Sorry 囉！我剩係識去東京！x2
東京，對於喜愛遊戲機同動漫嘅我黎講，係個令人又愛又恨嘅城市。愛就唔駛解釋啦，恨就恨唔可以將成個東京帶返香港。
曾幾何時，港人真係試過將日本搬返香港：1996年落信和，搭緊扶梯就已經聽到安室奈美惠唱Sweet Sweet 19 Blues。買完新安室同Puffy唱片就會經過雜誌店，買本Boon睇下裏原宿今期著乜先。掀下本書聽到木村唱歌，係喎尋日播左新SMAP x SMAP，買隻vcd又無左幾十蚊。最後當然係睇下Playstation隻Bio Hazard炒完未，好想玩。
到左今日，雖然日風仍然在吹，但同時又有韓風，歐美風，祖國風… 我始終懷念96年出親旺角都身無分文返屋企嘅日子。而家自己賺到錢，走落信和都已經唔係同一回事。
所以每逢有幾日短假期，通常唔駛點考慮就去東京，今次都唔例外。
問自己：「上次先去過東京，今次係咪去吓其他城市好呢？」
Sorry 囉！我剩係識去東京！ 重點講吓今次去東京做咗啲咩呢？
－便利店買早餐消夜永遠開心過酒店continental breakfast。喺東京嘅時候因為天氣太凍（零下2度），所以去LAWSON，FAMILY MART買熱嘅綠茶係每日必做嘅事。日本7仔嘅三文治做早餐係正嘅！（如風腔）
－既然凍到飛起，當然要坐火車去箱根，浸溫泉！從東京出發一個幾鐘就到，即日來回都得。仲有得一路浸一路欣賞靚景，最適合頭幾日行街行到腳軟之後好好放鬆一番。
－響香港已經消失得七七八八嘅機舖，就算俾你搵到一間都只有兩部高達同一堆金魚機。幸好東京尚有個地方叫秋葉原。裏面無部機識玩都無所謂，最鍾意剛到踄從完全唔識玩到臨走前開始識識地，領略到樂趣。同埋我去推1000YEN落大海去夾公仔，先發覺70HKD就咁冇咗。
－最後嗰日晏晝去咗牛もと村食吉列牛，千三yen有交易！圍起港紙＄100，真係好抵食又好玩 ，因為可以自己烤！超推介DESU！
－新宿VR ZONE，呢個係今次嘅重點CHECKPOINT之一。今嗰POST唔講太多，因為有太多野要講，我仲拍咗片比大家睇，請期待！
－抬頭望吓天高氣爽，再低頭望吓人地條街幾乾淨。
－東京迪士尼海洋館！第二次去嘅感覺都係好好玩，一定要玩Journey to the Center of the Earth，你懂的。
－以前會一定去轉築地市場，而家好多人，再加上現今響日本上網方便，自己上google/blog搵食變左節目之一。其實係東京求其一間食店呀，居酒屋呀都已經好好食，不過，我會LIST灑我今次去食過嘅當幫自己做記錄：
1）美登利
2）回轉美登利
3）牛もと村
4）馬馬虎虎
5）博多風龍 x2
6）磯丸水產
7）トラ五郎 新宿小滝橋通り店
8) 成田機場Terminal 2，天亭
9) YAKINIKU Boucherie
10) 無敵家
11) ミカサデコ&カフェ 神宮前
12) 人形町今半
嘩，原來我都去咗好多地方食野… 去得短短幾日，每一餐都無hea食嘅餘地。玩夠食夠買夠，返到屋企始終係最舒服。拆戰利品拍吓片share吓又可以開心一晚，第日精神飽滿返工又開始check幾時機票有靚價，又開始loop同一個問題：「上次先去過東京，今次係咪去吓其他城市好呢？」
（手機用家請按此：https://www.youtube.com/watch?v=vH9CgRLUVIo）
John K on YouTube: http://www.YouTube.com/KjohnK
John K on Facebook: http://www.facebook.com/hkjohnk