心收縮”邊種嘅收縮可以造成較好嘅效果呢?
答案係”離心收縮”

”離心收縮”對於訓練肌肉肥大嘅效果比起”向心收縮”強大好幾倍，所以除咗你可以舉幾重之外，另外就係你可以做到幾多放低(”離心收縮”)嘅訓練。而”離心收縮”訓練通常係動作中用較慢嘅速度還原，而還原動作過程中應保持3-5 秒鐘，如果少於 3 秒就會對肌肉中嘅生長因素缺乏有效刺激。

”離心收縮”以快速舉起同放慢速度去放低對肌纖維撕裂有強烈嘅作用，近十年嚟，有好多嘅研究者都對離心收縮訓練進行研究，證明離心收縮訓練對於增強力量同肌肉肥大都非常有效!

研究建議每星期做兩次至三次嘅”離心收縮”訓練，但係要留意嘅係如果你初初做gym，應該係”向心收縮”方面同耐力訓練開始先，然後慢慢先到”離心收縮”訓練…….又但係”離心收縮”訓練除咗對肌肉刺激更大之外，亦都好大機會係訓練後出現肌肉酸痛感，呢點你要留意喇。

**想知更多體適能資訊可到我的Facebook Page “高級私人教練 Jerry Liu“，多謝支持!!

體適能運動資訊 個回應 | 3,360 個已瀏覽 |