2018年11月01日

對mini風氣又愛又恨之「迷」

Screen Shot 2018-11-01 at 1.12.27 PM

94年PS1推出日,大家落game舖格價買水機時應該唔會估到二十年後,會有一部即插即玩,有20款精選遊戲嘅PS Classic,仲要有官方午夜開售。自從老任開拓左迷你主機呢個新市場後,各遊戲硬件公司都爭先恐後召喚機迷嘅童年回憶。雖然我都係當局者迷嘅其中一人,但心水都好清:童咩年回憶吖,可以低成本出官方模擬器,唔駛大量人力搞甚麼新模式,畫面重製就有得立刮一筆,除非你同錢作對先唔會考慮。無可置疑,用兩三隻PS4 games嘅價錢就可以方便地重溫細個煲到翻天嘅經典遊戲,最重要係就算俾你摷得返部已經變黃嘅PS1都要先確定個頭仲讀到碟,啲遊戲又去晒邊度?然後又要搞條線先出到HDMI,因為屋企部電視就算有三色線,你對老花眼都睇到好辛苦。

Screen Shot 2018-11-01 at 1.18.10 PM

老任出迷你紅白機,大家齊讚「完美!」(如果唔駛食炒價的話)再黎迷你超任,正啊喂!Neo Geo又mini,連雅達利,Commodore 64都玩埋一份。PS Classic一公佈大家就已經等唔切問幾時有Sega Saturn mini同N64 mini。發展到呢個地步時我就開始有啲要求,尤其對於PS Classic其實有好多位希望Sony可以聽取玩家意見,以後出PS2 Classic時會考慮:

 

支援讀碟功能:係,成本會增加!不過我隻FFVII數吓數吓已經買左不下五次,黎緊第六次。有好多玩家好有心收藏好當年嘅心愛遊戲,就係等緊來日有部可以直出HDMI嘅主機,玩返夠本。哪怕你想保持成本,可以考慮為現世代主機追加一個將舊PS遊戲讀取,然後將遊戲data傳到Classic機嘅功能。唔好同我講你唔肯做係因為版權問題,電腦版PS1/2 emu都唔知盛行左幾多年,連手機都模擬到,可見Sony根本無心情處理rom呢個問題,你都係面對現實啦。有呢個功能咪唔駛響FB回comment解釋點解PS Classic無蘿拉無機戰囉。

 

追加網絡連線功能:有兩個好處。首先而家已經好少人放工放學「去老友屋企打機」了,買左FIFA都留響屋企爆卡啦。如果可以同我PSN上嘅朋友得閒整返舖Winning 8,我直頭會拉埋個friend落game舖一人買一部。PS Classic跟兩個手制的確好貼心(唔似得小氣方丈),但如果唔想玩家三分鐘熱度玩兩下就擺埋一邊舖塵,加個network mode絕對大量加分。二來你都係想賺錢,點解唔俾玩家連上PSN買經典遊戲呢?錢喎!

 

讀取記憶卡功能:上面講過,好多機迷嘅珍貴回憶都存響張PS1/2 memory card度。Sony想你重頭玩起呢樣我明,畢竟畫面高清化都有做過功夫,當然想玩家重新體驗。但真正貼心嘅做法係令我地終於唔駛擔心張二十年嘅mem card有日失靈,啲saves無晒。

 

遊戲中文化:而家唔係好興嘈遊戲公司唔整漢化咩?整左中文又投訴無繁中,有繁中又問有無粵語配音,乜現今教育制度真係搞到我地咁蠢?其實我呢點都係純跟風,貫徹港人精神嘈左先算,因為全世界得中國人打機㗎咋!超任隻FFVI我望住堆日文咪又爆機,不過當然有中文絕對係好,因為人地遊戲個故事落左好多心機寫。

 

(手機用家請按此:https://www.youtube.com/watch?v=YTYnNZRJscQ

 

John K on YouTube: http://www.YouTube.com/KjohnK

John K on Facebook: http://www.facebook.com/hkjohnk

Read More
2018年10月25日

Red Dead Redemption 2:邊止騎馬版GTA咁簡單?

