2014/12/03
”呼氣”的重要性
”呼氣”的重要性
係我地做training嘅時候”吸氣”同”呼氣”都可以話對我地嘅運動表現息息相關，有啲人鍾意用力時吸氣、有啲人鍾意用力時呼氣，亦都有啲係吸完氣之後唔記得呼氣、閉氣等。
近年有研究發現，如果用力時吸氣，因為肌肉用緊力，會對腹腔同胸腔產生壓力，令到血壓係短時間之內飈升，大量靜脈受到擠壓，回流心臟時受阻，長時間用呢種呼吸模式可能會頭昏或昏倒。
我亦都遇過有啲係吸氣之後用力時閉氣，而閉氣會令血壓飈升得更勁!!所以呢種方法唔好用喇!
呼氣除咗對血壓有住密切嘅關係外，其實對我地發力、穩定身體、有效咁練到腹部都好有關係㗎喎……
當我地用力時呼氣腹部周圍都會收緊，咁樣就可以幫助穩定身體及穩定核心肌肉令我地係運動時動作唔會有太大偏差，避免受傷。而核心肌肉可以話係我地人體嘅力量來源，腹部得到收縮，力量隨之由身體核心傳到身體其他部份幫助發力。
而係我地進行一啲腹部exercise時呼氣呢個環節就更加重要，例如我地做crunch或leg raise時，”捲上去”嘅時候用力地呼氣，咁你會發覺我地嘅腹部除咗捲埋之外仲會收緊，咁做除咗腹直肌得到鍛鍊外，腹橫肌亦有充分參與係呢個動作之中，一個”深而強力嘅呼氣”可促進腹橫肌活動及對腹部額外加多少少負荷，係呢個情況之下比一般嘅腹部訓練效果會大大提升，所以你話”呼氣”對運動係咪都好重要呢。
**想知更多體適能資訊可到我的Facebook Page “高級私人教練 Jerry Liu“，多謝支持!!
COMMENT