2017年玩得最多嘅手機GAME！
（桌面版：http://blog.menclub.hk/johnk/?p=540）
雖然我最大娛樂係打機，但如果再分仔細啲其實花最多時間上一定係手遊。無辦法，每日行街搭車，食lunch等人，戲院等開場，都會自動自覺開隻嘢黎督吓。無論係已經玩咗幾年嘅怪物彈珠，天堂2囉每日獎品，Marvel升吓呢，或者App Store有新作介紹我又會下載黎試吓。所以與其講我今年玩得最密嘅家用機（而家講埋都得，梗係PS4啦），不如直接介紹吓我響2017年投資最多時間落去嘅手遊比較現實。
首先當然係熟悉嘅怪物彈珠（Monster Strike），我已經唔記得頭尾玩咗幾耐(應該有三年，仲有幾日就攞50粒寶珠，遊玩1000日達成！)，淨係只每日唔玩唔安樂。奇怪在又從來無覺得想放棄刪app，究竟有甚麼原因令我咁忠誠呢？
https://www.youtube.com/watch?v=FiEbI2orT9o
- 作為手機GAME真係一流，拉住放，卡點開頭要有技術，之後慢慢會自然變成高手。
– 育成 Feel，將你嘅怪物到極運，大滿足!
– 台灣日本同步更新！台灣同日本有海量玩家。
彈完珠仲有時間，玩乜呢？認識我嘅朋友都知道我係Marvel死忠。細個睇蜘蛛俠漫畫睇上癮，近幾年Marvel攻破電影市場，新英雄電影直頭book到2020年都出之不盡。連Netflix劇都要追埋，真係大人細路好難唔認到兩三個Avengers。條Infinity War預告片已經俾我J到皮膚敏感，Hot Toys就買到我家人對我好反感。雖然呢兩年已經控制得好咗，但見到蜘蛛俠最新造型我就怕再次失守… 所以Civil War上畫期間時偶爾睇吓手機上有咩相關遊戲，發現有Marvel Contest of Champions呢隻免費（今時今日，除非你姓老名任，否則學人出收費手機game app真係一路好走。工具app不在此列）遊戲咁就試吓。
- 2D格鬥，簡單嘅包剪耷系統，易學難精。手機操控始終唔適合有太精準入力要求，瞬獄殺呢啲留番響大制上出啦。
– 經常因應新電影而推出相應資料包，我仲等緊抽中Hela。
– 以抽石形式獲得英雄，製作團隊堅持唔俾玩家直接買英雄，唔止game貨幣，真課都唔俾。我起初唔明呢種堅持，後來發現原因好簡單：我想要某個英雄，就要買石，唔想課金就要努力操現有嘅角色黎贏任務。過程中你會發現無形中對平時無咩興趣嘅英雄認識多咗，你亦會特別留意升級條件，佢嘅特別技能等。俾你一日儲齊成隊Avengers，第日已經擺咗響度，無動力煲了。
– 好多遊戲都有聯盟模式，唔係甚麼新嘢。不過同朋友組隊扮Avengers車輪戰打Thanos係幾過癮。
最後就係暑期出嘅天堂2了。韓game一直俾我印象係好靚但未必好玩。呢隻遊戲其實我當時每日好守時地煲，頭兩個月真係覺得好睇又好食。過咗lv75之後就開始吃力，而家無玩了，不過今年真係食咗我唔少時間，所以榜上有名。
- 人設！有女又有貓，同Monster Hunter一樣輕易得到我注意力。
- 畫面一流，呢個有好有壞。部手機舊少少都要調低畫質，否則輕則lag機，重則跳app。
- 好多嘢自動化，呢個又係有好有壞。方便當然係手遊必要條件，但連跑任同補血都可以全自動就真係有點兒太方便，我成日內疚覺得自己用緊外掛。當然挑戰比自己等級高好多嘅任務時會有必要換手動，但遊戲本身平衡度係調教到剛剛好可以自動化搞掂。
- 武器同裝甲有幾個唔同方式黎升級，唔會覺得手上經常有一堆低呢嘅無用裝，因為可以用黎谷主力裝。玩RPG我最怕時不時要走去賣廢鐵。
- 最大控訴：越到後期你會越發現做故事任比起殺怪賺多好多exp，我走去抽贏一百隻等級高過我嘅怪都唔及跟隨故事任走去用女女傾一秒計，試問我仲邊有動力去四圍探索，挑戰強怪呢？乖乖地聽故事就平步青雲。
來年我其實最希望就係可以試更多新手遊，最好就有隻可以挑戰怪物彈珠響我心目中地位嘅！唔知大家今年督得最多嘅又係邊幾隻apps呢？
John K on YouTube:http://www.YouTube.com/KJOHNK