Nintendo Direct 後感：瑪里奧和他的奧德賽
尋日睇iPhone X發佈會已經夜訓，點知今日又要六點起身睇任天堂Nintendo Direct，已經講好主要話題係10/27推出嘅Switch大作Super Mario Odyssey。45分鐘睇完剛好返工。不過講新作之前，必須先回憶童年…
我仲記得96年夏天，無驚無險地完成中二後（最重要過咗家長日仍然四肢健全…），拎住兩千幾蚊落銅鑼灣糖街地庫準備買當時嘅老任新機N64。當時唔識睇specs，唔知道乜野多邊形運算，最高解像度等等數字野。我淨係記得同學game書一致認同呢部野立體能力極強，任何遊戲響果部機度推出都會係全3D，超厲害。
落到去睇實機示範，第一隻見到嘅係Wave Race 64。「嘩」一聲，果然好3D，尤其係d立體水，真嘅一樣。再睇另一間舖，有人出機試緊Super Mario 64，原來呢隻先係真正打開我眼界嘅3D遊戲：從Press Start畫面見到好大個立體瑪里奧頭四圍望，仲可以拉佢個鼻。入到第一關，個世界咁大嘅？！我當時先猛然發現其實瑪里奧大叔之前一直困響一個平面嘅世界內進行冒險，上下左右四個方向係咁多。但而家… 360度任我行，我望到十點鐘同一點鐘位置都有敵人，三點鐘位置就有個金幣。好亂啊！
「嗱，試下先啦」game舖老闆遞個手制俾我。
「呢四個黃色制，專門控制鏡頭架。呢部野隻隻game都全立體！」
結果淨係夠錢買一隻game嘅我就揀咗Super Mario 64，之後就一直以佢作為一隻完美3D動作遊戲嘅標準。日本權威game書Fami通當時亦給予評分39/40，N64呢隻頭砲一野打入白金殿堂（35分以上先入到，史上得到39分或以上嘅作品不夠100隻）。
之後每隻為任天堂新機護航嘅瑪里奧作品當然都有一定品質保證，但同時我又開始覺得好似隻隻差唔多，都係上山下海搵金幣，踩敵人，如城堡，打庫巴，救公主。我發現瑪里奧大叔都幾孤單，成日一丁友去冒險。個公主救幾十萬次都仲係俾人捉走，真係唔患心臟病都焦慮症。
當老任響上年年尾公布Super Mario Odyssey時，我眼前一亮：竟然用實景，唔再係蘑菇城堡？同埋最重要，阿叔頂帽有眼嘅喂！後來發現頂帽（Cappy）原來將會係故事裡面嘅關鍵角色，終於唔駛隻身上路了。
前幾個月，見到gameplay示範同聽過製作人訪談之後，我就真正開始期待下個月可以玩到呢隻新作喇，因為製作團隊嘅目標就係想回歸Super Mario 64果種100%自由度，由玩家自己決定節奏嘅冒險。Mario仲可以將Cappy投向物件甚至敵人，從而使用特殊能力，例如將Cappy飛落發電機上可以令Mario成為一股電流，可以任意隨住電纜遊走。瑪里奧仲可以變埋恐龍甚至敵人蘑菇怪？！有捻頭！淨係慢慢發掘唔同種類嘅變身已經可以玩一大輪，到時用joycon玩應該有唔少驚喜。
今朝嘅N Direct主要係補完一d細節，例如一人做Mario，一人做Cappy嘅雙打元素，如何用Cappy以意想不到嘅方法解迷，各個世界觀簡介同埋Photo Mode等社交網絡功能。講真下個月就出，以老任做事十拿九穩嘅作風其實都唔會有甚麼重大改變。仲以為今日就有Demo玩但原來無，唯有繼續熱切期待。
下個月二十七號：曾攻破蘑菇城，Sunshine City，甚至連宇宙都去過，來回地獄又折返人間嘅瑪里奧大叔，今次帶你去包括以紐約作藍圖嘅New Donk City，沙漠，熱帶雨林等不同王國。遊戲名稱中嘅Odyssey正係帶著瑪里奧同Cappy環遊世界嘅飛空艇個名。仍然係英雄救美但橋唔怕舊，起碼今次有Cappy兩條友一齊受。講起公主，大家有無發現公主永遠係公主，而唔係瑪嫂？呢個定律有可能今集會被打破，因為收到風隨遊戲推出嘅Amiibo裡面有婚紗（！）造型嘅公主同Mario。同樣作為一個三十幾歲嘅毒L，我衷心祝賀瑪里奧大叔終於成功脫毒。不過一睇實物，唉… 庫巴都有禮服look啵，睇黎還需看下回分解。
如果睇到呢度即刻有出Switch嘅衝動，可以留意Super Mario Odyssey同捆特別版主機，仲有其他配件分開賣。
另外觀察到一樣野：Super Mario系列遊戲好似從來未試過出現有歌詞嘅主題曲，Odyssey響呢方面亦打破傳統。近幾個月都不斷loop呢首Super Mario Odyssey主題曲「Jump Up, Superstar!」，望住遊戲logo上面果隻環遊世界嘅Cappy，越來越覺得今集真係零舍唔同：有種無憂無慮遨遊四方嘅成熟浪漫感。推薦俾鍾意jazz/swing類音樂嘅朋友。
想睇番成個Nintendo Direct發佈可以睇下面，有大量其他消息包括3DS Pokemon Ultra Sun/Moon，火紋無雙新角Lynn登場，Xenoblade Chronicles 2詳盡介紹，新2DS XL顏色等等：