2017年度 最佳 及 最差 遊戲大獎
首先祝各位2018新年快樂，萬事如意，食得訓得玩得，逢game必爆！
雖然之前已經選出我今年最鍾意嘅FPS，RPG同手遊，我仍然覺得有必要講講今年最令我滿意同失望嘅作品。
2017年John K’s Game of the Year：
Super Mario Odyssey
我係一個三心兩意嘅人，好聽啲講就係興趣多元化，老實講就係每樣嘢都三分鐘熱度。所以無論人同事，如果可以陪我渡過三十年都忠心不變嘅都絕對係難得中嘅難得。遊戲機就係其中一樣，而剛好今年老任嘅馬里奧Switch派台大作就係最好嘅提醒。
親切嘅介面同開場，簡單易學嘅操作，恰到好處嘅難度，最重要係一貫輕快放鬆嘅配樂，提醒我打機其實唔駛吓吓講畫面有幾勁，對唔對應4K HDR，有無星級聲優坐鎮，係咪一定要課金，有無電競價值，下略三千字。從紅白機隻孖寶兄弟開始，從拎起控制器按START一刻，我都係從頭到尾享受玩遊戲嘅樂趣，無嘢好問亦無嘢好鬧。咪就係踩敵人，爬高樓，搵月亮，救公主，呢條老掉牙嘅方程式淨係放響Mario身上先有效，因為呢個大叔一早已經入咗你我屋企，連買第一部遊戲機俾你嘅父母都知道係信心嘅保證。
Dark Souls有得玩一百個鐘好抵玩？咁請問一百個鐘裡面你啶過幾多次手制？我可以講我十幾個鐘爆Mario Odyssey，成個過程都係心滿意足。如果有日我決心儲晒所有月亮又可以再煲過，點會唔抵玩？唔好同我講三國無雙儲武器可以玩500個鐘啊，你用隻左手黎同結衣BB比，我幫唔到你。
2017 John K’s Disappointment of the Year：
Final Fantasy XV
本來直頭連寫都唔想寫佢，不過既然講咗最佳遊戲，順便講埋最差遊戲啦。不過首先要澄清，我知道呢隻係２０１６年嘅作品，但我其實到咗今年先立定決心將佢煲爆，敬請留意。
雖然係最失望，但其實都係因為我對佢特別有期望。唔怪得我，自從光姐死唔斷氣嘅XIII系列自後我就一直等緊響PS4上玩到一隻非MMO嘅FF。畢竟我比較守舊，覺得RPG就係應該好似FF同DQ咁樣嘅。可能因為咁我對Bethesda大作例如Skyrim同Fallout 4都未能太投入。
先講FFXV好嘅地方啦：畫面絕對係PS4上數一數二將機能推到極致嘅遊戲，就算無HDR電視都十分養眼。人設方面，十分忠於FF系列風格。四個兄弟揸開蓬車遊山玩水，唔好話FF系列，RPG裡面無乜其他遊戲俾到呢個感覺。Open world全開放環境裡面有好多嘢做，睇黎XIII俾人鬧一本道真係鬧到變咗XV遊戲設計嘅主要方針。
唔好嘅地方其實唔係多，可惜全部係關鍵位：四條友唔好話講嘢性格，連著衫都差唔多樣。好多人話呢隻係MK FF我覺得無咩問題，但至少俾多幾個性格鮮明嘅角色黎平衡吓嘛。要救果位公主戲份偏少，如果你有睇遊戲推出之前嘅FFXV大電影Kingsglaive就仲好少少，不過我玩到爆機都真係唔覺得自己著緊救美人呢個目標，反而一班毒L其實自己圍爐打丁更開心。主角公子病末期，出世就有格鬥技巧，有最強武器等佢拎，又已經識魔法，有埋三個朋友陪太子追女仔，幾乎連電話都唔駛自己接，我比較難代入角色。。最重要係我感受唔到FF系列劇本一向嘅拿手好戲，世界同正義面對滅亡，主角勢必要背水一戰果種推動力，光姨個包袱已經重過你。
操作唔算難掌握，尤其劍到人到呢招真係用幾多次都覺得型，但係一去到打巨型boss或者地牢關卡時，真係俾個鏡頭玩死唔知幾多次。魔法系統無必要地麻煩，好似唔想你常用咁，呢個可能係自己唔太鍾意一味劈友有關。另一個FF特色：召喚獸，係好型，但唔係見過幾多次。。
如果唔係掛FF名，呢隻game已經入選我2017年最喜愛RPG行列，不過我呢個FF常客真係食唔慣呢個風格。再講故事方面都可以做得緊湊啲，男女主角慘啲，比較合我口味。
John K on YouTube: http://www.YouTube.com/KjohnK
John K on Facebook: http://www.facebook.com/hkjohnk