就黎冬天喇，大家都準備好禦寒衣物，但係唔知有冇準備好冬天嘅運動方案呢？

一凍起上黎人人都唔願郁，但係冬天胃口又特別好不停食野，攝取比消耗多又點會唔肥呢？以下會講下點解冬天咁凍都要做運動同埋冬天運動嘅好處。快Ｄ睇下啦！

冬天比夏天熱量攝取更多

因為冬天我地腸胃供血量會增加，消化吸收功能增強，我地會更快感到飢餓感，而且冬天香港人都小不免係屋企、酒樓圍埋一齊打邊爐食野，再加上氣溫令人懶惰，真係想唔肥都難，因此我地更加要多做運動去消耗攝取過多的熱量。

冬天進行運動消耗熱量更多

因為氣溫低，身體會消耗更多熱量去維持體溫，而當你脫下厚厚外衣運動時整個消耗會再進一步提升，再加上你運動時的熱量消耗，絕對比溫暖舒適的環境更有利減肥修身。

鍛鍊身體適能

我地嘅身體會因為嚴峻的環境而適應改變，就好似新聞經常見到嘅冬泳伯伯，所以如果因為凍而唔做運動就大錯特錯喇！冬天時我地反而要去運動訓練自己身體適應能力，你會慢慢發現脫下外套運動其實一次比一次簡單。

整日更精神、更有效率

相信人人都試過冬天一起身就想訓番落床，而且整日好似凍到縮埋一舊提唔起精神。其實解決方法好簡單，做運動啦！而且最好係早上進行運動，因為運動會令多巴胺（快樂物質）分泌增加，而多巴胺會傳遞到快樂、興奮嘅感覺，令到你整日工作同生活充滿活力同效率。

維持體能

身體必須保持鍛鍊先可以維持良好體適能狀態，相信邊個都唔想係夏天辛苦完過左冬天又即刻反彈！而且保持鍛鍊會令生理、心理都產生健康的運動規律，有助你長期都保持固定的運動方案。

其實冬天運動最緊要係肯踏出第一步，雖然一開始會好辛苦，但係當中嘅好處你真係做落就會知。唔好等喇，快Ｄ約埋你啲朋友仔冬天一齊做運動啦！