Screen Shot 2018-10-25 at 7.56.51 PM

唔知有幾多人仲記得West World呢套美劇呢?當我上年讚嘆緊劇裡面呢個西部模擬公園設計得好好時,第一樣聯想到嘅係八年前一隻PS3遊戲,叫Red Dead Redemption。漫無邊際嘅沙漠,被自己政府威脅嘅John Marston騎住馬睇日落,背後一對敵人屍體但仲有一班追兵。目的好簡單老土,要救番老婆子女,但點解玩到結局我眼濕濕?一隻唔知從邊度殺出黎嘅game,令我呢個本來對西部時代毫無認識,細個睇金庸多過奇連伊士活嘅人服到五體投地。個個話GTA好玩,我贊成,但Rockstar呢個開發公司嘅才華絕對唔止呢個系列。所以整整兩年前當Red Dead 2正式公佈時,我仲興奮過佢話出GTA 6。

 

上年宣佈延期,今年年頭再延… 聽日!今次打龍捲風我都會第一時間落街攞。最近兩個月出咗好多games,莎木蜘蛛俠Mario Party,好快佢地全部都要讓開一段時間,事關Red Dead 2故事模式已經有60小時長嘅內容,只係講緊單機!Red Dead Online仲可以同戰友流浪荒野伸張正義,再唔係約打劫火車。今次世界設定係上集嘅前傳,即係話西部係一個比上次更加無王管嘅世界,可以話係無政府狀態。難玩度提高:同時只可以帶有限武器,騎馬行水仲會令槍枝生鏽減短壽命。雖然主角係惡黨成員一名,唔代表去到邊都要血洗,適當時候可以選擇低調。

Red-Dead-Redemption-2-horse-loyalty-gameplay.jpg.optimal

「係就係整GTA間公司出,不過西部牛仔唔知道有乜好玩囉,個世界觀離現實咁遠,感覺好難代入角色」

 

計我話世界觀黎現實世界越遠越好!打機嘅目的本身就係為咗俾自己有一兩個鐘遠離現實,天馬行空嘅機會,等我唔好煩打工煩人際煩錢。咁真實做乜?聽日一早返工就係啦,你等唔切?你我都想做蜘蛛俠,做戰神,做桐生一馬,我唔認識任何人想做Job Simulator主角。點解Red Dead 2唔止係騎馬版GTA咁簡單,作為玩家嘅你要親身代入Arthur Morgan去感受。我最期待嘅係了解多啲第一集主角嘅背景,同埋與Arthur嘅瓜葛。

(手機用家請按此:https://www.youtube.com/watch?v=HVRzx17WHVk

 

(手機用家請按此:https://www.youtube.com/watch?v=yoFvVAMcwOE

 

John K on YouTube: http://www.YouTube.com/KjohnK

John K on Facebook: http://www.facebook.com/hkjohnk

Read More
2018年08月26日

對《莎木3》仍然有期待

曾經係風雲一時嘅世界首個FREE(Full Reactive Eyes Entertainment)類型遊戲《莎木》,當年響Dreamcast推出導致唔少人出機。99年中學雞嘅我雖然DC一早已買,但VF3同Sonic都視為前菜,真正期待嘅係年底前出嘅莎木。仲記得響中學同朋友喺GAMESTOP排隊買嘅情況。畫面上當然震撼,但最鍾意係響遊戲裡面嘅虛擬橫須賀探索冒險,可以搵路人傾計,可以去神社探貓,連去機鋪打機扭蛋都有!所謂FREE唔止係眼睛想旅行咁簡單,而係模擬住響一個80年代日本小鎮果種感覺,雖然唔係完美毫無缺點,但真係好佩服鈴木裕細心嘅程度。故事同角色設定係同無線劇一樣老土,無壯大世界觀或者魔法變身等等,不過偏偏就係好多細微位令到呢隻遊戲唔可以同一般RPG比較。當時機友們都未被寵壞,日本遊戲無中文版係理所當然,咪落街買本小說式攻略囉。後來出二章時DC前景已經危危乎,心捻咁之後果九章點算?

