2020年05月25日

一個會陪你打機嘅女朋友

Screenshot 2020-05-25 at 7.02.42 PM

自問認識嘅女仔已經少,最近識咗個鍾意打機嘅女仔,佢話佢打爆咗Switch隻Zelda幾次仲攞埋980粒石。打Skyrim,Assassin’s Creed等遊戲我自問真係冇心機開白金盃或者爆三次機,所以遇到一個鍾意打機嘅女仔感覺難得。點解?因為如果拍拖除咗行街食飯Netflix & chill,仲可以同佢大戰三千回合… MOVING OUT。所以最近正留意有冇啲咩遊戲係可以同女仔玩嘅,同時發現落game舖問店員介紹,亦唔一定話要好低手向就係適合女仔。一隻game啱玩就自然會經常玩,經常玩就自然玩得叻。以下係一啲比較受女仔歡迎嘅作品同本身無打開機嘅女仔玩:

Just Dance系列(如果同減緊肥嘅女仔玩,一流!但當然邀請人地玩時用第二個理由)

太鼓之達人

Overcook

Moving Out

所有Lego系列

Mario Kart

Mario Party

動物森友會

1_1_g_8players

俾有一定機齡嘅女仔,唔怕適應一啲比較hardcore,操作比較複雜嘅遊戲可以考慮:

薩爾達傳說:荒野之息

Super Mario Odyssey

Nier Automata

SKYRIM(如果唔介意美式人物畫風)

PUBG

The-Legend-of-Zelda-Breath-of-the-Wild-e1488985709540

講「教人打機」好自然都係認為係男仔教女仔,但我嘅經驗卻係例外。我人生第一隻俾我印象比紅白機孖寶兄弟同兵蜂複雜嘅遊戲就係鄰居大姐姐教我玩嘅:紅白機嘅「聖鬥士星矢:黃金傳說」。當時睇個開場,經過腦內補完覺得同電視一模一樣。正式開始玩當然用星矢,一路行一路打,出拳制跳制,都算容易吖。誰知一入金牛宮就陷入無限死亡地獄,下面一堆日文,變咗RPG?其實當時連Final Fantasy/勇者鬥惡龍都未玩過,即係連RPG係乜都唔知。亂咁揀一個,打佢一拳扣得果少少,佢還抽就打到我半死。跟住玩到氣憤亂按,又發現原來接招時可以左右郁,但郁咗又係中招。大姐姐笑夠,就按Reset制之後入去Password,打一大堆日文(佢已經識背)。嘩,9999!雖然都係俾金牛座虐待,但起碼爽啲。

 

就係呢隻遊戲,令我知道原來唔係隻隻game都係開一次機,或者打一日就爆到機嘅。所需要嘅技術亦唔止手眼反應咁簡單,係有策略嘅!等我仲以為打孖寶學識咗大佬火龍個行動路線就好威。到後來我靠自己摸索,第一次「叮」一聲將金牛座隻角打斷,當時應該就係正式染上電玩毒癮嘅一刻。

 

John K on YouTube: http://www.YouTube.com/KjohnK

John K on Facebook: http://www.facebook.com/hkjohnk

Read More
2020年05月16日

買定等14吋? – MacBook Pro 13″ (2020)

究竟仲等唔等14吋好呢?買$9,999最低配置嗰部定喺買最新配備 2.0GHz 4 核心第 10 代 Intel Core i5嗰部?呢啲係咪你內心考慮緊嘅問題呢?

Screenshot 2020-05-20 at 8.53.42 PM

13.3 吋 MacBook Pro 就終於喺上一個星期更新咗,保持了上一代的基本設計,但就提升咗處理器、GPU、RAM 同鍵盤。

今次 13 吋 MacBook Pro 嘅$13,999版本升級到第 10 代 Intel 處理器,最重要嘅係個鍵盤放棄咗為人詬病嘅蝴蝶式結構,轉返做剪刀式鍵盤,仲有 Esc 變成獨立實體按鍵,唔再係觸控欄嘅一部分。因為升級處理器的關係,MacBook Pro支援嘅 RAM 都提升至最多 32GB。可惜嘅係,新型號仍然係唔支援已經陸續普及嘅 WiFi 6 標準。

Screenshot 2020-05-16 at 11.15.08 PM copy 3

即刻Click入去我條Unboxing片,睇下點解我會比多啲錢都要買第10代Intel 處理器嗰部!

