#改變靠鍛鍊 #堅持是關鍵

實在太多太多人問點解我想瘦拜拜肉唔同我狂操三頭肌，而走去推胸，深蹲？係人都想應大嘅地方大應細嘅地方細，所以唔少人都相信可以局部瘦身呢套講法，今次會同大家講解下究竟可唔可行。

首先要同大家介紹兩個實驗：

第一個實驗搵左班男士每星期5日，每日都只練SIT UP(仰臥起坐)，維持三星期。最後每人都做左成5千下SIT UP，應該乜腹肌都出晒黎啦？好遺憾，研究人員幫佢地測試前後對比時發現：體重、體脂、腰圍、皮下脂肪都無改變。

咁即係操黎都無用？咁又唔係！佢地嘅皮下脂肪分析顯示，呢5000下SIT UP令佢地脂肪細胞嘅平均直徑縮細左，但係呢個變化係全身脂肪細胞都有唔淨只腹部！

第二個實驗仲癲，搵左一班人番黎淨係操一隻腳！佢地一星期3日，每日做接近1000次坐姿腿屈伸（Leg Extension），維持12星期。如果局部瘦身係有效，我地應該會見到實驗者訓練腳變瘦先岩，大大話話都做左成3萬幾次Leg Extension。又好遺憾地，對比前後數據實驗者竟然係上身脂肪量明顯減少，下身反而無乜變化。

由此可見，身體儲存同運用脂肪好大程度都係先天性，唔會做腹就可以淨係瘦腹，做腳就淨係瘦腳。所以如果你想瘦腹，淨係操腹未必係最好嘅選擇，反而你應該專注係大肌肉、多關節嘅運動上面：例如深蹲、硬拉、慢跑、游水等。同時要配合飲食，將全身嘅體脂肪降低，自然你想搵舊肥肉都難。

＊＊＊想了解更多體適能資訊可以Follow我地嘅 Website,FB,IG,Youtube!

體適能營養資訊, 體適能運動資訊 個回應 | 3,260 個已瀏覽 |