2017年我最喜愛《第一身射擊》遊戲頒獎典禮
（桌面連接：http://blog.menclub.hk/johnk/?p=496）
《本人言論不代表MENCLUB立場》
年尾放假節目離唔開打住邊爐睇年度大事回顧，雖然大部分都應該唔係好新聞。Game友們相信亦會認同2017係十分充實嘅一年，所以今個月我將會一連幾集，每集響同一類別嚴選五隻作品，而且選出本人認為最出色一隻。歡迎大家參與討論或者分享你嘅五大！
第一炮：2017我最喜愛《第一身射擊》遊戲候選名單（排名不分先後）：
1) Call of Duty WWII
製作戰爭遊戲對於Activision黎講已經係熟手技工，即係英文所講嘅bread and butter。一戰二戰，宇宙大戰佢都做過，今次回歸原點（其實未係原點嘅，起碼唔係石器時代），將原本已經出晒名精彩嘅故事模式以更富電影感嘅形式表現，等大家就算已經對二戰歷史耳熟能詳，都可以充分投入主角嘅人生故事。
電腦AI做得好，玩家覺得自己有一隊Band of Brothers共同進退：預咗。玩家可以自行決定如何執行任務，並非望住箭嘴做人：預咗。人物3D貼圖象真度更高，皮膚真正白裡透紅：其實都預咗，畫面無進步點敢又收你三舊水。多人模式有得大家齊齊睇你開箱：呢個比較特別，但唔算驚為天人。唯一同以往系列作品最大改動就係連補充能源嘅方法都回歸到初代Call of Duty：只能用補血包，唔係自動回血。難度增加，玩家亦要比較動腦筋計畫如何以最有效方法通關。
聽落就四平八穩，無咩好投訴，無咩重大革新… 但呢個亦都係我最大控訴：咪就係乜嘢都好似同上年前年一樣咁囉。可以做嘅都做過晒，你未做嘅人地EA Battlefield系列都已經做咗，咁仲邊可能有新花式呢？除非侵仔聽日拉隊打北韓，為WWIII揭幕，否則唔該暫時唔好再整戰爭FPS喇。
2) Prey
近年興重製，而且有兩種口味：一個係HD化炒冷飯，可能追加少少新內容，另一種就係掛名完全重新製作，亦即係話除咗個名根本兩隻game黎。Prey屬於第二種，2006年果隻原版而家落188應該會響$30 games盒裡面搵到。
雖然話唔同，但故事大綱都係同06版相約：你從昏迷中醒來，宇宙飛船內出現神秘生物體，機艙人員逐個失去聯絡，僅餘生存嘅人類則開始出現易變… 你訓咗未？
Dead Space咪做過囉
Bioshock咪做過囉
FEAR咪做過囉
（老餅級機迷限定）System Shock 2都做過喇阿哥！1999年啊！我仲溫緊中五會考，容祖兒都剛剛出道咋。
重製唔係注定失敗，但成功例子佔少數。另外要注意嘅係呢類血腥恐怖類別近年實在出得太密，如果唔夠創新玩家們好容易見到trailer已經怕怕。撇除其他同類遊戲，Prey故事本身係幾好，而且亦有好似Bioshock裡面要你做一啲人性嘅選擇。如果你好耐無玩過呢類遊戲，係值得一試。
最後想講，遊戲裡面唔少jump scare。Hi你個Hi我無論睇戲定打機最憎就係jump scare。最嚴重就係呢啲唔止jump scare，反應慢啲就變埋jump death，checkpoint開始。這些機會不是我的。
3) Destiny 2
其實有無人知道Destiny 1個故事係講乜？我都唔清楚，淨係知道射射射，爆氣，跳，手榴彈，射射射，開石！唉，今次又無紫色裝備。重複。
如果唔係Bungie整多人合作FPS已經爐火純青，有一流操控同爽快感，加上自由度高嘅升級系統，其實當初Destiny好容易淪落為一隻平平無奇嘅射擊打怪grinder。咁既然玩得幾爽咁就睇吓今次有咩突破啦，話晒北美方面好瘋狂。唔知今次故事方面會唔會有解釋呢…
結果都係無。最令我失望嘅係我個所謂主角，仍然係笑都唔笑嘢又唔講。係，佢係拯救緊全宇宙，但佢捻緊乜？有咩個人恩怨，情緒，內心掙扎… 你係爆咗機都唔太有印象。試問玩家本身都唔緊張主角，又點會緊張其他角色，點樣投入故事呢？
多人模式仍舊適合三五知己打raid賺武賺裝，呢個就真係其他遊戲俾唔到嘅爽快。不過Destiny 1都已經做到呢點，仲做得好好，今次可以進步嘅位唔多。
“唔係喎，今次有三種全新武器類別喎！“
將一代果三種改咗名咋，咪當人傻仔先得㗎。
4) Wolfenstein 2
德軍打到黎美國！呢個世界觀唔錯，玩過第一代同New Order嘅朋友就會知道一日到晚都係響黑暗嘅城堡基地行動好寡。故事方面絕對係睇得出有落過心機，誇張得黎又合理。不過我覺得上集New Order故事做得太精彩，今次保持唔到個勢。
呢隻遊戲響系統上就算同上集改變不大我都受落，因為上次你主場，今次我主場。頭都係照爆，火都係照放。敵人設計方面有啲懶… 呢關打完一隻大佬，下一關首領係兩隻同樣嘅大佬.. 喂。
唔想劇透，不過個結局… 我以為Wolfenstein系列嘅指定埋齋動作係玩家親手做低希魔喎，說好的做低希魔呢？
講缺點，有！就係好學唔學，學蛇佬玩潛入。大佬你個主角BJ設定為Terminator筋肉男，仲潛乜鬼入啫，梗係行過去北斗懺悔拳啦。你問我的話，我覺得係製作者用作硬性增加遊戲長度嘅cheap招。
5) Overwatch
如果選2017年我最hype遊戲非呢隻莫屬。推出之前講到天上有地下無，五雷轟頂咁，原來有大台支持。暴風Blizzard相信玩PC長大嘅人唔會陌生，未玩過其作品都聽過或者睇人玩過。但今次唔係滑鼠殺手Diablo，竟然係FPS？單係呢點的確係幾令我好奇。
再睇人設，好日漫feel喎，隻game真係Blizzard出？有趣，有趣。再加上剛推出時出現“屁股門”事變，令作品嚗光度更上一層樓。雖然最後美術部吞咗啖氣改返人設以和為貴，我覺得唔係好型，但最後贏家咪又係Blizzard。
角色本身有唔同特殊技巧，而且講求團隊配合，唔可以當一般槍game看待。遊戲本身更加係迅速帶動世界電競熱潮，有唔少Twitch／Youtuber都係玩Overwatch出身。
不過，講故事方面… 原諒我打機一定會留意故事，Overwatch係無的。唔止，其實連一個正式嘅單人遊戲模式都無。唔上網無得玩，down server無得玩，最重要係：無人玩，你都無得玩。
當然啦，講壽命呢隻game唔會短，但一味鼓勵玩家競爭嘅遊戲方針始終唔係我杯茶。
———————
各位觀眾，2017我最喜愛《第一身射擊》遊戲，得獎作品：
Wolfenstein 2!!!
（手機用家請按此：https://www.youtube.com/watch?v=gNYpyPsTgz4）
可能我今年壓力大，但呢隻遊戲真係玩得開心，殺得放心。打機就係要過癮，BJ俾到我呢個感覺。不過唔好出第三集喇，唔係又變Call雕。