(手機用家請按此:https://www.youtube.com/watch?v=NFuuyL5vnMA

 

John K on YouTube: http://www.YouTube.com/KjohnK

John K on Facebook: http://www.facebook.com/hkjohnk

Read More
2019年04月28日

懷念那些雞肋的電影同名遊戲

(此文不含任何復仇者聯盟劇透,放心)

Screen Shot 2019-04-29 at 7.44.02 AM
(設計圖片)

睇完Avengers End Game,百感交集地離開戲院。除咗不斷回味精彩劇情之外,突然間仲唔知點解好想打機。唔係完Days Gone或者隻狼,而係想玩一隻可以俾我以互動形式回味番電影嘅Avengers End Game:The Official Game。無奈記憶中除咗LEGO遊戲系列之外,近幾年都無呢隻歌仔唱。

iron-man-2-ps3-original-D_NQ_NP_758188-MLA27493004272_062018-F

講緊嘅呢隻歌仔係大概2008至2014,主機同手提機品種最多嘅光輝歲月,有Xbox 360,PS3,Wii,PSP,NDS,有當時開始盛行嘅初代iPhone,iPod touch同iPad,當然仲有永垂不老嘅PC。遊戲開發業正以全速生產大量遊戲,除咗獨家大作例如Uncharted,Halo,Gears of War,運動遊戲,隨住家中網速發達而變得越來越受歡迎嘅多人射擊遊戲,另外有一個特別嘅遊戲類別:就係永遠都趕到同戲院上映時間同步推出嘅荷李活大片同名遊戲。

 

相信大家對此類遊戲嘅印象各有不同,記憶中呢類遊戲響每個星期買黎睇嘅game書裡面評分通常不高… 原因大概為「粗製濫造,純粹趁電影上畫呃錢」「買俾個仔玩ok,自己唔會考慮」「留番俾無知家長中伏」等等。我自己都玩過幾隻,見解其實都大同小異。有時滿心期待一套電影時,一心捻住玩吓隻同名game熟悉一下角色人物背景,誰知玩到第三關俾隻game劇透,欲哭無淚。同時我又明白點解呢類評價最多係不過不失嘅遊戲,當時出極都有。家長買得放心,「反斗車王」喎,買俾仔仔玩保證佢唔會受色情暴力粗口影響,變壞。晚晚Gears of War打到天光嘅男友們買得放心,終於可以同bb講「其實有game啱妳玩㗎!妳睇我仲特登買個粉紅色手制,以後咪可以一齊玩囉。」雖然最後可能望住bb玩到啶爆個粉紅色手制都過唔到教學關。

 

你可能會問:今時今日仲有咁多荷李活大片,既然有錢搵點解呢個趨勢無再繼續呢?我估其中一個係成本:因為要達到最佳宣傳效果,必須所有市面上嘅主機都有得玩。班開發者就多得你唔少,又要等劇本寫好,甚至套戲拍攝埋尾先可以完成開發,又要俾電影商approve。以上動作要整起碼四個主機嘅版本,手提機版本又要將就機能同時不失精彩程度。最慘係趕頭趕命同電影同期推出,套戲劣評如潮你就齊齊仆直,套戲收得帶挈你賣到幾萬隻,又要得果60-70評分,俾人笑雞肋。呢啲作品寫響自己張resume又係雞肋feel,為乜呢?我去Epic Games見工好過啦。另外一個理由就係電影宣傳budget用咗響各大社交媒體嘅廣告上,大家睇吓今個禮拜上兩分鐘Facebook IG睇到幾多個Avengers廣告就知。

 

心水清嘅機友會話「咩2008至2014啊,超任時代咪有未來戰士2,阿拉丁,獅子王果啲玩囉。的確係,不過須知道當時遊戲係有相當質素保證,超任隻阿拉丁更加係Capcom整魔界村個team做,好玩到飛起。同好似Avatar:The Game果種全機種大包圍,只求同電影同年同月同日生,玩起上黎唔係交行貨就係bug到爆。玩完分分鐘整壞埋套戲嘅形象。

1082138-960541_20091201_001

懷念呢啲嘢,有時可能真係捻吓就好喇。套End Game咁精彩,我真係唔想佢有任何污點。最多咪買PSVR,j吓隻Ironman VR。

John K on YouTube: http://www.YouTube.com/KjohnK

John K on Facebook: http://www.facebook.com/hkjohnk

 

