（追加開箱片！）迷你超任嚴重短缺 ! 兒時回憶買定唔買？
（桌面版連結：http://blog.menclub.hk/johnk/?p=188）
2016年七月，任天堂正式宣佈推出其廠第一部家用機Famicom（俗稱紅白機，美版叫灰機Nintendo Entertainment System）嘅重製mini版，收錄三十款經典遊戲，HDMI高清輸出，部機的的骰骰十分得意，插上一比一大小嘅手制，啲童年回憶立刻番晒黎。講緊嘅係一眾70同80後，大部分已經level up到老豆級數嘅初代機迷。阿仔，爸爸終於可以同你雙打魂斗羅喇！90後嘅任粉亦可以對呢間家傳戶曉嘅公司同埋其起源有更深認識。
(網上資料圖片)
同年十一月大喜之日，爸爸放工落好景，上緊樓梯聽到熟悉嘅「孖寶兄弟」主題音樂，彷彿回到自己細個第一次玩World 1-1嘅時光。老闆唔該俾部。吓？無預訂要799？部嘢定價5980yen你計十幾算係咩玩法？過隔離問，888都敢開…
結果，本來原意係等大人細路都可以用一隻PS4遊戲嘅價錢重溫任天堂經典作品，而家變咗一碟價高者得嘅炒海鮮。爸爸最後終於以接近原價買咗都唔知開唔開黎玩好，因為部嘢好炒過iPhone（當然唔係講緊8）。
(網上資料圖片)
快速前進到今年六月，任天堂宣佈萬眾期待嘅精選懷舊金曲第二炮：超級任天堂mini。同時拍心口保證今次出貨量將會「大增」，仲要將本來已經停產嘅FC mini重新恢復量產，大打強心針。好啦信你，不過落好景問老闆仍然會同你講幾大都落咗訂先，因為北美歐洲果邊一開訂已經全部滿額，日本果邊嘅水貨佬亦已經開咗個高一倍嘅來貨價。上星期日本Amazon忽然開訂，果然歷史重演，幾分鐘內沽清，然後價錢直線上升。到執筆之時最高見過炒高原價7980yen四倍。
老任，岩岩先讚完你紀念前社長，重感情，咁對支持你嘅機迷呢？上年為咗可以同仔仔雙打魂斗羅而銀包穿咗個窿嘅爸爸而家仲肉痛緊，你同佢講今年要俾四位數字先可以教仔仔玩孖寶賽車？你不如一槍…
首先，所謂增加產量，唔係話數字上比紅白機mini多就得㗎。自從上次大賺一筆嘅大鰐們，今次唔駛人教一定晒冷，因為只會更加和味。本來無興趣嘅人就算唔打算玩都買部黎炒吓。小炒怡情，大炒變李嘉誠。任天堂就算控制唔到炒風，至少可以出多啲貨降溫。
除非… 老任自己唔想咁做。
FC mini出貨失預算，Switch又黎多次，而家第三次。一個做咗過百年生意嘅公司，兩年內犯三次同樣錯誤，究竟係唔好彩定有人故意製造緊張氣氛，推高市場需求？北美Gamestop等賣開遊戲嘅大型連鎖店傳出同任天堂合作嘅怨言，話以超任mini為例，實際來貨量同本來講好嘅數量少好多，搞到店家要同預訂嘅客人解釋點解而家變咗要九月二十九當日親身排隊。日日就不斷消耗資源，接查詢嘅電話，員工又要受氣。可能你會問：無理由有錢都唔賺㗎，點解要搞到咁緊張？我嘅陰謀論好簡單：如果你聽到身邊朋友同事日日check住超任有無貨，超任有無貨，嘩果個site話下午有得訂，我已經開定五個tabs瘋狂F5… 久而久之你係會潛意識覺得呢件一定係好嘢，唔買就正傻仔。
(網上資料圖片)
無論邊個負責都好，超任mini價格都同花生一樣，已經炒香。心灰意冷嘅80後任粉，正準備離開好景呢個傷心地時，老闆話請留步！有無睇過國產嘅選擇先？嗱呢部，內藏600個遊戲，包括所有大作嘅中文版，對應SD卡，金手指慢動作，無限續關！
細個從來未玩過嘅「孖寶兄弟中文版」主題曲繼續響耳邊鳴奏…
John K on YouTube: http://www.youtube.com/kjohnk