Screenshot 2018-08-26 18.18.16

2015鈴木裕響網上宣布成功向SEGA爭取莎木遊戲版權,正式以眾籌形式開發莎木3,十五年啊!Virtua Fighter都出咗兩代,當年唔少中學雞而家個仔都準備做小學雞喇。Ubisoft夠時間出15隻刺客教條加DLC喇我dls!本來以為普天同慶,但係觀眾眼睛係雪亮嘅。而家唔係世嘉而係你同我做鈴木裕個老闆,你想我投資,俾到我啲咩貨色先?果然睇過初公布嘅畫面後,評語好壞參半。雖然針對畫面差呢個點好似有啲不公,但的確而家睇到嘅淨係得果段表情僵硬嘅演示片嘛,畢竟十五年來出過太多好遊戲,如果唔係鈴木將自己個名都撻埋出黎,分分鐘個kickstarter都籌唔夠最低金額。

 

前幾日好開心買到莎木1+2中文重製版,終於唔駛靠攻略喇!同時莎木3終於推出有期,剛好就係1+2重製版推出嘅一年後。講到尾,我發現自己仍然係對莎木3充滿期待。仔細捻清楚,亦唔係完全由於兒時回憶逼使咁簡單。我當然想知道芭月涼同玲莎花最終發展會如何啦!等咗咁多年,唔好話斷尾,就算爛尾我都想了咗個心願。二來就係玩過1+2嘅中文版,投入度大增令我重新愛上呢個系列,想了解所有遇到嘅人生命裡面嘅故事,同埋主角背景等等。再講,而家家用機機能真正可以做到FREE呢種遊戲體驗,我好想知道鈴木會唔會將當年因為技術/資源所限而無用到嘅想法都放響第三章,做一隻佢等咗十五年終於做得出嘅作品。同埋當然唔少得而家聽番仍然係遊戲界裡面數一數二經典嘅莎木配樂,主題曲裡面帶有濃厚中國風嘅悲壯感覺,《莎花》果把溫柔滄桑嘅女聲,我好少對遊戲配樂有期待,但呢隻絕對屬例外。

 

最後一點,係俾面世嘉的。雖然對於當年DC生不逢時有啲可惜同感嘆,但我肯定自己唔係唯一一個響呢部機上面消磨過好多快樂時光嘅玩家,身邊嘅機友亦好少聽到有人後悔買咗呢部世嘉背水一戰嘅最後主機。慶幸嘅係SEGA爭氣,又或者話肯吞下呢口氣,接受現實並繼續為其他主機開發遊戲,唔係的話今日都無人中之龍玩。

 

(手機用家請按此:https://www.youtube.com/watch?v=3dC5PLrUIZY)

 

(手機用家請按此:https://www.youtube.com/watch?v=UweI4Ra2QbM)

 

John K on YouTube: http://www.YouTube.com/KjohnK

John K on Facebook: http://www.facebook.com/hkjohnk

Read More
2018年08月19日

Biohazard 2 Remake 用心炒好呢碟飯

(桌面用戶請按此:http://blog.menclub.hk/johnk/?p=789

 

 

今年E3公布嘅生化危機2重製版,賽後被譽為Sony發佈會其中一個大驚喜(Death Stranding gameplay影片唔算,因為一早講定會show)。Capcom「冷飯王」呢個朵一洗頹氣,重新獲得老餅擁躉嘅愛戴同期待。BH2 Remake亦係自2002年Gamecube版一代Remake之後最落本炒嘅冷飯,說明只要揀啱材料,冷飯未必一發佈就俾人話公司有心搵水籌年尾花紅。

 

Screenshot 2018-08-19 22.38.13

 

繼續閱讀»

Read More
2018年05月20日

虧玩大阪2018!?

Screen Shot 2018-05-20 at 8.46.44 PM

 

 

好似無幾耐之前先講完東京,最近又思鄉症發作,去咗大阪五日。相比起最多人選擇去嘅東京,關西又係另一番風味。

 

大阪感覺同東京最唔同地方:

- 大家可能覺得東京係人流頻密,車流更密嘅城市,但我對大阪嘅印象反而係逼過東京。可能因為所有嘢無論商場,餐廳都細一個碼,所以就算旅客量一樣多,響大阪都塞得密啲
- 講到食飯,今次其實唔太可以作準,因為好多餐都虧住黎食,下面解釋⋯不過總括印象比東京好,應該話好容易就搵到好嘢食
- 但係買嘢方面就無得比了,唔係無新嘢買,但有都只係得果幾個地方有。亦無機會見到類似東京原宿街頭咁有代表性嘅店,遊客店居多。畢竟大阪出名嘅唔係走在潮流尖端
- 想買中古games,有超薯。不過選擇同價錢都未見吸引

 

繼續閱讀»

Read More