Read More
2019年04月23日

次世代主機設計無獎競猜遊戲

Screen Shot 2019-04-23 at 11.22.48 PM

最近我朋友Send咗條YouTube Link比我,佢話你睇吓最新嘅Playstation 5 嘅外型幾犀利!我同佢講其實Sony唔會好似Apple咁會有啲流出啲PS5資料俾我哋睇到嘅。佢係都要同我講話佢條Link係堅,仲話攞$500出嚟同我輸賭。。。我心諗哩 $500真係志在必得。講真, 而家嘅concept art真係做得好差,SONY 點會設計一部仲大過XBOX嘅機出來?我完全睇唔到係Sony嘅一貫style。不過幅圖同埋依一個YouTube video都欺騙唔少人。再講人地咪一早講咗PS4好賣得濟,lead緊MS連尾燈都一早消失,起碼玩埋2019年。我心諗我朋友信左都真係幾白痴喎,仲要同我輸賭。最後叫朋友留番果$500用黎襟鐘,我同佢講相信Sony應該好快會透吓風,因為自己跟開好多遊戲媒體都越發越多PS5硬件/設計猜測。

 

結果聽咗一輪樓梯響,上星期真係有料放。Sony Playstation 5主設計師Marc Cerny終於受夠一眾網上鳩估,接受訪問時確認咗幾樣已經決定嘅配置同技術。用SSD當然正路,一來成本已經到咗大眾接受程度,二來無理由當機能跑到曉飛時反而被load硬碟成為樽頸㗎?支援8K我個人感覺都係果句:今時今日其實有幾多初代PS4用家特登升級去Pro機黎玩4K HDR?4K技術呢個字眼雖然落黃金,豐澤隨處可見,但首先細mon出始終難見分別(貴價電腦mon唔算),再講你問sales佬又會發現原來有「真偽」4K,咁複雜你話一般大眾點會咁快認同佢做新標準呢。支援PS4遊戲呢個當然係拍手位啦,講老實我仍然覺得PS4仲係一部好新,好強大嘅遊戲機。聽到人地用「對應上代遊戲」呢個講法有啲奇怪。不過!人地又醒喎,無講明係純機能上對應PS4,定係入隻PS4遊戲碟入PS5會玩到。今時今日買game可能都係PSN買數碼版比較有遠見。PSVR對應就梗啦,千幾二千蚊套眼鏡,你話玩埋今年就無?剩低果堆唔駛賣。

 

PS5外型就當然無公布,呢個時候想起細個睇超任一族,遊戲誌等game書。互聯網未流行,更加未有智能手機時,年中都會登出「次世代主機設計概念圖,參考機能」等欄目。印象深嘅例子有曾經叫做Ultra 64嘅N64,3DO胎死腹中嘅後繼機M2,傳咗好耐嘅NeoGeo CD呀。近年例子有Wii,Wii U,Switch,次次都令人估餐懵。睇啲千奇百怪嘅主機手制預想圖,天馬行空,細個覺得梗係越大部越勁抽啦!你睇NeoGeo餅遊戲帶成本字典咁厚就知。

 

所以到咗資訊泛濫嘅今日,每逢有任何次世代主機嘅疑似風聲,網上又會出現一堆競猜CPU GPU RAM底板等嘅無獎遊戲。有熱心人更加會自行提供埋3D render,連手制都幫人設計埋,好有心機。不過隨住科技發展得越來越快,每樣技術嘅淘汰壽命亦相對變短。當二十年前講緊PS2用DVD媒體取代當時盛行嘅CD,可以裝到幾大隻game,幾多資料時,而家就無得咁樣估喇。屋企條光纖線速度越來越快,Google一個Stadia話俾大家知,未來遊戲容量絕對已經突破咗無限大了,MS前兩日亦公佈一部無光盤機嘅Xbox One。數碼時代從你無再去好景四樓果日就開始咗喇!

