JOHN K » Blog Archive » 淘嘢性情：點解港人愛馬雲…貨

2017/09/20

淘嘢性情：點解港人愛馬雲…貨

最近見到一段馬雲扮Michael Jackson出場，為阿里巴巴年度大會揭幕嘅短片，網上評價恥笑居多。我作為電影娛樂界嘅支持者，得到嘅感覺係震驚十三億大腦細胞：因為由出場到落電單車時明明係”This Is It”，脫下面具之後原來係“The Lego Movie”。

(相片取自 Photo courtesy of HollywoodReporter：https://goo.gl/xBPZ6o)

言歸正傳…

大家有無發現而家閒談間唔會再有人講

「吓你有淘寶account？你上去買咩野？」

今時今日，而係會講

「吓你無淘寶account？咁你點買野？」

網上購物並唔係甚麼新鮮事，淘寶網亦當然唔係香港第一個網店，嚴格黎講人地本來唔受香港玩添。最令人讚嘆嘅係港人對淘寶嘅印象，由上面第一句話進化到第二句之間，不過十年。呢個係Amazon響整個亞洲都必未做到嘅成績，究竟淘寶係如何打進香港呢個充滿精明消費者嘅市場，呢個留番俾新聞透視嘅專家講。我主要係想簡單分享近年港人嘅購物習慣裡面，有邊幾方面係直接或間接被淘寶嘅成功而改變。

1）「睇吓淘寶有無先買」

都講咗香港人都係精明消費者，就算唔講價都一定格價。同時間，我地又唔鍾意等，買野當然想即磅即享受。所以未有淘寶嘅年代，同你講大陸買平幾多，對聽者黎講意義唔大。唔通買個電話殼又跑轉深圳咩？所以如果本身唔係經常北上，或者唔識人，俾本地店家賺吓錢係要嘅。

今時今日小店東主生意難做。顧客手機按幾按，雖然唔係批發價但都夠晒平，運費又唔貴，幾日後送到我府上或者office。好多淘寶店東售後服務仲超好，件野到咗有咩問題就「親，沒事。給你免費再發個新的」唔只價錢，有新產品你入慢咗，客人又係會自行淘寶搞掂。整體黎講連成個商場生意都受影響，因為反正淘咗件野過兩日都到，咁就行少轉高登188，亦少咗機會睇到其他舖頭賣嘅野。

本來已經面對大財團連鎖店收舖同埋業主每年加租嘅壓力，再要同淘寶鬥低價，我地經常掛在口邊果句「支持小店」似乎只適用於本地自家品牌，名牌／發燒嘢同埋食店

2）「反正淘寶野，壞咗咪買過」

再聰明嘅消費者都會犯嘅一個錯：就係覺得「少錢唔係錢」。其實你條lightning線用咗幾次就充唔到，人地「親，沒事」俾條新嘅又係同樣情況，再淘過條第二個牌子嘅又用唔長，係咪一早去Apple Store買原裝好過呢？不過我自己經驗係而家淘寶貨有好多都係高質耐用，視乎你肯唔肯花時間睇吓評語做吓功課。

自從有咗淘寶，生活裡面有好多範疇都有得「貴有貴玩，平有平玩」。例如我呢d鍾意打機同埋電子gadget嘅，最近買嘅幾樣遊戲配件例如Switch散熱王，USB便攜芒同埋Switch嘅PS4手制轉換器全部都係淘寶購入，睇我嘅開箱片就知。可能我好彩，三件野都好使好用。我仍然係會留意原廠配件嘅消息同評價，但講到尾買野有多個選擇係好嘅。同埋唔好唔記得大陸廠好多時創意無限，例如Switch散熱王呢類產品我係因為原廠dock實在太容易過熱先買番黎試。