 

咁咪即係以後無得再玩競猜遊戲?又唔係嘅,反正你準備好將屋企條cable速度谷到有幾快得幾快,部電視有咁高K得咁高K,以後就算無錢買主機都保證得到最高嘅打機享受喇!邊個可以拍心口話未來PS6唔會變成好似Netflix咁嘅純訂閱服務?軟件媒體已經黃昏,硬件估計亦不遠了。冷不防Sony幽大家一默,將其今年愚人節果個PS4主機鑰匙扣概念反轉,同你講PS5將使用全雲端硬件,所以真係一粒USB咁大就搞掂晒,仲可以當鑰匙扣用,問你死未。

 

John K on YouTube: http://www.YouTube.com/KjohnK

John K on Facebook: http://www.facebook.com/hkjohnk

Read More
2018年11月01日

對mini風氣又愛又恨之「迷」

Screen Shot 2018-11-01 at 1.12.27 PM

94年PS1推出日,大家落game舖格價買水機時應該唔會估到二十年後,會有一部即插即玩,有20款精選遊戲嘅PS Classic,仲要有官方午夜開售。自從老任開拓左迷你主機呢個新市場後,各遊戲硬件公司都爭先恐後召喚機迷嘅童年回憶。雖然我都係當局者迷嘅其中一人,但心水都好清:童咩年回憶吖,可以低成本出官方模擬器,唔駛大量人力搞甚麼新模式,畫面重製就有得立刮一筆,除非你同錢作對先唔會考慮。無可置疑,用兩三隻PS4 games嘅價錢就可以方便地重溫細個煲到翻天嘅經典遊戲,最重要係就算俾你摷得返部已經變黃嘅PS1都要先確定個頭仲讀到碟,啲遊戲又去晒邊度?然後又要搞條線先出到HDMI,因為屋企部電視就算有三色線,你對老花眼都睇到好辛苦。

Screen Shot 2018-11-01 at 1.18.10 PM

老任出迷你紅白機,大家齊讚「完美!」(如果唔駛食炒價的話)再黎迷你超任,正啊喂!Neo Geo又mini,連雅達利,Commodore 64都玩埋一份。PS Classic一公佈大家就已經等唔切問幾時有Sega Saturn mini同N64 mini。發展到呢個地步時我就開始有啲要求,尤其對於PS Classic其實有好多位希望Sony可以聽取玩家意見,以後出PS2 Classic時會考慮:

 

支援讀碟功能:係,成本會增加!不過我隻FFVII數吓數吓已經買左不下五次,黎緊第六次。有好多玩家好有心收藏好當年嘅心愛遊戲,就係等緊來日有部可以直出HDMI嘅主機,玩返夠本。哪怕你想保持成本,可以考慮為現世代主機追加一個將舊PS遊戲讀取,然後將遊戲data傳到Classic機嘅功能。唔好同我講你唔肯做係因為版權問題,電腦版PS1/2 emu都唔知盛行左幾多年,連手機都模擬到,可見Sony根本無心情處理rom呢個問題,你都係面對現實啦。有呢個功能咪唔駛響FB回comment解釋點解PS Classic無蘿拉無機戰囉。

 

追加網絡連線功能:有兩個好處。首先而家已經好少人放工放學「去老友屋企打機」了,買左FIFA都留響屋企爆卡啦。如果可以同我PSN上嘅朋友得閒整返舖Winning 8,我直頭會拉埋個friend落game舖一人買一部。PS Classic跟兩個手制的確好貼心(唔似得小氣方丈),但如果唔想玩家三分鐘熱度玩兩下就擺埋一邊舖塵,加個network mode絕對大量加分。二來你都係想賺錢,點解唔俾玩家連上PSN買經典遊戲呢?錢喎!

 

讀取記憶卡功能:上面講過,好多機迷嘅珍貴回憶都存響張PS1/2 memory card度。Sony想你重頭玩起呢樣我明,畢竟畫面高清化都有做過功夫,當然想玩家重新體驗。但真正貼心嘅做法係令我地終於唔駛擔心張二十年嘅mem card有日失靈,啲saves無晒。

 

遊戲中文化:而家唔係好興嘈遊戲公司唔整漢化咩?整左中文又投訴無繁中,有繁中又問有無粵語配音,乜現今教育制度真係搞到我地咁蠢?其實我呢點都係純跟風,貫徹港人精神嘈左先算,因為全世界得中國人打機㗎咋!超任隻FFVI我望住堆日文咪又爆機,不過當然有中文絕對係好,因為人地遊戲個故事落左好多心機寫。

 

(手機用家請按此:https://www.youtube.com/watch?v=YTYnNZRJscQ

 

John K on YouTube: http://www.YouTube.com/KjohnK

John K on Facebook: http://www.facebook.com/hkjohnk

Read More